Genesisi 5

₁Lona ngumlandvo wentalelwane ya-Adamu. Nkulunkulu nakadala umuntfu, wamenta waba ngumfanekiso waNkulunkulu. ₂Wabadala lomdvuna nalomsikati, wababusisa, wabanika libito mhlazana abadala watsi bantfu. ₃Kwatsi Adamu asaneminyaka leli-130, watala indvodzana leyamfuta, yafanana naye; wayetsa libito watsi nguSethi. ₄Emalanga a-Adamu emvakwekutalwa kwaSethi aba ngiminyaka lengema-800, asatele emadvodzana nemadvodzakati. ₅Adamu wafa asaneminyaka lengema-930.

₆Kwatsi Sethi nasaneminyaka leli-105, watala Enoshi. ₇Emvakwekutalwa kwa-Enoshi Sethi waphila iminyaka lengema-807, asatele emadvodzana nemadvodzakati. ₈Sethi wafa asaneminyaka lengema-912.

₉Kwatsi Enoshi nasaneminyaka lengema-90, watala Khenani. ₁₀Emvakwekutalwa kwaKhenani Enoshi waphila iminyaka lengema-815, asatele emadvodzana nemadvodzakati. ₁₁Enoshi wafa asaneminyaka lengema-905.

₁₂Kwatsi Khenani nasaneminyaka lengema-70, watala indvodzana lekwakunguMahalaleli. ₁₃Emvakwekutalwa kwaMahalaleli, Khenani waphila iminyaka lengema-840, asatele emadvodzana nemadvodzakati. ₁₄Khenani wafa asaneminyaka lengema-910.

₁₅Kwatsi Mahalaleli nasaneminyaka lengema-65, watala Jaredi. ₁₆Emvakwekutalwa kwaJaredi, Mahalaleli waphila iminyaka lengema-830, asatele emadvodzana nemadvodzakati. ₁₇Mahalaleli wafa asaneminyaka lengema-895.

₁₈Kwatsi Jaredi nasaneminyaka leli-162, watala Enoki. ₁₉Emvakwekutalwa kwa-Enoki, Jaredi waphila iminyaka lengema-800, asatele emadvodzana nemadvodzakati. ₂₀Jaredi wafa asaneminyaka lengema-962.

₂₁Kwatsi Enoki nasaneminyaka lengema-65, watala Methusela. ₂₂Emvakwaloko Enoki wahamba anebudlelwane naNkulunkulu iminyaka lengema-300, watala emadvodzana nemadvodzakati. ₂₃Enoki waphila iminyaka lengema-365. ₂₄Enoki abehamba naNkulunkulu, wase uyanyamalala ngobe Nkulunkulu abesamtsatsile.

₂₅Kwatsi Methusela nasaneminyaka leli-187, watala Lameki. ₂₆Emvakwekutalwa kwaLameki, Methusela waphila iminyaka lengema-782, asatele emadvodzana nemadvodzakati. ₂₇Methusela wafa asaneminyaka lengema-969.

₂₈Lameki nasaneminyaka leli-182, watala indvodzana. ₂₉Lendvodzana wayetsa libito, watsi nguNowa, atsi: “Lona-ke nguye lotasidvudvuta emsebentini wetfu nasekukhatsatekeni kwetfu kuwo lomhlabatsi lowacalekiswa nguSimakadze.” ₃₀Emvakwekutalwa kwaNowa, Lameki waphila iminyaka lengema-595, asatele emadvodzana nemadvodzakati. ₃₁Lameki wafa asaneminyaka lengema-777.

₃₂Nowa wakhula waba neminyaka lengema-500 budzala, watala emadvodzana lamatsatfu: BoShemi, naHhamu, naJafethi.