Hezekeli 40

₁Kwatsi ngemnyaka wema-25 sitfunjiwe, ekucaleni nje kwemnyaka, tilishumi enyangeni, ngemnyaka weli-14 emvakwekuwa kweJerusalema, ngalona lelo langa nje sandla saSimakadze sasisetikwami, wangitsatsa wangiyisa khona. ₂Emibonweni yaNkulunkulu wangitsatsa wangiyisa eveni laka-Israyeli, wafike wangimisa entsabeni lephakeme kakhulu, lekwatsi ngaseningizimu kwayo kwakunetindlu letatibukeka shangatsi ngulelikhulu lidolobha. ₃Wangiyisa khona, ngafike ngabona indvodza leyayibukeka njengelitfusi; yayime esangweni inelucotfo lwelineni nendvuku yekulinganisa esandleni sayo.

₄Lendvodza yakhuluma kimi, yatsi: “Ndvodzana yemuntfu, buka ngemehlo akho uve ngetindlebe takho, ulalelisise konkhe lengitakukukhombisa kona, ngobe nguloko lokungukona ukuletselwe lapha. Tjela indlu yaka-Israyeli konkhe loku lokubonako.”

₅Ngabona lubondza lolutungelete yonkhe lendzawo yelithempeli. Budze balendvuku yekulinganisa leyayisesandleni salendvodza babungemamitha labengaba matsatfu, wakala lolubondza. Lwalungemamitha labengaba matsatfu kuphakama, nemamitha labengaba matsatfu bucinsi balo.

₆Wase uya ngasendlini yelisango lelibheke ngasemphumalanga. Wakhuphuka titebhisi talo, wase ukala lobubanti bemphundvu yelisango, babungemamitha labengaba matsatfu. ₇Ngale kwemphundvu yelisango kwakunemhubhe lowawunemakamelo abogadzi lamatsatfu ngala nangala kwawo, likamelo lilinye lalisikwele lesimacala angemamitha labengaba matsatfu lilinye, letibondza letisemkhatsini wawo tatingemamitha labengaba mabili nesigamu bucinsi bato. Ngale kwalamakamelo abogadzi, kwakunalenye imphundvu yelisango leyayingemamitha labengaba matsatfu bubanti leyayingena emhubheni lowawubukene nelithempeli.

₈Wase ukala umhubhe welisango; ₉wawungemamitha labengaba mane bubanti, tibondza tawo tatingaba limitha linye bucinsi. Lomhubhe walendlu yelisango wawubukene nelithempeli.

₁₀Ngekhatsi kwalendlu yelisango langasemphumalanga kwakunemakamelo lamatsatfu luhlangotsi lulunye, omatsatfu abelingana ngebukhulu, naletibondza kuwo onkhe emacala awo tatilingana. ₁₁Lendvodza yase ilinganisa bubanti basekungeneni kwalelisango; babungemamitha labengaba sihlanu, bese kutsi budze bonkhe balo bube ngemamitha labengaba sitfupha nesigamu. ₁₂Embikwalelo nalelo kamelo labogadzi kwakunelubondza lolufishatane lolwalungaba sigamu selimitha kuphakama, nesigamu selimitha bucinsi balo, lamakamelo abesikwele lesingemamitha labengaba matsatfu. ₁₃Lendvodza yase ilinganisa bubanti balendlu yelisango, kusuka etulu elubondzeni lolungemuva kwelikamelo linye kuya etulu elubondzeni lolungemuva lwalelinye likamelo lelicondzene nalo lelimshiya ngaloya kwemhubhe wangekhatsi; yatfola kutsi babungemamitha labengaba li-12 nesigamu. ₁₄Lendvodza yakala kugudla lingembili letibonza, letiphume taphondla kutungeleta lingekhatsi lendlu yelisango, kwakungemamitha labengaba ngema-30. Lesilinganiso sasifikela kulomhubhe lowawubukene nesibuya. ₁₅Sebubonkhe budze balendlu yelisango kusukela elubondzeni lolungephandle ngasekungeneni kwalelisango kuya ekugcineni kwalomhubhe wekugcina, babungemamitha labengaba ngema-25. ₁₆Bekunemafasitelo lamancane kulolubondza lolungephandle lwalamakamelo abogadzi nakuleti letatisemkhatsini walamakamelo kanye nakulomhubhe yonkhe indzawo. Bekunetihlahla temasundvu letaticoshwe kuletibondza letingekhatsi letatibheke kulomhubhe wangekhatsi.

