Isaya 32

₁Buka la, inkhosi iyawubusa ngekulunga,

nebabusi bayawubusa ngekwemtsetfocotfo.

₂Ngulowo nalowo wabo uyawufanana nesiphephelo emoyeni,

abe ngumkhoselisi kuso sivunguvungu,

abe njengemifula yemanti ehlane,

afanane nelitfunti lelidvwala lelikhulu

eveni lelomele emanti.

₃Emehlo alabo lababonako angeke asavaleka,

netindlebe talabo labevako setiyawulalela.

₄Ingcondvo yalabanematata

iyawukwati ibuye icondze,

nelulwimi lolungingitako luyawusheshisa

kukhuluma kahle nangalokuvakalako.

₅Silima singeke siphindze

sibitwe ngekutsi ngumhlonishwa,

yebo, nasidlani angeke ahlonishwe kakhulu.

₆Ngobe silima sikhuluma bulima,

ingcondvo yaso ishikaneka ngalokubi,

siphila ngekungamesabi Nkulunkulu,

sisakate emanga ngaSimakadze;

lolambile simshiya angenalutfo,

kutsi nalowomile singamniki emanti.

₇Emasu asidlani mabi,

wakha emacebo ebubi

ekubhubhisa labamphofu ngemanga,

ngisho nome sikhalo saloweswele sicotfo.

₈Kodvwa umuntfu locotfo wakha emasu lacotfo;

imisebenti yakhe lehloniphekile imente eme.

₉Nine bafati labakhibikile,

sukumani nilalele kimi,

nine madvodzakati lenitivela niphephile,

lalelani naku lengitakusho!

₁₀Ngesikhatsi nje lesingetudlwana kwemnyaka

nine lenitiva niphephile nitawutfutfumela;

sivuno semagelebisi siyawuba sibi,

kutawubate nesivuno setitselo.

₁₁Tfutfumelani, nine bafati labakhibikile;

yesabani, nine madvodzakati lenitivela niphephile!

Khumulani kwekwembatsa kwenu.

Vunulani emasaka etinkhalo tenu.

₁₂Yetfwalani tandla enhloko,

ngenca yemasimi lamahle,

nangenca yetitselo tenu letinhle temivini,

₁₃nangenca yelive lesive sami,

live lelene emanyeva netinchachabutane,

yebo, lilelani tonkhe tindlu tekutijabulisa

kanye nalelidolobha lekutijabulisa.

₁₄Inqaba iyawusala yodvwa,

lidolobha lemsindvo lisale likhala libhungane,

indlu leyinqaba kanye nembhoshongo

kuyawuba lihlane lelingenalutfo phakadze naphakadze,

kube kujabula kwetimbongolo nelidlelo lemihlambi,

₁₅aze Moya wasezulwini atfululelwe etikwetfu,

bese kutsi lihlane libe yinsimi levundzile,

nensimi levundzile ifanane nelihlatsi.

₁₆Umtsetfocotfo uyawuhlala ehlane,

kulunga kuhlale ensimini levundzile.

₁₇Sitselo sekulunga siyawuba kuthula nenhlalakahle,

umphumela wekulunga uyawuba kuphumula

nekulondvoloteka phakadze naphakadze.

₁₈Sive sami siyawuhlala etindzaweni tekuthula,

emakhaya laphephile,

etindzaweni tekuphumula letite lokuphatamisako.

₁₉Nome sangcotfo singalivitsita lihlatsi,

nelidolobha silibhidlite liphele nya,

₂₀maye, nine niyawubusiswa,

nihlanyele inhlanyelo yenu eceleni kwayo yonkhe imifula,

nikhulule tinkhabi tenu netimbongolo tenu,

tidle ngekutsandza.