Jobe 11

₂“Onkhe lamavi kufanele angaphendvulwa yini?

Lomuntfu lokhuluma kangaka angatsetselelwa yini?

₃Lenkhulumo yakho lelite ingabathulisa yini bantfu

bangabe basakhuluma?

Kufanele ungabe usekhutwa yini wena

nawukhuluma emavi ekuphukuta?

₄Ukhuluma kuNkulunkulu utsi:

‘Timfundziso tami atinasici, futsi ngimsulwa kuwe.’

₅Maye, ngifisa shangatsi Nkulunkulu angakhuluma,

avule umlomo wakhe akuphendvule.

₆Shangatsi angembula kuwe timfihlakalo tekuhlakanipha,

ngobe kuhlakanipha kweliciniso kukabili.

Yati loku: Kutsi Nkulunkulu

akakujezisi ngangekona kwakho.

₇“Ungakucondza yini kujula kwetimfihlakalo taNkulunkulu?

Ungafinyelela yini emikhawulweni yaSomandla?

₈Kuphakeme kunemazulu;

yini nje longayenta?

Kujule kwendlula indzawo yalabafile;

yini nje longayati?

₉Silinganiso sako sidze kunemhlaba,

futsi sibanti kwendlula lwandle.

₁₀“Nangefika lapha akuhhodlele ejele,

akubitele ekugwetjweni,

ngubani longamelana naye?

₁₁Ngempela uyabati bantfu labangemacili,

kantsi futsi nakabona lokubi,

akakutsatseli yini tinyatselo?

₁₂Indvodza lesilima iyawucala kuba ngulehlakaniphile,

mhlazana imbongolo yesiganga itala umuntfu.

₁₃“Noko nawunikela inhlitiyo yakho ngalokuphelele kuye,

welulele tandla takho, ukhuleke, utinikele kuye,

₁₄nawulahla sono lesisesandleni sakho,

ungavumi nekutsi bubi buhlale ekhaya lakho,

₁₅uyawuhamba ngetigi, ungabi nemahloni,

utakuma, usime, ungesabi lutfo.

₁₆Nakanjani, kuhlupheka kwakho utakukhohlwa,

ukukhumbule njengemanti lake ageleta embikwakho,

₁₇kuphila kutawukhanya kwendlule imini,

bese kutsi bumnyama bufanane nekukhanya kwasekuseni.

₁₈Uyawuhlala uphephile, ngobe kunelitsemba,

uyawutsi nawucalata nasemaceleni akho,

utfole kuphumula kwakho.

₁₉Uyawucambalala phansi kubete lokwesabisako;

labanyenti bayawucela lusito kuwe.

₂₀Kodvwa emehlo alababi ayawukwehluleka kubona,

ingabikho ngisho nendlela yekubaleka.

Litsemba labo seliyawuba kufa.”