Eksodusi 21

₁“Ema-Israyeli wanike nansi imiyalo lelandzelako: ₂Nawutsenga sigcili lesingumHebheru, siyakukusebentela iminyaka lesitfupha. Ngemnyaka wesikhombisa uyawusikhulula, ngaphandle kwenkhokhelo. ₃Nangabe seta singenamfati, kufanele sihambe singenamfati; nangabe seta sesinemfati, kufanele sihambe nemkaso. ₄Nangabe umtsengi waso asinike umfati, sabe sesitala emadvodzana nemadvodzakati, lomfati nebantfwana akusibo baso, bemtsengi waso. Sona sifanele sihambe sodvwana. ₅Kodvwa nangabe lesigcili sikhuluma ngewaso umlomo sitsi: ‘Ngiyamtsandza umtsengi wami, nemkami, nebantfwabami, angifuni kukhululeka,’ ₆ngako umtsengi waso kufanele asitsatse asimikise kuNkulunkulu endzaweni yekukhonta. Utawumenta eme eceleni kwemnyango nome kwensika yemnyango, abhobose indlebe yaso ngelusungulo. Sesiyawumsebentela simkhonte imphilo yaso yonkhe.

₇“Nangabe indvodza itsengisa indvodzakati yayo kutsi ibe sigcili, akukafaneli sikhululwe njengetigcili letidvuna. ₈Nangabe lendvodzakati itsengiswe endvodzeni lefuna kuyenta umkayo kodvwa lendvodza ingeneliswa ngiyo, lendvodza kufanele ivume kutsi ihlengwe lendvodzakati. Lendvodza ayinalo lilungelo lekuyitsengisa kumuntfu wetive, ngobe ayiketsembeki kulendvodzakati. ₉Nangabe lendvodza ikhetsa lesigcilikati isikhetsela indvodzana yaso, kufanele loyise asitsatse njengendvodzakati yakhe. ₁₀Nangabe indvodza itsatsa lomunye umfati, kufanele ingasehlisi sabelo salomfati wekucala macondzana nekudla nekwekwembatsa kanye nemalungelo akhe ebufati. ₁₁Nangabe lendvodza ayitifezi letimfanelo letintsatfu kulomfati, akakhululeke ahambe ngaphandle kwekutsengwa.”

₁₂“Umuntfu loshaya lomunye umuntfu ambulale, naye kufanele abulawe. ₁₃Kodvwa nangabe abengakacondzi kumbulala ngekumlalela endleleni, kodvwa kube nguNkulunkulu lomyekelele wawela esandleni sakhe, angabaleka ayewubhaca endzaweni lengitayikhetsa kutsi kube yindzawo yekukhosela. ₁₄Kodvwa nangabe umuntfu ahlasele lomunye umuntfu wambulala ngemabomu, nome asabaleke wayawukhosela elatini lami, nibomsusa kulo nimbulale.

₁₅“Loshaya uyise nome unina kufanele abulawe.

₁₆“Lotfumba lomunye umuntfu entele kumtsengisa nome kumenta sigcili kufanele abulawe.

₁₇“Localekisa uyise nome unina kufanele abulawe.

₁₈“Nangabe emadvodza atsite ayalwa, bese lenye ishaya lenye ngelitje nome ngesibhakela, kodvwa ingete yafa, ilimale nje ilale phansi, ₁₉kodvwa emvakwaloko isukume ihambe ngekudvondvolotela ngendvuku, lena lemshayile ingeke ibe nelicala. Intfo nje, kufanele ikhiphe inkhokhelo yesikhatsi sayo, iyinakekele ize iphile.

₂₀“Nangabe indvodza ishaye sigcili nome sigcilikati sayo ngendvuku safa khona lapho, kufanele ihlawuliswe; ₂₁kodvwa nangabe lesigcili selulame ngelilanga linye nome mabili, akukafaneli ijeziswe, ngobe phela lesigcili siyimphahla yayo lendvodza.

₂₂“Nangabe emadvodza atsite ayalwa alimata umfati lotetfwele, wadzimate wonakalelwa sisu, kodvwa yena wangete walimala ndzawo, lona lomlimatile kufanele ahlawuliswe. Inhlawulo itakuya ngekutsi indvodza yalomfati ijubeni; kuye ngekutsi behluleli bona bayayemukela yini leyo nhlawulo. ₂₃Kodvwa nangabe lomfati ulimele, kufanele kwenanwe kuphila ngekuphila, ₂₄liso ngeliso, litinyo ngelitinyo, sandla ngesandla, lunyawo ngelunyawo, ₂₅kushiswa ngekushiswa, linceba ngelinceba, umvimba ngemvimba.

₂₆“Nangabe umuntfu ashaye liso lesigcili nome lesigcilikati sakhe laze lalimala langabe lisabona, kufanele asikhulule sihambe, ngenca yaleliso. ₂₇Nangabe usishaye wasikhipha litinyo lesigcili nome lesigcilikati, kufanele asikhulule kube yinkhokhelo yaso yalelitinyo.”

₂₈“Nangabe inkhomo ihlabe umuntfu wafa, kufanele igcotjwe ngematje ibulawe, inyama yayo ingadliwa; kodvwa umnikati kufanele angajeziswa. ₂₉Kodvwa nangabe inkhomo beyinemkhuba wekuhlabana, nemnikati wayo wacwayiswa ngaloko, kodvwa wangete wayifundzisa, nakwenteka-ke ihlaba umuntfu afe, lenkhomo iyawugcotjwa ngematje ibulawe; nemnikati wayo kufanele abulawe. ₃₀Nakwenteka lomnikati avunyelwa kutsi akhiphe yonkhe inhlawulo yekuhlenga kuphila kwakhe, kufanele akhokhe yonkhe leyo nhlawulo lefunekako. ₃₁Nangabe lenkhomo igwaze umfana nome intfombatane, lendzaba iyawulungiswa ngawo lowo mtsetfo. ₃₂Nangabe lenkhomo igwaze sigcili lesidvuna nome lesisikati safa, umnikati wayo uyawukhipha tinhlavu tesiliva letingaba ngema-30, yona igcotjwe ize ife.

₃₃“Nangabe umuntfu ashiye umgodzi lovulekile nome embe washiya lomgodzi ungakavalwa, bese kugcumkela kuwo inkhomo nome imbongolo, ₃₄kufanele akhiphe inkhokhelo yalesifuyo. Lemali kufanele ayinike umnikati, lomhlawuli asale asatsatsa lesilwane sibe sakhe. ₃₅Nangabe inkhomo yalomunye umuntfu ihlabe lenye inkhomo yayibulala, kufanele labanikati baletinkhomo batsengise lena lephilako behlukaniselane lentsengo ngalokulinganako; ngalokufananako kufanele behlukaniselane lenyama yalena lefile.

₃₆“Kodvwa nangabe bekwatiwa kutsi lenkhomo beyivele inemkhuba wekuhlabana, nemnikati wangete wayivalela, kufanele ayenane ngalenye lephilako, lomhlawuli atsatse lena lefile ibe yakhe.”