Isaya 35

₁Lihlane nelive lelihamukile kuyawujabula,

lugwadvule luyawujabula luchakaze timbali.

₂Njengembali luyawuchakaza lube lusha;

luyawutfokota kakhulu,

lumemete ngenjabulo.

Ludvumo lweLebanoni luyawunikwa lona,

yebo, luyawunikwa ludvumo lweKhameli nelweSharoni;

bantfu bayawubona bukhosi baSimakadze,

nebukhatikhati baNkulunkulu wetfu.

₃Cinisani tandla letibutsakatsaka,

nikhutsate emadvolo lacekako.

₄Khulumani kulabanetinhlitiyo letesabako nitsi:

“Cinani, ningesabi,

Nkulunkulu wenu uyeta,

uyawufika nekuphindzisela nekujezisa kwakhe,

utawufika atenisindzisa.”

₅Emehlo etimphumphutse ayawuvuleka,

netindlebe tetihhulu tiyawuva.

₆Labachutako bayawusuka emagonso njengenyamatane,

nelulwimi lwesimungulu luyawumemeta ngenjabulo.

Emanti ayawugeleta ehlane,

kube nemifudlana elugwadvule.

₇Sihlabatsi lesishisako siyawuba sitiba,

umhlabatsi lowomile uphetfuke tiyalu.

Nalapho kwake kwahlala timphungutja khona,

kuyawumila tjani nemhlanga,

kanye nemhlanga iphaphira.

₈Kuyawuba khona umgwaco lomkhulu lapho,

uyawubitwa ngekutsi Yindlela Yebungcwele.

Labangcolile ngeke bahambe ngawo,

uyakuba walabo labahamba ngawo lomgwaco,

tilima letikhohlakele ngeke tihambahambe ngawo.

₉Kuyawubate libhubesi lapho,

kute ngisho nesilwane lesinelulaka,

lesiyawutfolakala kuwo.

Kodvwa ngulabahlengiwe bodvwa

labayawuhamba kulowo mgwaco,

₁₀labahlengiwe baSimakadze bayawubuya.

Bayawungena eSiyoni ngekuhlabela,

nangekujabula kwaphakadze

lokuyawuba ngumchele etinhloko tabo.

Bayawuhamba ngekutfokota nangekujabula,

lusizi nekububula kuyawubaleka.