₁₇Lendvodza yase ingimikisa esibuyeni lesasingephandle. Nalapho ngafike ngabona emakamelo nesiyilo lesasakhiwe kuso sonkhe lesibuya kusitungeleta; kwakunemakamelo langema-30 kulesibuya, embikwawo kwakunelibala lelaliyilwe ngematje. ₁₈Lesiyilo sasiseceleni kwaletindlu temasango, bubanti baso babulingene nebudze baletindlu temasango. Lesi kwakusiyilo lesasingentansi.

₁₉Kwakunendlu yelisango leyayingenhla iphumela kuso sibuya sangekhatsi. Lendvodza yase ilinganisa budze kusukela ekugcineni kwalendlu yelisango kuya ekungeneni kwalena lenye, kwakungemamitha labengaba ngema-50.

₂₀Lendvodza yase ilinganisa budze nebubanti bendlu yelisango langasenyakatfo leyayiphumela esibuyeni lesingephandle. ₂₁Emakamelo ayo abogadzi, omatsatfu ngalapha nangalapha kwemhube wangekhatsi, netibondza letatisemkhatsini wawo, kanye nalomhubhe lobukene nesibuya, konkhe bekulingana nekwelisango langasemphumalanga. Sebubonkhe budze balendlu yelisango babungemamitha labengaba ngema-25, nebubanti bayo bungemamitha labengaba li-12 nesigamu. ₂₂Umhubhe wayo lobukene nesibuya, nemafasitelo ayo, netihlahla temasundvu letaticoshwe kuyo, konkhe kwakufanana tjika nalokwa kwendlu yelisango langasemphumalanga. Lapha titebhisi letisikhombisa tatikhuphukela emnyango walelisango, lomhubhe wayo wawusekugcineni, ubuke lesibuya. ₂₃Mshiya ngaloya kwalesibuya, kusuka kulendlu yelisango langasenyakatfo kwakunalenye indlu yelisango leyayiphumela kulesibuya sangekhatsi, njengasemphumalanga. Lendvodza yase ikala budze emkhatsini waletindlu temasango omabili, yakhandza kutsi bungemamitha labengaba ngema-50.

₂₄Lendvodza yase ingiyisa ngaseluhlangotsini lwangaseningizimu, nalapho sabona lenye indlu yelisango. Yakala tibondza tayo nemhubhe wayo lobukene nesibuya, konkhe kwakufanana tjika naloku lokunye. ₂₅Lendlu yelisango, nemhubhe wayo, kwakunemafasitelo yonkhe indzawo, njengakuleta letinye. Sebubonkhe budze balendlu yelisango babungemamitha labengaba ngema-25, bubanti bayo bungemamitha labengaba li-12 nesigamu. ₂₆Kwakunetitebhisi letisikhombisa letatikhuphukela kuyo, umhubhe wakhona nawo wawusekugcineni ubuke kulesibuya. Nakhona kwakunetihlahla temasundvu letaticoshwe kuletibondza letatibheke kulomhubhe wangekhatsi. ₂₇Nakhona lapha kwakunendlu yelisango leyayiphumela kulesibuya sangekhatsi. Lendvodza yase ikala budze kusuka kulelisango kuya kulelisango langaphandle ngaseningizimu, yakhandza kutsi bungemamitha labengaba ngema-50.

₂₈Lendvodza yangitsatsa yangidzabulisa indlu yelisango langaseningizimu, yaya nami kulesibuya sangekhatsi. Yayikala lendlu yelisango, yakhandza kutsi iyafanana naleti letinye letatikulolubondza lwangephandle. ₂₉Emakamelo ayo abogadzi, netibondza tayo tangekhatsi kanye nalomhubhe wayo kwakulingana nekwaleti letinye. Lendlu yelisango nalomhubhe wayo kwakunemafasitelo yonkhe indzawo. Yayingemamitha labengaba ngema-25 budze, nemamitha labengaba li-12 nesigamu bubanti. ₃₀Imihubhe yaletindlu temasango letatitungeleta sibuya sangekhatsi yayingemamitha labengaba li-12 nesigamu budze, nemamitha labengaba mabili nesigamu bubanti. ₃₁Umhubhe walendlu yelisango langaseningizimu wawukulesibuya sangephandle; tihlahla temasundvu taticoshwe kuletibondza tayo tangekhatsi. Kwakunetitebhisi letisiphohlongo letatikhuphukela ekungeneni kwelisango.

