Isaya 17

“Buka la,

iDamaseko ingeke isaba lidolobha,

kodvwa seyitawuba yindvundvuma nje yetindzala.

₂Emadolobha ase-Siriya atawushiywa

abe ngemadlelo emihlambi yetimvu netimbuti,

lapho iyawulala khona sekute nalotayesabisa.

₃Lidolobha leliyinqaba

liyawunyamalala kulaka-Efrayimu,

kuphele nebukhosi bendlunkhulu yaseDamaseko.

Insali yaseSiriya iyawuba

njengebukhosi baka-Israyeli,”

kusho Simakadze longuSomandla.

₄“Ngalelo langa

bukhosi bakaJakobe buyawunyamalala;

nemitsebe lebhubuka emtimbeni wakhe

iyawuhusheka iphele.

₅Kuyawuba njengemvuni nakageca tinhlanga letimile,

avuna tibhuluja ngetandla takhe,

kube njengemuntfu lobutsa lokuwa nakavunako

eSigodzini semaRefa.

₆Noko letinye tibhuluja tiyawusala,

njenganakuphundlwa sihlahla semncumo,

bese kusala titselo temncumo

letibili nome letitsatfu

emagaleni lasetulu esicongweni sesihlahla,

kusale lamane nome lasihlanu

emagaleni latsele kakhulu,”

kusho Simakadze longuNkulunkulu wema-Israyeli.

₇Ngalelo langa bantfu bayawubuka kuMdali wabo,

bajikise emehlo abo bawabhekise

kuye Longcwele waka-Israyeli.

₈Bangeke basabuka emalatini,

lekungimisebenti yetandla tabo,

futsi bangeke basatihlupha

ngekunaka tinsika ta-Ashera

nemalati emphepho labentiwa ngimino yabo.

₁₀Umkhohliwe Nkulunkulu uMsindzisi wakho;

awukalikhumbuli lidvwala lelisiphephelo sakho.

Ngako-ke nome ungahlanyelela tithico takho

titfombo letinhle kakhulu,

uhlanyele tivini letiphuma kulamanye emave,

₁₁nome ngalelo langa lotihlanyela ngalo

uvele utente tikhule,

kutsi ekuseni nawutihlanyela utente tihlume,

noko sivuno sato siyawufanana nelite

ngelilanga lesifo neletinhlungu letingelapheki.

₁₂Awu, ngekuhlokoma kwetive letinyenti,

tihlokoma njengekuhlokoma kwelwandle!

Awu, kuhokoma kwemsindvo webetive,

tihokoma njengekuhlokoma kwemanti lamanyenti!

₁₃Naloku tive tihokoma

njengekuhokoma kwemabhudlo emanti,

Nkulunkulu nakabatsetsisa, babaleka baye khashane,

bapheshulwe emoyeni njengemakhoba,

nakaphephuka etulu emagcumeni,

nanjengelukhula loluzushuniwe,

nalukhukhulwa sihhuhhula semoya.

₁₄Kutsi kungahlwa, bahlanyele budlova!

Kutsi kusa, babe bangasekho!

Lesi sabelo salabo labaphanga tsine,

likoyi lalabo labasiphangako.