Jobe 22

₂“Umuntfu angaba ngilo yini lusito kuNkulunkulu?

Umuntfu lohlakaniphile yena angaba lusito yini kuye?

₃Njabulo yini lebeyingatfolwa nguSomandla

kube bewulungile?

Abetawubuyelwa yini

kube tindlela takho betimsulwa?

₄Kungenca yekwesaba kwakho Nkulunkulu yini

lokutsi akutsetsise, akubeke emacala?

₅Bubi bakho abubukhulu yini?

Tono takho tinaso yini siphetfo?

₆Wafuna sibambiso kubomnakenu

ngendlovu yangena ngaphandle kwesizatfu,

wahlubula labamphofu tembatfo tabo, wabashiya bangcunu.

₇Labadzangele awuzange ubanatsise emanti,

nalabalambile wabema kudla,

₈noko wawungumuntfu lonemandla nalonelive,

ungumuntfu lohloniphekile lohlala kulo.

₉Wahambisa bafelokati yabayaba,

wapitjita emandla alabatintsandzane.

₁₀Ngiko nje tonkhe tingibe tikutungeletile,

netingoti tikwetfusa kangaka,

₁₁ngiko nje kumnyama kuze utsi ungetiwubona,

netikhukhula temfula tikusibekela.

₁₂“Nkulunkulu akahlali yini ekuphakameni kwelizulu?

Ase ubuke kutsi tinkhanyeti tiphakeme kangakanani!

₁₃Noko wena utsi: ‘Nkulunkulu watini?

Wehlulela akulobumnyama lobunjena yini?

₁₄Emafu lamnyama ayamsibekela, kuze angasiboni

asahamba antontomela etulu emazulwini.’

₁₅Usetawuhamba yini ngalendlela lendzala

leyayihamba bantfu lababi?

₁₆Bakhukhuleka,

sikhatsi sabo sisengakefiki,

netisekelo tabo takhukhuleka.

₁₇Bakhuluma kuNkulunkulu batsi:

‘Ase usiyekele!

Somandla angasentani tsine?’

₁₈Noko bekunguye labegcwalise tindlu tabo

ngetintfo letinhle,

ngako ngima bucalu neteluleko talababi.

₁₉“Labalungile bajabula, nabakubona kubhujiswa kwabo,

labangenacala babaphukuta batsi:

₂₀‘Impela titsa tetfu tibhujisiwe,

nemlilo umita bunjinga bato.’

₂₁“Titfobe kuNkulunkulu,

ube nekuthula naye,

kuphumelela kuyakuta kuwe ngaleyo ndlela.

₂₂Yemukela imfundziso lephuma emlonyeni wakhe,

emavi akhe uwabeke enhlitiyweni yakho.

₂₃Nawubuyela kuSomandla, utawusitakala:

Nawususa bubi, ububeke khashane nendlu yakho,

₂₄utsatse nalamatje laligugu uwalahle elutfulini,

igolide yakho yase-Ofiri

uyilahle emadvwaleni asetigodzini,

₂₅Somandla-ke uyakuba yigolide yakho,

isiliva yakho yelikhetselo lelisembili.

₂₆Impela, Somandla uyakuba kujabula kwakho,

wenyusele buso bakho kuNkulunkulu.

₂₇Uyawuthandaza kuye, naye akuve,

bese ugcwalisa tetsembiso takho.

₂₈Konkhe loncuma kutsi ukwente kuyawukwenteka,

nekukhanya kukhanye etindleleni takho.

₂₉Kodvwa Nkulunkulu uyabehlisa labo labatigcabhako,

amsindzise umuntfu lotitfobako.

₃₀Umuntfu lonelicala uyakumkhulula,

amkhulule ngawe,

nangabe tandla takho timhlophe.”