Isaya 26

“Sinelidolobha lelicinile;

Nkulunkulu usentela insindziso

ngetibondza talo netinqaba talo.”

₂Vulani emasango, kuze sitewungena sive lesilungile,

sive lesigcina kukholwa.

₃Wena Simakadze, lowo lotimiselako ngawe uyamlondvolota,

umuphe kuthula nenhlalakahle,

ngobe abeke litsemba lakhe kuwe.

₄Yetsembelani kuSimakadze kuze kube phakadze,

ngobe Simakadze nguSimakadze loLidvwala laphakadze.

₅Uyabatfobisa labo labahlala ekuphakameni,

ulalisa phansi lidolobha leliphakeme,

alente lilingane nemhlabatsi,

alilahle phansi elutfulini.

₆Ulenta linyatselwe phansi ngetinyawo,

yebo, ngetinyawo talabacindzetelwe,

ngetinyatselo talabamphofu.

₇Indlela yalolungile ibekile.

Awu, wena Locondzile,

wenta indlela yalolungile icondze.

₈Yebo, Simakadze, sihamba endleleni

yemitsetfo yakho, silindzela wena;

Libito lakho neludvumo lwakho

ngutona tifiso tetinhlitiyo tetfu.

₉Umphefumulo wami ulangatelela wena ebusuku;

ekuseni umoya wami ulangatelela wena.

Ngesikhatsi tehlulelo takho tehlela etikwemhlaba,

tive temhlaba tifundza kulunga.

₁₀Naloku umusa sewuphiwe lababi,

bona solo abakufundzi kulunga;

ngisho naseveni lebucotfo bachubeka benta lokubi,

bangabunaki bukhosi baSimakadze.

₁₁Simakadze, sandla sakho siphakamele etulu,

kodvwa noko abasiboni.

Bente babone inshisekelo yakho ngesive sakho,

batewudliwa ngemahloni.

Akutsi umlilo lowugcinele titsa takho

udle bona ubacedze.

₁₂Simakadze, wena usentela kuthula,

konkhe loku lesiphumelele kukwenta,

sikwentelwe nguwe.

₁₃Awu, Simakadze, Nkulunkulu wetfu,

lamanye emakhosi langasiye wena

abusile etikwetfu;

kodvwa Libito lakho,

ngilo lodvwa lesilihloniphako.

₁₄Nyalo asafile lawo makhosi,

akasaphili,

lowo moya wawo lowanyamalala

awube usaphindza uvuke.

Wawajezisa wawabhubhisa,

wesula konkhe kukhunjulwa kwawo.

₁₅Simakadze, usikhulisile sive,

yebo, wena usandzisile sive.

Utizuzele wena ludvumo.

Uyinwebile yonkhe iminyele yelive.

₁₆Simakadze, beta kuwe ekudzabukeni kwabo,

ngesikhatsi ubajezisa babehluleka

ngisho nekuhebeta umkhuleko.

₁₇Njengemfati lokhulelwe nasatawubeleka,

uyajilajileka, akhale ngenca yemihelo,

natsi sasinjalo ebukhoneni bakho,

awu, Simakadze!

₁₈Sasikhulelwe, sajilajileka ngetinhlungu,

kodvwa sesuka satala umoya.

Asikayiletsi insindziso emhlabeni;

asikatitali tive letisemhlabeni.

₁₉Kodvwa labafile bakho bayawuphila;

imitimba yabo iyawuvuka.

Nine lenihleti elutfulini lwemhlaba,

vukani nimemete ngenjabulo.

Ematolo akho anjengematolo asekuseni laphilisako,

umhlaba uyawubakhipha labafile bawo.

₂₀Balekani, sive sami,

ngenani etindlini tenu,

nitivalele ngekhatsi.

Tifihleni ngekhatsi kwesikhashana,

kuze kwendlule lulaka lwakhe.

₂₁Bukani, Simakadze uphumela ngephandle

kwendzawo yakhe yekuhlala,

utewujezisa tive temhlaba ngenca yetono tato.

Umhlaba utawuveta ebaleni

yonkhe ingati leyacitsekela kuwo,

lababulewe kuwo ungeke usabafihla.