Jobe 31

₁“Ngenta sivumelwane nemehlo ami

kutsi ngingeke ngiyibuke ngenkhanuko intfombi.

₂Ngabe siyini sabelo semuntfu lesiphuma kuNkulunkulu?

Siyini sabelo lesilifa leliphuma etulu kuSomandla?

₃Akusiyo yini imbhubhiso kulababi,

sehlakalo kulabo labenta sono?

₄Akatiboni yini tindlela tami,

abale tonkhe tinyatselo tami?

₅“Nangabe ngihamba ngekungetsembeki,

nome-ke lunyawo lwami

lusheshisile lwajakela emangeni,

₆Nkulunkulu akangilinganise ngesilinganiso seliciniso,

utabe sewuyatfola kutsi ngimsulwa.

₇Nangabe tinyatselo tami tijikile emkhondvweni,

nangabe inhlitiyo yami beyidvonswa ngemehlo ami,

nome-ke nangabe tandla tami betingcolisiwe,

₈nakunjalo-ke, lomunye umuntfu

akadle konkhe loko bengikuhlanyele,

netilimo tami atizushunwe.

₉“Nangabe inhlitiyo yami

ike yahungwa ngulomunye umfati,

nome-ke ngike ngayawukhukhubala

emvakwesivalo samakhelwane,

₁₀nakunjalo-ke, umfati wami

akahambe ayewusilela lenye indvodza,

alale nalamanye emadvodza.

₁₁Ngobe loko bekungaba lihlazo nendlisamahloni,

sono lesifanele sehlulelwe.

₁₂Lowo ngumlilo loshisa kube khona imbhubhiso,

ngabe kusizuphunile sivuno sami sonkhe.

₁₃“Nangabe ngingakatiphatsi njengekwemtsetfo

tisebenti tami letidvuna naletisikati,

natinetikhalo ngami,

₁₄ngitakwenta njani,

nangabe Nkulunkulu asabhekana nami ngaloko?

Ngitawuphendvula ngitsini, nasengibutwa?

₁₅Akusiye yini yena lowo

lowabumba mine esiswini lona lowabumba tona?

Akusiye yini lowaseluka sonkhe etiswini tabomake?

₁₆“Nangabe angikahlangabetani neticelo talabamphofu,

nome-ke ngenta emehlo emfelokati

aphophota tinyembeti,

₁₇nangabe ngatigodlela mine kudla kwami,

ngangete ngahlephulelana nalabatintsandzane,

₁₈kodvwa ngabondla kusukela ebusheni bami,

ngaba njengeyise kubo,

kusukela ekutalweni kwami ngabondla bafelokati,

₁₉nangabe ngake ngabukelela umuntfu afa,

abulawa kweswela kwekwembatsa,

nome loweswele nje angenasembatfo,

₂₀inhlitiyo yakhe yangete yangibusisela

kumfutfumalisa ngetimfulumane

letiphuma etimvini tami,

₂₁nangabe ngake ngaphakamisa sandla sami

etikwaloyintsandzane, ngati kahle

kutsi mine ngiyalalelwa enkhundleni,

₂₂nakunjalo-ke, umkhono wami

awumane uncutfuke lapha elungeni lesiphanga,

awujubeke elungeni lesiphanga, ulahleke phansi.

₂₃Ngobe mine ngangiyesaba kakhulu

imbhubhiso levela kuNkulunkulu.

Nangenca yekwesaba bukhosi bakhe nje,

ngangingeke ngiyente intfo lenje.

₂₄“Nangabe bengibeke litsemba lami egolideni,

nome ngasho kuyo igolide lecengiwe ngatsi:

‘Wena usivikelo sami,’

₂₅nangabe ngangijatjuliswa bunjinga bami,

umcebo lowawakhiwe tandla tami,

₂₆nangabe nganaka lilanga ekukhanyeni kwalo

nome inyeti ekuhambeni kwayo lokumangalisako,

₂₇kangangekutsi inhlitiyo yami yase iyebeka

ngikuhloniphe ngekwanga sandla sami,

₂₈nakunjalo-ke, konkhe loko tono

lokusafanele tehlulelwe,

ngobe ngabe bengingaketsembeki

kuNkulunkulu losetulu.

₂₉“Nangabe ngajabulela sitsa sami, nasehlelwa ngulokubi,

nome ngagalajela inhlupheko leyasehlela,

₃₀angizange ngiwuvumele umlomo wami kutsi wone

ngekutsi ngikhiphe sicalekiso simelane nemphilo yaso.

₃₁Bantfu labasekhaya kami

abazange sebasho yini batsi:

‘Ngubani longazange asayidle

ayesutse inyama yakaJobe?’

₃₂Kodvwa kute nasinye sihambi

lesake salala ngephandle.

ngobe umnyango wami wawuhlala

uvulekele tihambi.

₃₃Ngake ngasifihla yini sono sami,

njengobe kuhlale kwenta emadvodza,

ngake ngalifihla yini licala lami enhlitiyweni yami?

₃₄Ngempela, angizange ngesabe

kutsi bantfu batawutsini,

angizange ngibindze nome ngitivalele endlini

ngenca yekubesaba labo bantfu.

₃₅“Awu! Kube mane kunemuntfu longangiva!

Sengiyakusicilela manje kutivikela kwami.

Akangiphendvule phela Somandla.

Lowo longibeka licala akalibhale phansi.

₃₆Empeleni bengingaletjatsa,

bengingalifaka enhloko njengemchele.

₃₇Bengingamlandzisa ngato tonkhe tinyatselo tami,

bengingalingisa umbusi,

ngicondzane naye ngco.

₃₈“Nangabe live lami likhala ngami,

nayo yonkhe imisedlana yalo imanti tinyembeti,

₃₉nangabe bengidle titselo talo

ngaphandle kwekukhokha tindleko talo,

nome ngababulalisa ngendlala

labo labahlala kulo,

₄₀nakunjalo-ke,

akuvumbuke emanyeva kulo

esikhundleni sakolo;

kuvumbuke lukhula esikhundleni sebhali.”