Jobe 17

₁“Umoya wami wephukile,

emalanga ami ajutjiwe aba mafisha,

sengimelwe lithuna.

₂Ngempela bahhalatisi bangikakile,

emehlo ami afanele ahlalele kubuka

lokungichoshela kwabo.

₃“Awu, Nkulunkulu!

Ngihlawulele!

Kodvwa ngubani nje lomunye longangimela?

₄Utivalile tingcondvo tabo, abasangiva nekungiva,

ngako ngeke usabaphumelelisa.

₅Umuntfu ujabulisa bangani bakhe ngekudla,

babe bantfwabakhe bagolela timphungane emlonyeni.

₆“Nkulunkulu sewungente inhlekisa kubo bonkhe,

ngaba ngumuntfu lokhafulelwa ebusweni.

₇Emehlo ami asaze alutfuli ngenca yebuhlungu,

bungimi bonkhe bami sebusitfunti nje.

₈Bantfu labacotfo sebamangele ngalendzaba yami,

labangenacala bavukela laba

labangamesabi Nkulunkulu.

₉Noko, labangcwele batawubambelela etindleleni tabo,

nalabo labatandla tabo tingenacala lalutfo

batawuchubeka babe nemandla lamasha.

₁₀“Kodvwa ase nibuye lapha nonkhe, ase netame futsi!

Ngingeke ngitfole ngisho namunye

lohlakaniphile emkhatsini wenu.

₁₁Emalanga ami asendlulile,

tinhloso tami setephukile,

kanjalo tifiso tenhlitiyo yami tehlulekile.

₁₂Lamadvodza lawa agucula busuku bube yimini,

kutsi ekhatsi nebusuku batsi bona:

‘Sekuyasa.’

₁₃Kube-ke likhaya lami

lebekulitsemba lami lekugcina bekulithuna,

kube-ke bengendlele licansi lami ebumnyameni,

₁₄kube bengingatsi kulokubola: ‘Wena ungubabe,’

nasetimphetfwini ngitsi: ‘Wena ungumake,’

nome: ‘Ungudzadzewetfu,’

₁₅ngabe likuphi litsemba lami?

Ngubani nje longalibona litsemba lami?

₁₆Litakwehla yini liye emasangweni ekufa?

Sitakwehlela elutfulini kanyekanye yini?”