Isaya 47

“Yehla, uhlale elutfulini,

wena Ndvodzakati yaseBhabhulona.

Hlala emhlabatsini,

ungasahlali esihlalweni sebukhosi,

Ndvodzakati yebaseBhabhulona.

Awusayikubitwa ngekutsi

ungulobutsakatsaka nalotsambile.

₂Tsatsa ematje ekusila, usile fulaha,

yembula liveyili lakho.

Phakamisa tidvwaba takho,

uhlubule imilente yakho,

wewele udzabule imifula.

₃Bungcunu bakho buyawubekeka ebaleni,

lihlazo lakho lembuleke.

Ngiyawuphindzisela,

futsi kute loyawusala.”

₄UMhlengi wetfu, Simakadze longuSomandla libito lakhe,

unguLongcwele waka-Israyeli.

₅“Hlala uthule, ungene ebumnyameni,

Ndvodzakati yemaBhabhulona,

awusayikuphindza ubitwe ngekutsi

Ndlovukazi yemibuso.

₆Ngangisitfukutselele sive sami,

ngalilahla lifa lami,

ngabanikela esandleni sakho,

nawe awuzange ubahawukele ngemusa;

ngisho nalasebagugile,

wabagaca ngelijoko lelimatima.

₇Watsi wena:

‘Ngiyawuchubeka ngibe yindlovukazi kokuphela,’

kodvwa awuzange uticaphele letintfo

nome sewubone loko lokungahle kwenteke.

₈“Nyalo-ke, lalela, wena mtsandzi wekukhibika,

wena lotibusa ngekuvikeleka kwakho,

ucabange utsi: ‘Ngimi ngimi, futsi kute lomunye.

Ngingeke ngize ngibe ngumfelokati,

nome ngive kufelwa bantfwana.’

₉Kokubili-ke loko kuyawukukhandza

ngesikhashana nje, ngalanga linye,

kufelwa bantfwana nebufelokati.

Kuyawukufikela ngemandla lamakhulu,

ngetulu kwebunyenti bekutsakatsa kwakho,

nasemkhatsini webunyenti bemalumbo akho.

₁₀Wetsembele ebubini bakho, watsi:

‘Kute namunye longibonako.’

Kuhlakanipha nekwati kwakho kuyakonisa,

nawuticabanga utsi: ‘Ngimi ngimi,

kute lomunye ngaphandle kwami.’

₁₁Sehlakalo siyawukufikela,

futsi awuyikwati kutsi uyawusicosha kanjani.

Incitsakalo iyakwehlela etikwakho,

ungakwati kuphunyula kuyo ngisho nangenhlawulo.

Inhlekelele longasoze wayibona iseta,

iyakwehlela kuwe ngekushesha.

₁₂“Chubeka-ke manje nalamaloyo akho,

nebunyenti bekutsakatsa kwakho,

lowakushikashikela kusukela ebuntfwaneni;

mhlawumbe uyawuphumelela,

encenye utibangele kwesaba titsa takho.

₁₃Tonkhe teluleko lotitfolile temacebo setikugugisile.

Abavele ebaleni phela lababhuli bakho,

labo labahlola tinkhanyeti,

bese bayakutjela inyanga ngenyanga

kutsi utakwehlelwa yini,

abakusindzise kuloko lokutakwehlela.

₁₄Empeleni banjengemabibi etinhlanga

layakusha onkhe ngemlilo,

bangeke batisindzise kwabona kulamandla elilangabi.

Lapha kute emalahle ekufutfumeta umuntfu,

kute nemlilo longawotsa.

₁₅Nguloko nje kuphela labangakwentela kona,

labo lebewushikashikeka nabo,

solomane uhambisene nabo

kusukela ebuntfwaneni.

Ngulowo nalowo atichubekela ngekwakakhe kona;

kute namunye longakusindzisa.”