Jobe 8

₂“Kutawuze kube ngunini

solomane ukhuluma tintfo letinje?

Emavi akho atikhatsa nje temoya lohhushako.

₃Nkulunkulu uyawuguculela yini umtsetfo wakhe lolungile?

Somandla uyayiguculela yini intfo lelungile?

₄Kungahle kube bantfwabakho

kukhona labakonile kuNkulunkulu,

wase ubajezisa ngalokufanele sono sabo.

₅Kodvwa wena nawungabuka kuNkulunkulu,

utincengele kuSomandla,

₆futsi nangabe wena umsulwa ungcwele,

ngisho nanyalo angasukuma yena akumele,

akubuyisele endzaweni yakho lefanele wena.

₇Konkhe loku lokukulahlekele bekuyawuba lite kakhulu,

nase kucatsaniswa naloku

bewungakunikwa nguNkulunkulu kamuva.

₈“Buta titukulwane takucala,

uvisise kuto kutsi boyisemkhulu babefundzani,

₉ngobe tsine sitelwe itolo loku, kute lesikwatiko,

netinsuku tetfu tekuhamba

lapha emhlabeni tisitfunti nje.

₁₀Tingete takufundzisa yini tikutjele?

Tingete tawakhipha yini emavi

laphuma ekuhlakanipheni kwato?

₁₁Sitfombo sephaphira singakhula yini

sibe sidze, nasingakamili echaphotini?

Umhlanga wona ungakhula yini, nakute emanti?

₁₂Kutsi kusakhula kahle kungakagawulwa nangumuntfu,

bese kusheshe kuyabuna kwendlula ngisho tjani imbala.

₁₃Sinjalo-ke siphetfo sabo bonkhe

labafulatsela Nkulunkulu,

liphela kanjalo-ke litsemba lemuntfu longakholwa.

₁₄Loko lakwetsembako kulihobosha nje,

loko labeke kuko litsemba kunjengendlu yebulembu.

₁₅Utsi nakatsi ubambelela kuko, kuwe kanye naye,

nakatsi weyama kuko, akumsimisi.

₁₆Umuntfu lonjalo ufanana nesitjalo

lesiniselwa kahle kantsi siselangeni,

senabisela imiliba yaso kuyo yonkhe insimi.

₁₇Situngeletela timphandze taso encunjini yematje,

setame kufuna indzawo lapho emkhatsini walamatje.

₁₈Sitsi singasishulwa lapha kulamatje,

kwawona lamatje, lebeseyeme kuwo,

asiphike atsi:

‘Cha, angikwati mine wena.’

₁₉Ngempela imphilo yaso iyabuna ife,

bese kutsi lapho kulomhlabatsi waso

kumile lesinye silimo.

₂₀“Ecinisweni Nkulunkulu akamlahli umuntfu lomsulwa,

futsi akaticinisi tandla tebantfu labenta bubi.

₂₁Noko umlomo wakho uyakuwugcwalisa ngeluhleko,

netindzebe temlomo wakho atigcwalise

ngekumemeta ngenjabulo.

₂₂Titsa takho tiyakwembatsiswa ngemahloni.

Emakhaya alababi akasayiwubuye abonwe.”