Isaya 28

₁Maye kulowo mchele letitigabatisa ngawo

tidzakwa taka-Efrayimu,

nakuleyo mbali lebunako,

bukhatikhati bebuhle bakhe

lobumiswe enhloko yesigodzi lesivundzile;

maye kulelo dolobha, ligcabho lalabo

lasebalaliswa phansi liwayini!

₂Buka la, Simakadze unaye lonemandla nalocinile.

Njengesangcotfo nesivunguvungu lesibhubhisako,

nanjengemvula lekhukhulako, nesihhuhhula semanti,

uyakulisacata phansi emhlabatsini ngemandla lamakhulu.

₃Lowo mchele letitigabatisa ngawo

tidzakwa taka-Efrayimu,

uyawugcotjwagcotjwa phansi ngetinyawo.

₄Leyo mbali lebunako,

bukhatikhati bebuhle bakhe

lobumiswe enhloko yesigodzi lesivundzile,

iyawuba njengelikhiwa lelivutfwe kungakavunwa,

lekutsi lowo nje lolibone kucala

alikhe ngesandla sakhe,

alifake emlonyeni,

alimite masinyane.

₅Ngalelo langa Simakadze longuSomandla

uyawuba ngumchele webukhosi,

umchele lomuhle wensali yesive sakhe.

₆Uyawuba ngumoya wemtsetfocotfo

kulowo lohlalela kwehlulela,

abe sisusa semandla kulabo

labajikisa imphi esangweni.

₇Nabo labo bayayendza ngenca yeliwayini,

babhadzatele ngenca yetjwala,

baphristi nebaphrofethi

bayayendza ngenca yetjwala,

basangene ingcondvo ngenca yeliwayini,

badzayiteliswa tjwala,

bayayendza nababona imibono,

bayakhubatela nabakhipha tincumo.

₈Onkhe ematafula agcwele emahlante,

kute ngisho lesincane sikhadlana lesingakangcoli.

₉“Ngubani yena lona lowetama kumfundzisa,

uwuchazela bani wona lombiko wakhe?

Kubantfwana labesusiwe yini elubisini lwabo,

labo labavele balunyulwa nje emabeleni abonina?

₁₀Uyahhema utsi:

Savu lasavu, savu lasavu,

khavu lakhavu, khavu lakhavu,

ziyere shamu, ziyere shamu.”

₁₁Kulungile-ke, ngetindzebe temlomo wekuchamuka

nangetilimi letingatiwa

Nkulunkulu uyawukhuluma kulesive,

₁₂lakhuluma kuso watsi:

“Lena yindzawo yekuphumula,

labakhatsele abaphumule kuyo,”

nekutsi: “Lena yindzawo yekucambalala,”

kodvwa bangeke balalele.

₁₃Ngako-ke livi laSimakadze kubo liyawuba kutsi:

“Savu lasavu, savu lasavu,

khavu lakhavu, khavu lakhavu,

ziyere shamu, ziyere shamu,”

kuze batewuhamba baze bawe ngetiphundvu,

balimale babanjwe, bese bayatfunjwa.

₁₄Ngako-ke vanini livi laSimakadze,

nine tedzeleli lenibusa lesive eJerusalema.

₁₅Niyatigabatisa nitsi:

“Sesente sivumelwane nekufa,

sente sivumelwane nelithuna.

Ngesikhatsi sivunguvungu lesishisako

siphephula sendlula kitsi,

singeke sisitsintse tsine,

ngobe sente emanga aba siphephelo setfu,

sente emacebo aba yindzawo yetfu yekubhaca.”

“Buka la, ngibeka litje eSiyoni,

litje lelihloliwe,

litje leliligugu lekusimisa indlu,

lelisisekelo lesetsembekile sendlu;

lowo lowetsembele kimi ngeke ajabhe.

₁₇Ngitakwenta kwehlulela ngekwemtsetfocotfo

kube ngumugca wekulinganisa,

nekulunga kube ngumugca wekucondzisa,

sangcotfo siyawuhlwitsa

lesiphephelo senu lesingemanga,

nesikhukhula semanti siyakwemukisa

lendzawo yenu yekubhaca.

₁₈Sivumelwane senu lenisente nekufa

siyakwentiwa sibe lite;

sivumelwane senu lenisente nelithuna singeke sime.

Kuyawutsi sivunguvungu sekushisa

nasiphephula sendlula kini,

sinishaye sinilahle phansi.

₁₉Njalo nje nasifika nome nini,

siyakwendlula nani sinitfumbe

kusa ngekusa, busuku nemini.”

Kuvakala kwalomlayeto kuyawuletsa kwesaba

nekutfutfumela kuphela nje.

₂₀Umbhedze mfishane kakhulu kutsi ungenaba kuwo,

netingubo tingumntjuntju kakhulu

kutsi umuntfu angatishumphetela ngato.

₂₁Simakadze utawuvuka,

njengobe wake wenta eNtsabeni yasePherasimu,

lulaka lwakhe luyakumvuselela

njengaseSigodzini saseGibeyoni,

kutsi ente umsebenti wakhe,

yebo, umsebenti wakhe lomangalisako

kutsi aphelelisele umsebenti wakhe,

yebo, umsebenti wakhe longaketayeleki.

₂₂Nyalo-ke yekelani lokuphukuta kwenu,

nakungenjalo, tinketane tenu titakuba matima,

iNkhosi Simakadze lenguSomandla

ingitjelile ngembhubhiso leseyimiselwe live lonkhe.

₂₃Lalelani, nive livi lami;

linakekeleni, nive kutsi ngitsini.

₂₄Umlimi nakalima atawuhlanyela,

uyaye alibale kulima yini?

Vele, ulibala kugucula yini

ahhalige umhlaba wakhe?

₂₅Nase awulime kahle umhlabatsi wakhe

wawuhlanganisa waba kahle,

uyaye angabe asayihlanyela yini

inhlanyelo yakhe yetinandzisi,

asakate nekhumini yakhe?

Akahlanyeli kolo yini endzaweni yakhe,

nebhali ensimini yayo,

nemabele ensimini yawo?

₂₆Nkulunkulu wakhe uyamtjela

amfundzise indlela lelungile.

₂₇Ikhumini ayibhulwa ngesihliphi,

kanjalo nekhumini lemnyama

ayibhulwa ngekuhambisa inkalishi etikwayo;

kodvwa ikhumini ibhulwa ngesibhulo,

kutsi ikhumini lemnyama ibhulwe ngendvuku.

₂₈Lokutinhlavu kufanele kusilwe kutekwentiwa sinkhwa;

ngako-ke akulitjalwa kukubhula siphelane.

Nome achuba emasondvo

enkalishi yakhe yekubhula etikwako,

emahhashi akhe akakusili.

₂₉Konkhe loku kuphuma kuSimakadze longuSomandla,

lomangalisako ekwelulekeni kwakhe,

nalobabatekako ngenhlakanipho yakhe.