Hezekeli 37

₁Sandla saSimakadze sasisetikwami, wangikhiphela ngaphandle ngaMoya waSimakadze, wangimisa ekhatsi nendzawo esigodzini. Lesigodzi sasigcwele ematsambo. ₂Wangihola angiyisa enhla nentasi emkhatsini walamatsambo. Ngabona kutsi sonkhe lesigodzi sasigcwele ematsambo lapha phansi, lamatsambo futsi abome nkhwa. ₃Wangibuta watsi: “Ndvodzana yemuntfu, lamatsambo angaphila yini?”

Ngatsi mine: “Awu, Nkhosi, Simakadze, nguwe wedvwa lowatiko.”

₄Wase utsi kimi: “Phrofetha kulamatsambo, utsi kuwo: ‘Nine matsambo lomile, vanini livi laSimakadze! ₅Naku lokushiwo yiNkhosi Simakadze kulamatsambo, itsi: Ngitakwenta umphefumulo ungene kini, nitabe seniyaphila. ₆Ngitawuhlumisa imisipha kini, ngente inyama imile kini, nginembese ngesikhumba, ngitawufaka umphefumulo kini, nitawube seniyaphila. Ngulapho-ke niyawukwati khona kutsi mine nginguSimakadze.’ ”

₇Ngako ngaphrofetha njengobe ngangiyaliwe. Ngatsi ngisaphrofetha, kwaba nemsindvo, kwakhala bukhehlekhehle, ematsambo ahlangana, litsambo laya etsanjeni. ₈Ngatsi ngiyabuka, kwavela kuwo imisipha nenyama, ngabona sikhumba siwembesa, kodvwa kwakute umphefumulo kuwo.

₉Wakhuluma kimi, watsi: “Phrofetha emphefumulweni, phrofetha, ndvodzana yemuntfu, ukhulume kuwo, utsi: ‘Naku lokushiwo yiNkhosi Simakadze, itsi: Wena mphefumulo, chamuka emimoyeni yomine, uphefumulele kulaba lababulewe, khona batewuphila.’ ” ₁₀Ngako ngaphrofetha njengaloku abengiyalile, umphefumulo wangena kuwo, ase ayaphila, asukuma ema ngetinyawo, kwakuyimphi lenkhulu kakhulu.

₁₁Wase utsi kimi: “Ndvodzana yemuntfu, lamatsambo lawa, angiyo yonkhe indlu yaka-Israyeli. Batsi: ‘Ematsambo etfu omile, nelitsemba letfu liphelile; sincanyuliwe saphela nya.’ ₁₂Ngako-ke phrofetha, utsi kubo: ‘Naku lokushiwo yiNkhosi Simakadze, itsi: Awu, sive sami, ngitawugwabula emadliza enu, nginikhiphe kuwo; ngiyawunibuyisela eveni lenu laka-Israyeli. ₁₃Ngulapho-ke niyawukwati khona, nine bantfu bami, kutsi mine nginguSimakadze, mhlazane ngivula emathuna enu nginikhipha kuwo. ₁₄Ngiyawufaka Moya wami kini, bese niyaphila, ngiyawunihlalisa eveni lenu. Lapho-ke niyawube seniyati kutsi mine Simakadze sengikhulumile, futsi sengikwentile, kusho Simakadze.’ ”

₁₅Livi laSimakadze lefika kimi, latsi: ₁₆“Ndvodzana yemuntfu, tsatsa umzaca ubhale kuwo, utsi: ‘LongewakaJuda nema-Israyeli latihlanganise naye.’ Bese utsatsa lomunye futsi umzaca ubhale kuwo, utsi: ‘Longewaka-Efrayimu, nalongewakaJosefa nabo bonkhe bendlu yaka-Israyeli labatihlanganise naye.’ ₁₇Yihlanganise ndzawonye, uyente ibe ngumzaca munye, khona itewuba yintfo yinye esandleni sakho.

₁₈“Nabakubuta bantfu bakini, batsi: ‘Ungete wasitjela yini kutsi usho kutsini ngaloku?’ ₁₉ubobatjela kutsi mine, iNkhosi Simakadze, ngitawutsatsa lomzaca lomelele baka-Israyeli ngiwubeke kanyekanye nalona lomelele bakaJuda. Ngalemizaca lemibili ngitakwenta umzaca ube munye lengitawuphatsa ngesandla sami.

₂₀“Bamba ngesandla sakho lemizaca yomibili lobhale kuyo, wentele kutsi bantfu bayibone, ₂₁bese-ke uyabatjela kutsi: ‘Naku lokushiwo yiNkhosi Simakadze, itsi: Ngitawubutsa sonkhe sive sami saka-Israyeli kuto tonkhe tive lapho sahlakatekela khona, ngisibutsele ndzawonye ngize ngisibuyisele eveni lelingelaso. ₂₂Ngiyawubenta babe sive sinye kulelo live, etintsabeni taka-Israyeli. Kuyawuba nenkhosi yinye leyawubabusa bonkhe, futsi abasayiwuphindze babe tive letimbili letehlukene nome behlukane babe ngimibuso lemibili. ₂₃Abasayikutingcolisa bona ngetithico tabo nangetitfombe letinengekako, nanganome ngusiphi setono tabo, ngobe ngiyawubasindzisa kuto tonkhe tono tabo tekuhlubuka, ngibageze. Bayakuba bantfu bami, mine ngibe nguNkulunkulu wabo.

₂₄“ ‘Inceku yami, Davide, iyawuba yinkhosi yabo, futsi bonkhe bayawuba nemelusi munye. Bayawulandzela imitsetfo yami, bacaphele kugcina timiso tami. ₂₅Bayawuhlala eveni lengalipha inceku yami Jakobe, live lapho kwakuhlala khona boyihlomkhulu. Bona kanye nebantfwababo, kanye nebantfwana bebantfwababo, bayawuhlala lapho phakadze naphakadze; naDavide, inceku yami, uyawuba yinkhosi yabo phakadze naphakadze. ₂₆Ngiyawukwenta sivumelwane sekuthula nabo, siyawuba sivumelwane saphakadze. Ngiyawubahlalisa kahle batinte, ngibente bandze, ngibeke indzawo yami lengcwele emkhatsini wabo phakadze naphakadze. ₂₇Indzawo yami yekuhlala iyawuba kubo; mine ngiyawuba nguNkulunkulu wabo, bona babe bantfu bami. ₂₈Ngulapho-ke tive tiyawukwati khona kutsi mine Simakadze ngenta Israyeli kutsi abe ngcwele, ngesikhatsi indzawo yami lengcwele iyawuba kubo phakadze naphakadze.’ ”