Jobe 38

₂“Ngubani lona lokhinyabeta teluleko tami

ngemavi late lwati?

₃Bhukula-ke njengendvodza;

ngitakubuta, wena ungiphendvule.

₄“Bewukuphi wena, nangibeka sisekelo semhlaba?

Ngitjele, nawukucondza loko.

₅Ngubani labekala bukhulu bawo?

Nakanjani ufanele kukwati loko!

Ngubani labedvonsa intsambo yekukala nawukalwako?

₆Tinsika tawo temiswaphi?

Labekwa ngubani litje lekusimisa likona,

₇ngesikhatsi tinkhanyeti tentsatsakusa

tihlabela kanyekanye,

netingilosi tonkhe tihlatjeleliswa kujabula?

₈“Ngubani lowavala emasango ekuvimbela lwandle,

naluphuphuma,

luphuma esiswini semhlaba,

₉ngesikhatsi ngenta emafu aba yingubo yalo

ngilugocota ngebumnyama lobukhulukati,

₁₀ngesikhatsi ngimisa iminyele yalo,

ngibeka iminyango neticabo talo,

₁₁ngesikhatsi ngitsi: ‘Ungahamba ugcine lapha,

ungabe usachubekela embili,

emagagasi akho latigcabhako atawugcina lapha’?

₁₂“Wase wakutfuma yini kusa

nome ukhombe intsatsakusa indzawo yayo?

₁₃Wase wayitjela yini intsatsakusa

kutsi ichwage lomhlaba,

ishukumise lababi lapho babhace khona?

₁₄Kuphuma kwenhlavu yelilanga

kwenta emagcuma netihosha kubonakale

njengemitfungo yengubo,

kukhanye njengekugcama kweluphawu ebumbeni.

₁₅Kukhanya kwemini kunemandla kulababi,

kubavimbela kutsi bangakwenti lokubi.

₁₆“Use waya yini etiyalwini telwandle,

nome uhambe ekujuleni kwelwandle?

₁₇Sewuke wakhonjiswa yini emasango ekufa?

Sewuke wawabona yini emasango ematfunti ekufa?

₁₈Ubucondza kahle yini bubanti bemhlaba?

Ase ungitjele, nangabe uyakwati konkhe loku.

₁₉“Iphi indlela leya ekhaya lekukhanya?

Bona bumnyama uyabati yini kutsi buhlalaphi?

₂₀Ungakumikisa yini etindzaweni tako?

Uyatati yini tindlela letiya emakhaya ako?

₂₁Nakanjani ufanele kukwati loko, ngobe wase utelwe!

Maye, sewuwadlile emabele bo!

₂₂“Wase wangena yini etingungwini tangcocwane,

nome uke watibona yini tingungu tesangcotfo,

₂₃lengikugcinele tikhatsi letimatima,

lekutinsuku tekulwa kanye netemphi?

₂₄Umbane lona usuke uchamuka ngakuphi,

nome-ke umoya wasemphumalanga

losakateka nemhlaba wonkhe usuke uchamukaphi?

₂₅Ngubani lomba imisele yetikhukhula temanti emvula,

nalomba indlela yekudvuma kwelitulu,

₂₆kutekunisela live lelingahlalwa ngumuntfu,

lihlane kalashameshame,

₂₇nekwenelisa live lelingenalutfo

lihlume libe neluhlata?

₂₈Imvula inaye yini uyise?

Ngubani nje lotala ematfonsi ematolo?

₂₉Ngcocwane uphuma esiswini sabani?

Ngubani lotala sitfwatfwa emazulwini,

₃₀ngesikhatsi emanti asalukhuni njengelitje,

nangesikhatsi kujula kwemanti sekulidvwala?

₃₁“Ungasibophela yini ndzawonye

Silimela lesimengetelako?

Ungatichacha yini tintsambo teMtsala?

₃₂Ungaticondzisa yini tinkhanyeti

kutsi tihambe ngekugcina sikhatsi sato?

Ungalikhombisa yini liBhele lelitinkhanyeti

kanye netinkhanyeti talo letincane

kutsi kufanele kuhambe kushonephi?

₃₃Uyayati yini imitsetfo yasemazulwini?

Leyo mitsetfo ungayenta yini

kutsi isebente lapha emhlabeni?

₃₄“Ungawamemeta yini emafu,

utembese wena ngelibhudlo lemanti?

₃₅Ungayitfuma yini imibane kutsi ibaneke?

Yona ingakuphendvula yini itsi: ‘Naku sesikhona’?

₃₆Ngubani nje lowaphakela inhlitiyo ngekuhlakanipha

nome wapha ingcondvo kucondza?

₃₇Ngubani nje lohlakaniphe

kangangekutsi angabala emafu?

Ngubani longagoboncisa timbita temanti tasemazulwini,

₃₈ngesikhatsi lutfuli luba lukhuni

nemagadze emhlaba anamatselana?

₃₉“Ungalitingelela yini libhubesikati kudla?

Ungakwesutsisa yini kulamba kwemabhubesi,

₄₀ngesikhatsi abhaca khona emihumeni yawo

nome abhace khona etincumatsini?

₄₁Ngubani lonika emahhwabayi kudla,

ngesikhatsi emazini awo akhala kuNkulunkulu

azula aswele langakudla?”