Jobe 33

₁“Manje-ke, Jobe, lalela nankha emavi ami,

kulalele konkhe loku lengitakukhuluma.

₂Manje-ke, sengitawucala ngikhulume,

emavi ami asaselulwimini lwami.

₃Emavi ami ngawo lakhombisa ngalokusebaleni

kutsi ngicotfo enhlitiyweni,

lulwimi lwami lukhuluma kona cobo

loku lengikwatiko.

₄Moya waNkulunkulu ungentile.

Umphefumulo waSomandla unginika kuphila.

₅Ngiphendvule-ke, nawungakhona,

tilungiselele kubhekana nami.

₆Mine ngifanana nawe embikwaNkulunkulu,

nami ngatatjwa ebumbeni.

₇Ngako-ke akukadzingeki kutsi ungesabe,

sandla sami ngeke sibe matima etikwakho.

₈“Nawe ukhulume nami ngikhona,

ngive onkhe emavi akho, watsi:

₉‘Mine ngimsulwa, anginasono;

ngihlobile, anginacala.

₁₀Kodvwa Nkulunkulu ungibeka licala,

ungitsatsa njengesitsa sakhe.

₁₁Tinyawo tami utitsekeleta ngetinketane,

acaphelisise tonkhe tinyatselo tami.’

₁₂“Kodvwa ngiyakutjela ngitsi:

Kuloku uyalahleka,

ngobe Nkulunkulu mkhulu kunemuntfu.

₁₃Manje-ke, ukhononelani kuye,

ube utsi akawaphendvuli emavi emuntfu?

₁₄Ngobe Nkulunkulu uyakhuluma

nome ngayiphi indlela.

Kulesinye sikhatsi kuba ngulomuntfu

longacondzi kutsi utsini Nkulunkulu.

₁₅Ukhuluma ngemaphupho nangemibono yasebusuku,

bantfu nabalele emacansini abo,

badvodla butfongo etingutjeni tabo.

₁₆Angakhuluma nasetindlebeni tabo,

abesabise ngetecwayiso takhe.

₁₇Loko ukwentela kutsi ancandze umuntfu

ekwenteni tono nasekutishayeni sifuba,

₁₈entela kugcina umphefumulo wakhe

ungashoni emgodzini

nemphilo yakhe kutsi ingabhubhi ngenkemba,

₁₉nome umuntfu angeviswa buhlungu

ecansini lakhe ngemahlaba

nangekujabha lokungenamkhawulo kwasematsanjeni,

₂₀kangangekutsi umtimba wakhe

ungasakukhanuki nekudla, kunenkhetele inhlitiyo

nome abuka kudla lokumnandzi kangakanani,

₂₁umtimba wakhe wondze ube ngumkhehlekhehle,

kutsi ematsambo awo labefihlakele

bese avela ebaleni.

₂₂Umphefumulo wakhe udvonseleke emgodzini,

nemphilo yakhe

indvonswe titfunywa tekufa.

₂₃“Kantsi kube bekungaba nengilosi

leme ngakuye lengumlamuleli,

yinye nje enkhulungwaneni,

letabotjela umuntfu kutsi yini lokubi nalokuhle,

₂₄ibe nemusa kuye itsi:

‘Mane umvikele angayi emgodzini.

Sengimtfolele inhlawulo,’

₂₅umtimba wakhe bese uyavuseteleka

ube musha njengeweluswane,

ubuyiseleke ube musha njengasebusheni bakhe.

₂₆Uyathandaza kuNkulunkulu atfole umusa kuye;

ubona buso baNkulunkulu ajabule aze amemete.

Nkulunkulu umbuyisela esimeni sakhe sekulunga.

₂₇Uyabe sewuya kubantfu, afike atsi:

‘Ngonile, ngagwegwisa loko lobekulungile,

kodvwa angikakutfoli loko lebengikufanele.

₂₈Uwephulile umphefumulo wami

kutsi ungayi emgodzini,

sengitawuhlala ngijatjuliswa kukhanya.’

₂₉“Nkulunkulu wenta tonkhe letintfo kumuntfu,

kabili nome katsatfu,

₃₀entela kuncandza umphefumulo wakhe

ungangeni emgodzini,

kuze kukhanya kwemphilo

kukhanye emphilweni yakhe.

₃₁Lalela la, Jobe, lalela mine.

Thula, ngitabe sengiyakhuluma.

₃₂Nawunako longakusho, ngiphendvule,

ukhulume kakhulu,

ngobe ngifuna kutsi uhlanguleke kahle.

₃₃Kodvwa nawute lutfo,

lalela la kimi, uthule,

ngobe mine ngitakufundzisa kuhlakanipha.”