Jobe 6

₂“Kube tinhlungu tami betingafakwa esikalini tikalwe,

nalo lonkhe lusizi lwami lubekwe esilinganisweni;

₃ngempela betingaba matima

kwendlula sihlabatsi saselwandle,

ngako-ke akumangalisi kutsi emavi ami ashube kangaka.

₄Imicibisholo yaSomandla ingekhatsi, ingihlabile,

umoya wami sewunatse shevu wayo.

Tesabiso taNkulunkulu ticondzane nami ngco.

₅Imbongolo yesiganga iyakhonya yini nayiseluhlateni?

Yona inkhomo iyabhonsa yini nayiseluhlateni?

₆Kudla lokudvuma kuyadliwa yini nakute luswayi?

Kona nje bukhona yini bunandzi

kulokumhlophe kwelicandza?

₇Kudla lokungabe kondla umtimba wami

kusuke kunginamatsele emphinjeni,

nasematfunjini kufike kungigulukunye

kwente umdvumacolo.

₈“Awu, shangatsi kucela kwami kungevakala,

Nkulunkulu amane angiphe loko lengikufunako.

₉Kutsi Nkulunkulu amane asale angisila,

angihlwitse ngesandla sakhe angijube.

₁₀Ngobe loko ngukona bekunganginika kuphumula nekutfokota

kuleminjunju lengapheli yemahlaba,

ngekutsi angikawaphiki emavi aLongcwele.

₁₁“Mandlana mani mine lenginawo,

kutsi ngisengachubeka ngetsembe?

Tsemba lini lengisenalo

kutsi ngisengabeketela?

₁₂Nginemandla elitje yini kantsi mine?

Wona lomtimba wami ulitfusi yini?

₁₃Nginawo yini emandla ekutisindzisa ngekwami,

njengobe nje sengemukwe konkhe kwami?

₁₄“Umuntfu losaphelelwa litsemba

kufanele akhutsatwe bangani bakhe labetsembekile,

nakhona asakufulatsela kwesaba Somandla.

₁₅Kodvwa bomnaketfu

bangimbulutela njengetibhobhodla temanti,

yebo, njengetibhobhodla temanti

letiphuphumako tiphindze tome,

₁₆tibuye tidvungeke tibe mnyama

ngekuncibilika kwangcocwane,

tigcwale lapho sitfwatfwa sifihlakele khona.

₁₇Kodvwa tiyoma tingete tageleta ebusika,

litsi lingashisa tibaleke emivileni yato.

₁₈Tindvwendvwe letibekelele ngaleyo ndlela yato tiyeduka,

tilahleke, tize tiphelele ehlane.

₁₉Tindvwendvwe tebaseThema titfungatsana nemanti,

netihambi tebaseSheba letitsenga titsengise,

tilindzele ngelitsemba.

₂₀Tiyajabha noko, ngobe betetsemba kakhulu,

titsi natifika lapho, tijabhe.

₂₁Ningiyenge kanjalo-ke nani,

nitsite kube nibone lenhlupheko yami,

nase nikhweshela emuva ngenca yekwesaba.

₂₂Ngike ngasho yini ngatsi: ‘Nginikeleleni,’

nome ngatsi: ‘Ngicela ningihlenge’?

₂₃Ngike ngasho yini ngatsi:

‘Ngikhululeni esandleni sesitsa,

ningisindzise etidladleni talabanelunya’?

₂₄“Ngifundziseni-ke, ngitawubindza,

ningikhombise lapho ngone khona.

₂₅Maye, abuhlungu emavi laliciniso!

Kodvwa angisita ngani emavi enu ekuhlakanipha?

₂₆Ngekwenu netama kulungisa loku lengikukhulumako yini?

Lamagama emuntfu losaphelelwa litsemba

wona niwenta abe ngumoya yini?

₂₇Nitawuze nente inkatho, nentele longenayise,

nitsengise ngekuntjintjiselane ngemngani wenu.

₂₈“Kodvwa phela, ase nimane nibe nesihawu, ningibuke nje.

Ngingawacala yini mine emanga lapha embikwenu?

₂₉Ase nicabangisise kabusha,

ningangiphatsi ngalokungakafaneli.

Ase nicabangisise kahle lendzaba,

bucotfo bami sebusebucayini.

₃₀Bukhona yini bubi kuloku lengikushoko?

Umlomo wami ungete wabubona yini

bubi nabusenhlitiyweni?”