Jobe 27

₂“Kuphila kwaNkulunkulu,

lotsetse lilungelo lami,

yena unguSomandla lowente

kutsi nginambitse lusizi lwemphefumulo wami,

₃yingci kuphila nakusekhona kimi,

nemoya waNkulunkulu usesemakhaleni ami,

₄tindzebe tami tingeke tikukhulume lokubi,

nelulwimi lwami lungeke luwacale emanga.

₅Ngingeke ngivume kutsi loko lenikushoko kuliciniso,

ngiyawuze ngife ngingakehlukani nebucotfo bami.

₆Ngitawunamatsela kulokulunga kwami,

futsi ngingeke ngikuvumele kutsi kusuke kimi.

Nembeza wami angeke angisole,

yingci nangisaphila.

₇“Shangatsi titsa tami tingaba njengalababi,

nalabaphambene nami babe njengalabangakalungi.

₈Ngobe liyini litsemba lalongamesabi Nkulunkulu,

nangabe asasusiwe,

naNkulunkulu asatsatsa kuphila kwakhe?

₉Nkulunkulu utakuva yini kukhala kwakhe,

nasahlaselwa lusizi nenhlupheko?

₁₀Uyawutijabulisa yini ngaSomandla?

Uyawulibita ngaso sonkhe sikhatsi yini libito laNkulunkulu?

₁₁“Ngitanifundzisa ngemandla aNkulunkulu;

ngingeke ngitifihle tindlela taSomandla.

₁₂Nani nonkhe matfupha nikubonile loku.

Pho, niwukhulumelani lombhedvo?”

₁₃“Nasi-ke siphetfo semuntfu lomubi

lasabelwa nguNkulunkulu;

lifa lebacindzeteli labalemukela kuSomandla:

₁₄Nome bantfwabakhe bangaba banyenti,

noko bayawuphelela enkembeni,

netitukulwane takhe tingeke tibe nekudla lokwenele.

₁₅Sifo siyawuyicotfula insali yakhe,

nebafelokati babo bangeke babalilele.

₁₆Nome ngabe ubutsisa ticumbi tesiliva

kube shangatsi lutfuli,

abutsise tembatfo njengeticumbi telibumba,

₁₇letimphahla letibutsiswa libibi

tiyakwembatfwa ngulabalungile,

kutsi labangenacala behlukaniselane lesiliva yakhe.

₁₈Indlu layakhako ifanana nendlu yebulembu,

yebo, ifanana nelichugwana lelakhiwe ngumlindzi.

₁₉Lowo muntfu ulala anjingile,

kodvwa angaphindzi abe njalo,

nakavula emehlo akhe akhandze sekute lutfo.

₂₀Kutfutfumela kumgabadzela njengetikhukhula,

sivunguvungu simkhukhule sihambe naye ebusuku.

₂₁Umoya wangasemphumalanga uyametfwala uhambe naye;

uyamphephula umsuse kuleyo ndzawo yakhe.

₂₂Lomoya utijikijela etikwakhe ungasenamusa kuye,

agijime ashiye inyosi abalekela emandla awo.

₂₃Ushaya tandla umhleke lusulu;

uyamhhewula umsuse endzaweni yakhe.”