Hoseya 13

₁Abetsi Efrayimu nakakhuluma,

kutfutfumele emadvodza;

abephakanyisiwe ka-Israyeli.

Kodvwa waba nelicala lekukhonta Bhali, wafa.

₂Manje bachubeka nako kona;

batentela tithico ngesiliva yabo,

titfombe letakhiwe ngekuhlakanipha lokukhulu.

Konkhe kungumsebenti wencondzi yetekubata.

“Benta imihlatjelo ngebantfu

bange letithico letimise kwematfole.”

₃Ngako-ke bayawufanana nenkhungu yasekuseni,

babe njengematolo asekuseni lanyamalalako,

bafanane nemakhoba laphephuka ebaleni lekubhula,

babe njengentfutfu lephuma ngelifasitelo ibaleke.

₄“Kodvwa mine nginguSimakadze longuNkulunkulu wakho,

lowakukhipha eGibhithe.

Animati lomunye Nkulunkulu ngaphandle kwami;

kute uMsindzisi ngaphandle kwami.

₅Ngakunakekela usesehlane,

eveni lelinekushisa lokuvutsako.

₆Ngatsi nangibondla emadlelweni lamahle, besutsa;

batsi kube besutse, base bayatigabatisa,

base bayangikhohlwa.

₇Ngako ngiyakuta kubo senginjengelibhubesi,

njengengwe ngiyawubalalela endleleni.

₈Njengelibhele nalemukwe bantfwabalo,

ngiyawubesukela ngibadladlabule.

Njengelibhubesi ngiyawubashwabudzela,

silwane sesiganga siyawubadzabudzabula.

₉“Awu, Israyeli, ngiyawukubhubhisa ngobe umelene nami,

uphambene nemsiti wakho.

₁₀Iphi inkhosi yakho,

kuze itewukusindzisa?

Tiphi tikhulu takho kuwo onkhe lamadolobha akho

lowakhuluma ngato, watsi:

‘Nginike inkhosi netikhulu’?

₁₁Ngako ngekutfukutsela kwami nganinika inkhosi,

nangelulaka lwami ngaphindze ngayisusa.

₁₂Licala la-Efrayimu lilondvolotiwe,

tono takhe tibhalwe phansi.

₁₃Imihelo yemfati nasatawubeleka iyamfikela,

kodvwa ungumntfwana lote kuhlakanipha;

kutsi nakufika sikhatsi sakhe,

angete eta ngasemnyango wesibeletfo.

₁₄“Ngiyawubahlawulela yini emandleni elithuna

ngibahlenge ekufeni?

Ye Kufa, tiphi tifo takho letibulalanako?

Ye Thuna, kuphi kubhubhisa kwakho?

“Ngiyawubate sihawu.

₁₅Ngisho nome angahluma njengembali emkhatsini wetinhlanga,

umoya waSimakadze, wangasemphumalanga, uyakuta,

uhhusha uchamuka ngasehlane,

umtfombo waka-Efrayimu uyawuphelelwa ngemanti,

nesicobho sakhe some.

Likamelo lakhe lekulondvolota liyawuphangwa

tonkhe tintfo talo letingemagugu.

₁₆Bantfu baseSamariya

kufanele batitfwalele licala labo,

ngobe bamhlubukile Nkulunkulu wabo.

Bayawubulawa ngenkemba;

tinswane tabo tiyawusacatwa phansi emhlabatsini,

labakhulelwe babo bahhujutwe tisu.”