Jeremiya 13

₁Naku lokwashiwo nguSimakadze kimi, watsi: “Hamba uyewutsenga libhande lelineni ulivunule elukhalweni lwakho, kodvwa lingawatsintsi emanti.” ₂Ngako ngavele ngatsenga libhande, njengobe Simakadze abeshito, ngabe sengilivunula elukhalweni.

₃Livi laSimakadze lase liyefika kimi kwesibili, latsi: ₄“Tsatsa lelibhande lolitsengile lolivunule elukhalweni lwakho uhambe nyalo uye eYufrathe, ufike ulifihle khona elufantfwini lwemadvwala.” ₅Ngako ngahamba ngafike ngalifihla eYufrathe, njengobe Simakadze abengitjelile. ₆Emvakwemalanga lamanyenti Simakadze wakhuluma kimi, watsi: “Hamba-ke manje uye eYufrathe, ufike utsatse lelibhande lengakutjela kutsi uyekulifihla khona.” ₇Ngako ngahamba ngaya eYufrathe, ngafike ngemba lelibhande ngalitsatsa kulendzawo lapho bengilifihle khona, kodvwa manje lase libhudluke kakhulu selingenamsebenti.

₈Livi laSimakadze lase liyefika kimi, latsi: ₉“Naku lokushiwo nguSimakadze, utsi: ‘Ngalokufananako ngitalibhidlita ligcabho lakaJuda kanye neligcabho lelikhulu laseJerusalema. ₁₀Labantfu lababi labalako kulalela emavi ami balandzele inkhani yetinhlitiyo tabo, balandzele labanye bonkulunkulu kutsi batewubasebentela babakhonte, bayawufanana nalelibhande, bangabi namsebenti walutfo ngalokuphelele! ₁₁Ngobe njengobe libhande livunulwa elukhalweni lwendvodza, kanjalo indlu yonkhe yaka-Israyeli kanye neyakaJuda ngitibophele kimi,’ kusho Simakadze, ‘kutsi babe sive sami lengitakwatiwa ngaso, ngibatjatwe ngaso ngidvunyiswe ngaso. Kodvwa abakangilaleli.’ ”

₁₂“Khuluma kubo utsi: ‘Naku lokushiwo nguSimakadze Nkulunkulu wema-Israyeli, utsi: Leso naleso sikhumbasikhwama kufanele sigcwaliswe ngeliwayini.’ Nabakhuluma kuwe, batsi: ‘Asati yini tsine kutsi leso naleso sikhumbasikhwama kufanele sigcwaliswe ngeliwayini?’ ₁₃ubobatjela, utsi: ‘Naku lokushiwo nguSimakadze, utsi: Bonkhe labahlala lapha eveni ngitawubagcwalisa ngekudzakwa, kanye nemakhosi lahlala esihlalweni sebukhosi saDavide, nebaphristi, nebaphrofethi, nabo bonkhe labahlala eJerusalema. ₁₄Ngitabashayanisa lomunye kulomunye, boyise nemadvodzana ngalokufananako, kusho Simakadze. Ngingeke ngisivumele sihe nome sihawu nome luvelo kutsi kungivimbele ngingababhubhisi.’ ”