₃₂Lendvodza yangidzabulisa indlu yalelisango langasemphumalanga, yangingenisa esibuyeni sangekhatsi. Yayikala lendlu yelisango, yakhandza kutsi ilingana tjika naleti letinye. ₃₃Emakamelo ayo abogadzi netibondza tayo tangekhatsi kanye nalomhubhe wayo kwakulingana ncamashi nekwaleti letinye. Lendlu yelisango nalomhubhe wayo kwakunemafasitelo yonkhe indzawo. Sebubonkhe budze bayo babungemamitha labengaba ngema-25, nebubanti bayo babungemamitha labengaba li-12 nesigamu. ₃₄Lomhubhe wayo wawubheke esibuyeni sangephandle. Kwakucoshwe tihlahla temasundvu kuletibondza tayo tangekhatsi emaceleni omabili. Kwakunetitebhisi letisiphohlongo letatikhuphukela ekungeneni kwelisango.

₃₅Lendvodza yase ingiyisa endlini yelisango langasenyakatfo. Yayikala, yakhandza kutsi ilingana tjika naleti letinye. ₃₆Njengato nayo yayinemakamelo abogadzi, netibondza tangekhatsi, nemhubhe lobukene nesibuya, nemafasitelo yonkhe indzawo. Sebubonkhe budze bayo babungemamitha labengaba ngema-25, nebubanti bayo babungemamitha labengaba li-12 nesigamu. ₃₇Lomhubhe wayo lomunye wawubheke kulesibuya sangephandle. Kwakucoshwe tihlahla temasundvu kuletibondza tangekhatsi emaceleni omabili. Kwakunetitebhisi letisiphohlongo letatikhuphukela ekungeneni kwelisango.

₃₈Kulesibuya sangephandle kwakunesakhiwo, lesasichunywe kulendlu yelisango lelingekhatsi ngasenyakatfo. Sasiphumela kulomhubhe wayo lowawubheke kulesibuya, lapho-ke ngulapho babegezela khona letilwane letatitekwentiwa umhlatjelo wekushiswa samuku. ₃₉Kulomhubhe lobukene nesibuya kwakunematafula lamane, kumunye ngamunye umhlubulo wawo amabili, kutsi kuhlatjelwe etikwawo tilwane temhlatjelo wekushiswa samuku, netemhlatjelo wesono, netemnikelo wenhlawulo. ₄₀Ngephandle kwalomhubhe lobukene nesibuya kwakunematafula lamane lafananako, amabili ngala nangale kwemnyango welisango langasenyakatfo. ₄₁Asawonkhe lamatafula abesiphohlongo, lapho letilwane letatiba ngumhlatjelo tatibulawelwa khona: Lamane abengekhatsi kulomhubhe, lamane angephandle esibuyeni. ₄₂Lamatafula lamane lekwakulungiselelwa kuwo imihlatjelo leyayitawushiswa samuku, abengewematje lacotwe kahle. Abengaba sigamu selimitha kuphakama kwawo, bese kutsi lingetulu lawo lalisikwele lesasingemasentimitha labengaba ngema-75. Tonkhe letimphahla letatisetjentiswa ekuhlabeni letilwane temihlatjelo tatibekwa kulamatafula. ₄₃Kwakunemingcengcema leyayingemamilimitha labengaba ngema-75 bubanti, leyayitungeleta lamatafula. Yonkhe inyama yemihlatjelo yayibekwa etikwalamatafula.

₄₄Lendvodza yase ingimisa kulesibuya sangekhatsi. Kwakunemakamelo lamabili lavulekela kulesibuya sangekhatsi, lilinye laliseceleni kwelisango langasenyakatfo, lalibheke ngaseningizimu, leli lelinye liseceleni kwelisango langaseningizimu libheke ngasenyakatfo. ₄₅Lendvodza yangitjela kutsi lelikamelo lelibheke ngaseningizimu lalilebaphristi lababekhonta ethempelini, ₄₆lelikamelo lelalibheke ngasenyakatfo lalilebaphristi lababekhonta elatini. Labaphristi kwakuyintalelwane yaSadoki, kwakungabo kuphela emalunga labewesive semaLevi labenelilungelo lekusondzela ebukhoneni baSimakadze ayewumkhonta.

₄₇Lendvodza yakala lesibuya sangekhatsi, yatfola kutsi sasisikwele lesasingemamitha labengaba ngema-50. Lithempeli lalingasenshonalanga, embikwalo kwakunelilati. ₄₈Yase iyangitsatsa yangiyisa kulomhubhe wekungena ethempelini. Yakala umnyango wawo, wawungemamitha labengaba mabili nesigamu budze, nemamitha labengaba sikhombisa bubanti, netibondza tawo tatingaba limitha linye nesigamu bucinsi bato, ngala nangale. ₄₉Kwakunetitebhisi letatikhuphukela emnyango walomhubhe wekungena ethempelini, lomhubhe wawungemamitha labengaba lishumi bubanti, nemamitha labengaba sitfupha budze. Kwakunetinsika letimbili lapha ekungeneni, iyinye ngala nangale kwemnyango.