Jeremiya utsenga insimi
1Leli livi lelefika kuJeremiya liphuma kuSimakadze emnyakeni welishumi wekubusa kwaSedekiya, inkhosi yakaJuda, lekwakungumnyaka weli-18 wekubusa kwaNebukhadnezari. 2Imphi yenkhosi yaseBhabhulona yase ivimbetele iJerusalema, Jeremiya umphrofethi abevalelwe esibuyeni sabogadzi, esigodlweni senkhosi yakaJuda.
3Sedekiya, inkhosi yakaJuda, yayimvalele lapho, yatsi: “Uphrofethelani ngalendlela lophrofetha ngayo? Utsi: ‘Naku lokushiwo nguSimakadze, utsi: Lelidolobha sengitalinikela enkhosini yaseBhabhulona letawulitfumba. 4Sedekiya, inkhosi yakaJuda, ngeke aphunyule etandleni temaBhabhulona, yena nakanjani utawunikelwa enkhosini yaseBhabhulona. Uyawukhuluma nayo umlomo nemlomo, ayibone ngewakhe emehlo. 5Iyawutsatsa Sedekiya imyise eBhabhulona, lapho ayawuhlala khona ngize ngimcondzise, kusho Simakadze. Nanilwa nemaBhabhulona ngeke niphumelele.’ ”
6Jeremiya wakhuluma watsi: “Livi laSimakadze lefika kimi, latsi: 7Hanameli, umnakenu, umsa waShalumi, utawuta kuwe afike atsi: ‘Tsenga insimi yami e-Anathothi, njengobe usihlobo sami lesisedvutane kakhulu nje, kulilungelo lakho nemsebenti wakho kutsi uyitsenge.’
8“Ngako-ke, njengobe Simakadze abeshito, umzala wami Hanameli weta kimi esibuyeni sabogadzi, watsi: ‘Tsenga insimi yami e-Anathothi, eveni lakaBhenjamini. Njengobe kulilungelo lakho kutsi uyihlenge ibe yakho, titsengele yona.’
“Ngavele ngati kutsi leli bekulivi laSimakadze; 9ngako ngayitsenga lensimi e-Anathothi kulomzala wami, Hanameli, ngase ngimkalela isiliva lengemagremu langema-200, ngamnika. 10Lencwadzi yesivumelwane ngayisayina, ngayivala ngeluphawu, ngafakazelwa, ngase ngikala lesiliva etikalini. 11Ngatsatsa lencwadzi yekutsenga, incwadzi leyayivalwe ngeluphawu inayo yonkhe iminantiso nemininingwane yekutsenga kanye nencwadzi leyayingakangcivitwa. 12Ngakunika Bharuki, umsa waNeriya, umsa waMahaseya, embikwemzala wami Hanameli nabofakazi lababesayine lencwadzi, nasembikwawo onkhe emaJuda labehleti esibuyeni sabogadzi.
13“Embikwabo nganika Bharuki nansi imiyalo, ngatsi: 14‘Naku lokushiwo nguSimakadze Nkulunkulu wema-Israyeli, utsi: Tsatsa letincwadzi tesivumelwane totimbili, lena lengcivitiwe nalengakangcivitwa, lekungemakhophi alencwadzi yekutsenga, utifake ejekeni lelibumba, khona titewuhlala sikhatsi lesidze. 15Ngobe naku lokushiwo nguSimakadze longuSomandla, Nkulunkulu wema-Israyeli, utsi: Tindlu, nemasimi kanye netivini kuyawuphindze kutsengwe kulelive.’ ”
Umthandazo waJeremiya
16“Emvakwekutsi lencwadzisivumelwane yekutsenga sengiyinike Bharuki, umsa waNeriya, ngathandaza kuSimakadze, ngatsi:
17“Awu, Nkhosi Simakadze, wena wenta emazulu nemhlaba ngemandla akho lamakhulu nangengalo yakho leyelulekile. Kute lokulukhuni kakhulu kuwe. 18Ubaphatsa ngelutsandvo labatinkhulungwane, kodvwa wehlisele sijeziso ngetono taboyise ematsangeni ebantfwababo emvakwabo. Awu Nkulunkulu, wena lomkhulu nalonemandla, lolibito lakhe kunguSimakadze longuSomandla, 19imigomo yakho mikhulu, yebo, nemisebenti yakho inemandla. Emehlo akho avulekile kuto tonkhe tindlela tebantfu; ngulowo nalowo umnika umvuzo wakhe ngangekutiphatsa kwakhe nangalokufanele imisebenti yakhe. 20Wenta tibonakaliso letimangalisako netimanga eGibhithe, uchubeke nato kwaze kwaba ngulamuhla, lapha ka-Israyeli nakubo bonkhe bantfu bemhlaba, waze watfola ludvumo nekwatiwa lokusekwakho nanyalo. 21Wakhipha sive sakho ema-Israyeli eveni laseGibhithe ngetibonakaliso nangetimangaliso ngesandla sakho lesinemandla nangengalo yakho leyelulekile, nangekutfutfumelisa lokukhulu. 22Wabanika lelive lewawufunge kutsi utalinika bokhokho babo, live leligcwele luju lwetinyosi nelubisi. 23Beta kulo bafike bangena balidla lelive; kodvwa abazange bakulalele wena nome bawulandzele umtsetfo wakho. Abazange bakwente loko wawubayale ngako kutsi bakwente. Ngako wase wehlisela etikwabo yonkhe lenhlekelele.
