Jobe 28

₁“Ukhona umgodzi wekutapa isiliva,

yebo, ikhona nendzawo

lapho kucengisiswa khona igolide.

₂Insimbi imbiwa emhlabatsini,

nelitfusi lincibilikiswa likhishwe etjeni lalo.

₃Umuntfu uyabucedza bumnyama,

uphenyisisa aze afinyelele nasetingonini temhlaba,

afunana nelitje lensimbi

ebumnyameni lobukhulukati.

₄Umba umgodzi loshonako,

khashane kabi nalapho kuhlala khona bantfu,

lapho kungasahambi khona bantfu;

khashane kakhulu nebantfu,

ulenga khona ajikite.

₅Umhlaba, lapho kuphuma khona kudla,

uyaguculwa lapha ngaphansi kube shangatsi ngungemlilo;

₆isafire iphuma emadvwaleni awo,

nelutfuli lwawo lucuketse tigaca tegolide.

₇Kute ngisho nome linye lingce

leliwatiko lowo mgudvu lofihlakele,

ngisho neliso lalohheya imbala aliwati.

₈Tilwane letinkhulu letitigabatisa ngemandla ato

atilubeki lunyawo lwato kulowo mgudvu;

kute libhubesi lelizulela khona.

₉“Umuntfu welula sandla sakhe,

abhidlite lidvwala kusuke tinhlase,

timphandze tetintsaba tihlale ebaleni.

₁₀Umba imihume emadvwaleni,

liso lakhe liwabone onkhe ematje laligugu.

₁₁Uphenyisisa tiyalu tayo yonkhe imifula,

avumbulule tintfo letifihlakele atibeke ebaleni.

₁₂“Kodvwa kungaze kutfolakale kuphi kuhlakanipha?

Kuhlalaphi kucondzisisa kahle tintfo?

₁₃Umuntfu akabucondzisisi bumcoka bako,

akutfolakali eveni lalabaphilako.

₁₄Kujula nako kuyalandvula kutsi: ‘Akukho lapha kimi,’

nelwandle lutsi: ‘Kute lapha kimi.’

₁₅Kungeke kutsengwe ngisho nangalecengiwe igolide,

ngisho nentsengo yako ingete yalinganiswa ngesiliva.

₁₆Ngeke sekutsengwe ngisho nangegolide yase-Ofiri,

nangelitje leliligugu i-oniksi nome emasafire.

₁₇Ingeke ilinganiswe ngisho nanegolide nengilazi,

futsi ngeke yenaniswe

ngisho nangetintfo letiligugu tegolide.

₁₈Angisaphatsi-ke ngekhorali nangelitje ijasiphi.

Intsengo yekuhlakanipha iphakeme yendlula emarubi.

₁₉Ngeke kulinganiswe ngisho nanethophazi yaseKushe,

kungeke kutsengwe ngisho nangegolide lecengiwe.

₂₀“Kantsi vele kona kuhlakanipha kuvelaphi?

Kuhlalaphi kucondza tintfo kahle?

₂₁Kufihlakele emehlweni ayo yonkhe intfo lephilako,

kuvalelekile ngisho nasemehlweni etinyoni

letindiza etulu emoyeni.

₂₂Imbhubhiso nekufa kutsi:

‘Natsi sive nje emahemuhemu ako

lefikile etindlebeni tetfu.’

₂₃NguNkulunkulu loyicondza kahle indlela leya kuko,

futsi nguye yedvwa lowati lapho

kuhlala khona kuhlakanipha.

₂₄Ngobe yena ubona ekugcineni kwemhlaba,

futsi yena ukubona konkhe

lokulapha ngaphansi kwemtfunti welilanga.

₂₅Watsi nakasungula emandla emoya, akala emanti,

₂₆nakashayela imvula umtsetfo,

abhola indlela yemibane yekudvuma kwelitulu,

₂₇wabuka kuhlakanipha konkhe,

wase uyakudvumisa,

wakumisa kwaba njalo, wakuvivinya.

₂₈Wase ukhuluma kumuntfu, watsi:

‘Buka la, kwesaba Nkulunkulu

libito lako kuhlakanipha.

Kubalekela lokubi loko kukucondza.’ ”