Isaya 44

₁“Kodvwa lalela, wena Jakobe, nceku yami,

Israyeli, wena lengikukhetsile.

₂Naku lokushiwo nguSimakadze,

lowo lowakwenta,

wakubumba esiswini,

nalonguyena atakukusita, utsi:

Ungesabi, wena Jakobe, nceku yami,

Jeshuruni, lengimkhetsile.

₃Ngobe ngiyawutfululela emanti eveni lelomile,

nemifula emhlabatsini lowomile;

ngiyawutfululela Moya wami kubantfwana bakho,

nesibusiso sami etitukulwaneni takho.

₄Bayawuhluma njengetjani emadlelweni,

nanjengemabhabhabhulomu ngasemfuleni logeletako.

₅Lomunye uyawutsi: ‘Mine ngiwaSimakadze;’

lomunye utatibita ngelibito laJakobe;

nalomunye uyawubhala esandleni sakhe, atsi:

‘NgiwaSimakadze,’

atsatse libito la-Israyeli.”

₆“Naku-ke lokushiwo nguSimakadze,

iNkhosi neMkhululi wema-Israyeli,

Simakadze longuSomandla, utsi:

Mine ngiwekucala newekugcina;

ngaphandle kwami kute Nkulunkulu.

₇Ngubani-ke lofanana nami?

Lowo akakumemetele.

Akakumemetele, akubeke embikwami,

loko lokwentekile

kusukela ngasungula sive sami sakadzenidzeni,

naloko lokuseta,

yebo, akasho kucala phela kutsi kutakwentekani.

₈Ningatfutfumeli, ningesabi.

Angizange ngikumemetele yini loku,

ngakhuluma ngako kungakenteki kadzeni?

Nine nibofakazi bami.

Kukhona yini lomunye Nkulunkulu ngaphandle kwami?

Cha, kute lelinye Lidvwala,

kute nalinye lengilatiko.”

₉Bonkhe labenta tithico balite,

naletintfo letiligugu kangaka kubo tilite.

Labo lababetikhulumela batimphumphutse,

futsi abati lutfo, lokulihlazo kubo.

₁₀Ngubani lobumba sithico, asente asilolonge kahle,

lesingeke simbuyisele lutfo?

₁₁Yena nalahambisana nabo bayawuhlaziswa;

tingcweti kutekubumba atisilo lutfo,

kodvwa tibantfu nje.

Ababutsane ndzawonye bonkhe,

beme kuloko labasime kuko;

bayawehliselwa ekwesabekeni

kwelihlazo lalokubi.

₁₂Umfuli utsatsa lithulusi

asebente ngalo emalahleni;

abumbe sithico ngetandvo,

akubetsele ngemandla akhe onkhe.

Uyalamba, aphelelwe ngemandla;

anganatsi ngisho emanti,

bese uyoma aze acaleke.

₁₃Umbati ulinganisa ngentsambo,

ente luhlaka ngelutsi lwekubhala;

akucandvule ngemashizolo,

abekise ngemakhampasi.

Ukubumba kube nesimo semuntfu,

kufanane nemuntfu ngebunjalo bakhe bonkhe,

entele kutsi kutewuhlaliswa endlini yetithico.

₁₄Ugawula imisedari,

mhlawumbe atsatse umsayipuresi nome um-okhi.

Uyakuyekela kukhule emkhatsini wetihlahla telihlatsi,

nome ahlanyele sipheshula,

imvula bese iyakukhulisa.

₁₅Umuntfu ukusebentisa ekubaseni umlilo;

lokunye kwako akutsatse atifutfumete ngako,

ubasa umlilo apheke sinkhwa.

Kodvwa uphindze abate nkulunkulu wakhe,

bese uyamkhonta;

wenta sithico, bese ukhotsama kuso.

₁₆Incenye yaleso sigodvo usibasa emlilweni,

alungise kudla kwakhe kulowo mlilo;

wosa inyama yakhe kuwo, ayidle, esutse.

Uphindze otse kuwo, atsi:

“Inhhi! Sengifutfumele;

ngibona umlilo.”

₁₇Kulesigodvo lesisele ubata nkulunkulu,

lekusithico sakhe, akhotsame kuso, asikhonte.

Uthandaza kuso atsi:

“Ngisindzise; wena ungunkulunkulu wami.”

₁₈Abati lutfo, abacondzi lutfo;

emehlo abo abhadziwe,

kuze bangetiwubona,

netingcondvo tabo tivaliwe,

khona bangetiwucondzisisa.

₁₉Kute loke eme, acabangisise.

Kute namunye lonelwati; kute nalonekucondza lotsi:

“Incenye yalolukhuni ngiyibasile,

ngidzimate ngapheka nesinkhwa kulamalahle alo,

ngose inyama, ngayidla.

Pho, ngingayenta yini intfo lesinengiso

ngalolukhuni lolusele?

Ngingasikhotsamela yini lesizemuzemu selugodvo?”

₂₀Utondla ngemlotsa, edukiswe yinhlitiyo lekhohlisiwe;

angeke atisindzise nome atsi:

“Lentfo lesesandleni sami sangesekudla

ayisiwo yini emanga?”

₂₁“Khumbula letintfo, wena Jakobe,

ngobe uyinceku yami, wena Israyeli.

Ngikwentile, wena uyinceku yami,

ngingeke ngikukhohlwe, wena Israyeli.

₂₂Tikhubekiso takho ngitishanyele njengelifu.

netono takho njengenkhungu yasekuseni.

Buyela kimi, ngobe sengikuhlengile.”

₂₃Hlabelani ngekujabula, nine mazulu,

ngobe loku kwentiwe nguSimakadze;

memetani kakhulu, nine tindzawo temhlaba letijulile.

Hlokomani ngengoma, nine tintsaba,

nine mahlatsi, nato tonkhe tihlahla tenu.

ngobe Simakadze sewuhlenge Jakobe,

ubonakalisa bukhosi bakhe ka-Israyeli.

₂₄“Naku lokushiwo nguSimakadze,

uMhlengi wakho,

lowakubumba esiswini, utsi:

NginguSimakadze, lowente tonkhe tintfo,

yena yedvwa loweneke emazulu,

lowendlala umhlaba ayedvwana,

₂₅lophuntisa tibonakaliso tebaphrofethi bemanga,

labaphengulako abente tilima,

acitse kufundza kwalabahlakaniphile,

akugucule akwente kube ngumbhedvo.

₂₆Ngimi lofeza emavi etinceku takhe,

aphumelelise tiphrofetho tetitfunywa takhe,

lotsi ngeJerusalema: ‘Itawuhlalwa bantfu,’

nangemadolobha akaJuda atsi: ‘Atakwakhiwa,’

nangetindzala tawo atsi: ‘Ngitativusetela.’

₂₇Ngimi lokhuluma nekujula kwemanti atsi:

‘Yoma, ngitakomisa imifudlana yakho.’

₂₈Ngimi futsi lokhuluma ngaKhuresi atsi: ‘Ungumelusi wami,

uyawukwenta konkhe loko lengikutsandzako;

uyawukhuluma ngeJerusalema, atsi: “Ayakhiwe kabusha,”

nangelithempeli atsi: “Akwakhiwe tisekelo talo.” ’ ”