Tikhulu 10

₁Emvakwekufa kwa-Abimeleki kwavela indvodza yelusendvo lwaka-Isakhari lekwakutsiwa nguThola, umsa waPhuwa, labetalwa nguDodo. Yawasindzisa ema-Israyeli. Abehlala eShamiri, eveni letintsaba kulaka-Efrayimu. ₂Nguye lowaba ngumholi wesive saka-Israyeli iminyaka lengema-23, wase uyafa, wangcwatjwa khona eShamiri.

₃Thola walandzelwa nguJayire wakaGileyadi, lowahola sive sema-Israyeli iminyaka lengema-22. ₄Abenemadvodzana langema-30 labegibela timbongolo letingema-30. Lamadvodzana abephetse emadolobha langema-30 akaGileyadi. Lamadolobha nalamuhla loku asabitwa ngekutsi yiHavothi Jayire. ₅Watsi kube afe Jayire, wangcwatjwa eKhamoni.

₆Baka-Israyeli baphindza benta lokubi emehlweni aSimakadze. Bakhonta boBhali, nabo-Ashtarothe, nabonkulunkulu base-Aramu, nabonkulunkulu baseSidoni, nabonkulunkulu baseMowabi, nabonkulunkulu bema-Amoni, nabonkulunkulu bemaFilisti. Baka-Israyeli bafulatsela Simakadze, bamyekela, bangabe basamkhonta, ₇ngako Simakadze wabatfukutselela. Wabaniketela etandleni temaFilisti netema-Amoni, ₈labancoba ngalowo mnyaka abacindzetela. Kwadzimate kwaphela iminyaka leli-18 solomane baka-Israyeli bacindzetelekile bonkhe, labebakhe ngasemphumalanga kweJordane, eveni lema-Amori, kulakaGileyadi. ₉Ema-Amoni nawo ewelela ngesheya kweJordane ayakulwa nebakaJuda, nebakaBhenjamini, nabo bonkhe bendlu yaka-Efrayimu. Sonkhe sive saka-Israyeli sasisebumatimeni lobukhulu. ₁₀Ngako sive saka-Israyeli sase siyakhala kuSimakadze, sitsi: “Sonile kuwe, safulatsela Nkulunkulu wetfu, sayawukhonta boBhali.”

₁₁Simakadze wabaphendvula watsi: “Ngesikhatsi baseGibhithe, nema-Amori, nema-Amoni, nemaFilisti, ₁₂nebaseSidoni, nema-Amaleki, nemaMayoni anicindzetela nakhala kimi, nicela lusito, angizange yini nginephule etandleni tabo? ₁₃Kodvwa nine nangifulatsela mine, nakhonta labanye bonkulunkulu; ngako-ke ngingeke ngiphindze nginisindzise. ₁₄Hambani niyewukhala kulabonkulunkulu lenabakhetsa. Akube ngabo labanisindzisako nase nisenhluphekweni.”

₁₅Kodvwa baka-Israyeli bachubeka bakhala kuSimakadze, batsi: “Sonile! Yenta lokutsandzako ngatsi, kodvwa nje mane usephule kwanyalo.” ₁₆Base bayabesusa bonkulunkulu betive lababesemkhatsini wabo, bakhonta Simakadze. Inhlitiyo yakhe yase iyatsintseka ngenca yekukhala kwesive sema-Israyeli.

₁₇Kwatsi ema-Amoni nakamenyetwa kutsi akahlome ayewumisa eGileyadi, baka-Israyeli nabo bahlangana bayawumisa eMispa. ₁₈Baholi besive sakaGileyadi bakhulumisana bodvwa, batsi: “Lowo loyawucala kucala agadle nakuhlaselwa ema-Amoni, nguye loyawuba ngumholi wabo bonkhe labahlala kulelive lakaGileyadi.”