Jobe 15

₁Elifazi, umThemani, waphendvula watsi:

₂“Umuntfu lohlakaniphile angaphendvula yini

ngaletimphendvulo letilite,

agcwalise sisu sakhe

ngemoya loshisako wasemphumalanga?

₃Kute umuntfu lohlakaniphile

longakhuluma ngalendlela lelite lokhuluma ngayo

nome ativikele ngalamavi laluwangala.

₄Kodvwa ukubukela phansi kwesaba Nkulunkulu,

uvimbele kuthandaza kuye.

₅Ngulesono sakho lelesenta ukhulume kanje;

sewukhetse lulwimi lwalabanebucili.

₆Awulahlwa ngimi,

kodvwa ulahlwa ngumlomo wakho,

ulahlwa nguloko lokukhulunywa nguwe lucobo lwakho.

₇“Ucabanga kutsi nguwe wedvwa yini

umuntfu wekucala lowatalwa?

Wena watalwa tingakabikho yini tintsaba?

₈Uyalalela yini nangabe Nkulunkulu

akhuluma nelibandla lakhe?

Ucabanga kutsi kuhlakanipha

kuphelela lapha kuwe yini?

₉Yini loyatiko lesingayati tsine?

Lwati luni lonalo wena lesingenalo tsine?

₁₀Timphunga nalabadzala bangakitsi,

yebo, emadvodza lamadzala, kwendlula uyihlo.

₁₁Akukwenelisi yini kudvudvutwa nguNkulunkulu,

nemagama lakhulunywe ngebunandzi kuwe?

₁₂Inhlitiyo yakho ikutfumbeleni kangaka,

nemehlo akho aphashateliswa yini,

₁₃kutsi ungaze utfukutselele Nkulunkulu,

ukhiphe emagama lamabi kangaka

ngemlomo wakho?

₁₄“Umuntfu abeyini kutsi angaba ngulohlantekile,

nome-ke umuntfu lotelwe ngumfati

kutsi angaba ngulolungile?

₁₅Nangabe Nkulunkulu akabetsembi

labangcwele bakhe,

nangabe ngisho nemazulu akahlanteki

emehlweni akhe,

₁₆mncane kangakanani-ke,

umuntfu lomubi nalowonakele,

nalonatsa bubi njengemanti?

₁₇“Lalela lapha kimi, ngitakuchazela;

ngitakutjela loko lesengikubonile.

₁₈Loko lasebakukhulumile labahlakaniphile

labangatange babafihlele kona boyise,

₁₉labo labanikwa lelive

kwabate wetive labendlula emkhatsini wabo,

ngikutjela kona loko, ngitsi:

₂₀Imihla yemuntfu lomubi igcwele lusizi netinhlupheko,

uphila kanjalo lowo longenasisa

yonkhe imihla lanikwe yona yekuphila kwakhe.

₂₁“Tindlebe takhe tigcwele imisindvo lesabisako,

ngesikhatsi konkhe kubukeka shangatsi kuhle,

umbhubhisi ngulapho amhlasela khona.

₂₂Akakholwa kutsi utawubuyela ebumnyameni.

Vele, uyawuphelela enkembeni.

₂₃Uhamba azulazule afunana nekudla.

Uyati kutsi lilanga lebumnyama selisondzele.

₂₄Buhlungu nelusizi kuyamtfutfumelisa,

kumhlisibete njengenkhosi

lese ihlomele kuhlasela,

₂₅ngobe ugoca sibhakela, agocele Nkulunkulu,

atiphakamise, achoshele Nkulunkulu,

₂₆ngekwedzelela lokukhulu uhlasela Somandla

ngelihawu lelicinile nalelilicinsi.

₂₇Ngobe uhuce buso bakhe ngemafutsa akhe,

lukhalo lwakhe lubhubuka imitsebe.

₂₈“Uyawuhlala emadolobheni labhidlikile,

etindlini lapho kungasahlali muntfu khona,

tindlu lesetidzilike taba ngemahhinsi.

₂₉Angeke asanjinga,

nalomcebo wakhe ungeke ukhonse,

netimphahla takhe tingeke tandze eveni.

₃₀Angeke abubalekele bumnyama,

lilangabi liyakubunisa emahlumela akhe,

kuphefumula kwemlomo waNkulunkulu

kuyawumtsatsa kumlahle khashane.

₃₁Akangatiyengi ngekwetsemba loko lokulihobosha,

ngobe kute layakukutfola ngaloko.

₃₂Kuyawutsi sikhatsi sakhe singakefiki,

akhokhelwe ngalokuphelele.

Emagala akhe akayiwucwebetela,

kodvwa ayawubuna.

₃₃Uyawufanana nemvini

lohhohlokelwe ngemagelebisi awo asengakavutfwa,

abe njengesihlahla semncumo

sihhohlokelwa timbali taso.

₃₄Ngobe sishoshomane lesingenaNkulunkulu

siyawuhlala singatseli lutfo,

umlilo uyakudla emathende

alabo labatsandza imidizo.

₃₅Labo bantfu bemitsa inhlupheko,

bese batala bubi.

Sisu sabo sitilungiselela njalo emacebo.”