Isaya 49

₁Lalelani kimi, nine tichingi,

vanini loku, nine tive letikhashane,

Simakadze wangibita ngisengakatalwa,

kusukela ekutalweni walibita libito lami.

₂Umlomo wami wawenta

waba njengenkemba leloliwe,

wangitfukusa emtfuntini wesandla sakhe;

wangenta ngaba ngumcibisholo lololongiwe,

wangivalela emgodleni wetikhali takhe.

₃Watsi kimi: “Wena uyinceku yami.

Israyeli nguloyo lengiyawukhombisa kuye

inkhatimulo yami.”

₄Kodvwa ngatsi: “Ngisebentele lite.

Titfukutfuku tami ngitijulukele lite,

ngisebentele emahhala.

Kodvwa lilungelo lami lisesandleni saSimakadze;

nemvuzo wami ukuNkulunkulu wami.”

₅Manje-ke utsi Simakadze,

lowo lowangibumba esiswini kutsi ngibe yinceku yakhe,

kuze ngitewubuyisela Jakobe kuye,

ngibutsele ema-Israyeli kuye,

ngobe ngihloniphekile emehlweni aSimakadze,

naNkulunkulu wami waba ngemandla ami,

₆utsi: “Kuyintfo lelula kakhulu kuwe

kuba yinceku yami kubuyisela tive takaJakobe,

nekubuyisa labo labasasele bema-Israyeli

lengitigcinele bona.

Ngitakwenta futsi ube kukhanya kubetive,

kuze utewumikisa insindziso yami

emikhawulweni yonkhe yemhlaba.”

₇Naku lokushiwo nguSimakadze,

uMhlengi, naLongcwele waka-Israyeli,

kuye lowake wedzelelwa wenyanywa sive,

kuyo inceku yebabusi, utsi:

“Emakhosi ayawukubona asukume,

tikhulu tiyawukubona tikhotsame,

ngenca yaSimakadze lowetsembekile,

Longcwele waka-Israyeli, lokukhetsile.”

“Ngiyawukuphendvula ngesikhatsi sami lengisitsandzako,

nangelilanga lensindziso ngiyawukusita.

Ngiyawukugcina, ngikwente ube sivumelwane sami nebantfu,

kuze kubuyiselwe live,

banikwe kabusha emafa labese acitsekile.

₉Utawutsi kulabatfunjiwe: ‘Phumani!’

nakulabo labasebumnyameni: ‘Khululekani!’

“Bayawudlela eceleni kwemigwaco,

batfole emadlelo kuto tonkhe

tintsatjana letigagadzekile.

₁₀Abaseyikulamba, abaseyikoma;

nekushisa kwaselugwadvule

nekwelilanga akuseyikubashaya.

Lowo lonesihawu nabo uyakubahola,

abahambise ngasemitfonjeni yemanti.

₁₁Ngiyawugucula tonkhe tintsaba tami

tibe ngimigwaco,

nemigwaco yami lemikhulu iyawuphakanyiswa.

₁₂Buka la: Bayawuchamuka khashane,

labanye enyakatfo,

labanye enshonalanga,

labanye etigodzini taseSinimu.”

₁₃Memetani ngenjabulo, mazulu!

Tsakasa, nawe mhlaba!

Klabalazani nihlabele, nani tintsaba!

Ngobe Simakadze uyabadvudvuta bantfu bakhe,

futsi uyawuba nesihawu

kulabo labadzabukisiwe bakhe.

₁₄Kodvwa iSiyoni yatsi:

“Simakadze ungifulatsele,

Simakadze ungikhohliwe.”

₁₅“Umfati angalukhohlwa yini luswane

lolusesebeleni lakhe

nekutsi abete sihawu

kumntfwana lamtalako?

Nome angakhohlwa,

kodvwa mine ngingeke ngikukhohlwe wena.

₁₆Buka la;

ngikucophe entsendzeni yetandla tami;

tibondza takho tisembikwami njalo.

₁₇Bantfwabakho bancandzeka ngekushesha,

nalabo labakwenta lite

nalabalwa nawe bayawukubalekela.

₁₈Phakamisa emehlo akho ucalate,

bonkhe bantfwana bakho bayabutsana,

babuyele kuwe.”

Simakadze utsi:

“Ngifunga kuphila kwami,

impela uyakubembatsa bonkhe

njengemhlobiso wemvunulo, uyakubagcoka njengamakoti.

₁₉“Naloku wawuhhihlitelwe phansi,

wasala ebaleni,

live lakho lasala lingasenamsebenti;

nyalo-ke sewutawuba mncane kakhulu

kubantfu bakho,

nalabo labake bakudla bayawuba khashane kakhulu.

₂₀Bantfwana labatelwe ngetikhatsi tekuhlupheka kwakho

bayawukhuluma uva, batsi:

‘Lendzawo seyincane kakhulu kitsi,

sinike indzawo lenkhulu yekuhlala.’

₂₁Uyawucabanga enhlitiyweni yakho utsi:

‘Ngubani lowangitalela laba,

njengobe ngangihluphekile ngiyinyumba,

ngangitfunjiwe futsi ngilahliwe?

Bakhuliswa ngubani kepha laba?

Ngasala ngingedvwa vo,

kodvwa laba nyalo, sebaphumaphi?’ ”

“Buka la; ngiyawuchweba betive,

ngiyawuphakamisa siboniso sami kubantfu.

Bayawuletsa emadvodzana akho bawagodle ngemikhono,

betfwele emadvodzakati akho emahlombe.

₂₃Emakhosi ayawuba bacizeli bakho,

nemakhosikati awo amunyise bantfwabakho.

Bayawuguca embikwakho,

buso babo bubheke phansi emhlabatsini,

bayawukhotsa lutfuli lwetinyawo takho ngelulwimi.

Uyawube sewuyati-ke lapho

kutsi mine nginguSimakadze.

Labo labetsembela kimi bangeke bajabhiswe.”

₂₄Emabutfo angemukwa yini imphango

nome tigcili letitfunjiwe tisindziswe kulabanelunya?

“Yebo, emabutfo ayakwemukwa labatfunjiwe,

nalabanelunya bemukwe imphango.

Kodvwa ngiyakulwa nalabo labalwa nawe,

ngibasindzise bantfwabakho.

₂₆Bacindzeteli bakho ngiyakubenta

badle inyama yemtimba wabo,

bayawudzakwa kunatsa ingati yabo

kube shangatsi bebanatsa liwayini.

Tive tonkhe-ke tiyawube setiyati

kutsi mine Simakadze nginguMsindzisi wakho,

uMhlengi wakho, longuSomandla waJakobe.”