24“Buka-ke kutsi takhiwe njani tindvundvuma tekuvimbetela lelidolobha lize litfunjwe. Ngenca yenkemba, nendlala kanye nesifo lesibulalanako lelidolobha selitawunikelwa etandleni temaBhabhulona lalihlaselako. Loko lowakusho sekwentekile, njengobe ubona nje. 25Nome lelidolobha selitawunikelwa kumaBhabhulona, kodvwa wena Nkhosi Simakadze, utsi kimi: ‘Tsenga lensimi ngesiliva, wente lesivumelwane saloko sibe nebufakazi.’ ”
26Livi laSimakadze lefika kuJeremiya, latsi: 27“Mine nginguSimakadze, Nkulunkulu wabo bonkhe bantfu. Kukhona yini lokungehlulako mine? 28Ngako-ke naku lokushiwo nguSimakadze, utsi: Lelidolobha sengitalinikela etandleni temaBhabhulona nakuNebukhadnezari, inkhosi yaseBhabhulona, labatalitfumba. 29LamaBhabhulona lahlasela lelidolobha atawungena alilumeke ngemlilo. Atalishisa alicedze, kanye naletindlu lapho kuhlala khona labantfu labangitfukutselisa ngekutfuncisa imphepho etikweluphahla kuBhali kanye nangekutfululela iminikelo yetinatfo kulabanye bonkulunkulu.
30“Bantfu baka-Israyeli nebakaJuda kute labakwentile ngaphandle kwekwenta lokubi embikwami, kusukela ebusheni babo. Yebo, sive saka-Israyeli kute lesikwentile ngaphandle kwekungicunula ngaloko labakwente ngetandla tabo, kusho Simakadze. 31Kusukela mhlazana lakhiwa kuze kube ngunyalo lelidolobha lingitfukutselise langicunula kangangekutsi kufanele ngilisuse embikwami. 32Bantfu baka-Israyeli nebakaJuda bangicunula ngabo bonkhe bubi lababentile: bona kanye nemakhosi abo, netindvuna tabo, nebaphristi babo, nebaphrofethi babo, nemadvodza akaJuda kanye nabo bonkhe baseJerusalema. 33Bangifulatsela bangete bangibuka, lite nome ngangibafundzisa njalonjalo, abazange balalele, futsi abazange bakunake nekukunaka kujezisa kwami. 34Bemisa tithico tabo letinengekako endlini leneLibito lami bayingcolisa. 35Bakhela Bhali tindzawo letiphakeme eSigodzini sakaBheni Hinomu bentela kutsi bente umhlatjelo ngemadvodzana nemadvodzakati abo kuMoloki, noko angizange sengibayale kutsi bakwente, futsi bengingazange sengikucabange nasengcondvweni yami kutsi bangayenta intfo lesinengiso kangaka ngaloko bonise sive sakaJuda.”
Setsembiso lesivusa litsemba
36“Lenikushoko ngalelidolobha nine kutsi: ‘Lelidolobha litawunikwa inkhosi yaseBhabhulona, ngenkemba, nangendlala kanye nangesifo lesibulalanako,’ kodvwa naku lokushiwo nguSimakadze Nkulunkulu wema-Israyeli, utsi: 37Ngempela ngiyakubabutsa kuwo onkhe emave, lapho ngangibasakatela khona ngekutfukutsela kwami lokukhulu nangelulaka lwami lolwesabekako. Ngiyawubabuyisela kuyo lendzawo, ngibente bahlale kuyo bavikelekile. 38Bayawuba bantfu bami, mine ngibe nguNkulunkulu wabo. 39Ngiyawubanika inhlitiyo yebunye nekwenta intfo yinye, khona batewuhlala bangesaba mine, loko kube lusito kubo nakubantfwababo emvakwabo. 40Ngiyakwenta nabo sivumelwane saphakadze: Ngingeke ngiyekele kwenta lokuhle kubo, nabo ngibafake umoya wekungesaba, khona bangeyiwuphindze bahlubuke kimi. 41Ngiyawujabula kubentela lokuhle, ngempela ngiyawubahlanyela kulelive ngayo yonkhe inhlitiyo yami nangawo wonkhe umphefumulo wami.
42“Naku lokushiwo nguSimakadze, utsi: Njengobe lesive ngisehlisele yonkhe lenhlekelele lenkhulu kangaka, kanjalo futsi ngiyawusinika konkhe kuphumelela kahle nekunotsa lengisetsembise kona. 43Emasimi ayawuphindze atsengwe abe manyenti kulendzawo lenisho ngayo nitsi: ‘Lendzawo ilihlane, ayinabantfu natilwane, ngobe seyinikelwe etandleni temaBhabhulona.’ 44Emasimi ayawutsengwa ngesiliva, netincwadzisivumelwane tekutsenga tiyawusayinwa, tivalwe ngeluphawu, tibuye tifakazelwe eveni lakaBhenjamini, nasemakhaya lakhelene neJerusalema, nasemadolobheni akaJuda, nasemadolobheni laseveni letintsaba nasemaceleni etintsaba ngasenshonalanga, nasemadolobheni aseNegevu, ngobe ngiyawutibuyisela kubo tibusiso tabo, kusho Simakadze.”
