Elihu
(Jobe 32:1 – 37:24)
1Njengobe Jobe abeciniseke kangaka ngebumsulwa bakhe, lamadvodza lamatsatfu ase ayayekela lokulibala kwetama kumphendvula. 2Kodvwa Elihu, umsa waBarakheli, umBuzi, wesive sakaRamu, watfukutselela Jobe kamatima ngekutsi kube nguye lotishoko kutsi umsulwa, kungete kwasho Nkulunkulu. 3Wabatfukutselela labangani baJobe labatsatfu, ngobe babehlulekile kutfola sici kuJobe, kantsi phela bebakadze bamsolile. 4Manje-ke Elihu abesethulile yena kukhuluma naJobe, ngobe bona babebadzala kunaye. 5Kodvwa watsi kube abone kutsi labangani baJobe labatsatfu sebate labangahle bakusho, intfukutselo yakhe yavuka yema ngetinyawo.
6Ngako Elihu, umsa waBarakheli, umBuzi, wakhuluma watsi:
“Ngimncane ngeminyaka, nine nibadzala;
ngiko nje bengesaba ngingafuni kunitjela
loko lengikwatiko mine.
7Ngicabange ngatsi:
‘Kukhula lokufanele kukhulume,
iminyaka leminyenti lekufanele ifundzise kuhlakanipha.’
8Kodvwa umoya lokumuntfu,
kuphefumula kwaSomandla,
lokunika umuntfu kucondza.
9Akusibo labadzala bodvwa labanekuhlakanipha,
futsi akusibo lase bagugile bodvwa
labakwatiko lokulungile.
10“Ngako-ke ngitsi: Lalelani kimi;
nami futsi ngitanitjela loko lengikwatiko.
11Nginimele ngesikhatsi nisakhuluma,
nganilalela nisabeka
kubona kwenu ngekuhlakanipha,
ngesikhatsi nisaphenya emagama.
12Nami nginilalele ngayo yonkhe ingcondvo yami,
kodvwa kute namunye wenu
lokhonile kubeka Jobe licala ngalokukhanyako,
kute namunye lokhonile
kuphendvula emavi akhe.
13Ningasho kutsi: ‘Sikutfolile kuhlakanipha,
akube nguNkulunkulu lophikisa Jobe,
hhayi umuntfu.’
14Kodvwa Jobe emavi akhe abengakawacondzisi kimi,
ngako-ke ngingeke ngimphendvule
ngetinkhulumo tenu.
15“Sebamangele,
abasenako labangakusho;
sebaphelelwe ngemavi.
16Kufanele ngime yini, njengaloku sebathulile nje,
njengaloku sebatfomekile nje nyalo
bangasenamphendvulo?
17Nami ngitawubeka inkhulumo yami;
nami ngitawukhuluma loko lengikwatiko.
18Ngobe mine ngigcwele emavi,
nemoya longekhatsi kwami uyangicindzetela.
19Lapha ngekhatsi kwami
nginjengeliwayini lelivalelwe ebhodleleni,
njengetikhumbasikhwama teliwayini lelisha
lesetifuna kupumuka.
20Kufanele ngikhulume kuze ngitfole kuhhamuleka,
kufanele ngivule umlomo wami ngiphendvule.
21Kute muntfu lengitamkhetsa,
futsi kute lengitamyenga ngelite,
22futsi-ke kube bengiyingcweti ekuyenganeni,
uMdali wami abetangisusa masinyane emhlabeni.”
