Kubase-Efesu 2

₁ Univusile nani lebenifile ngenca yetiphambuko netono tenu, ₂lebenikadze nihamba kuto ngekwendlela yalomhlaba, ngekwembusi wemandla emkhatsi, umoya losasebenta kubantfu labangalaleli Nkulunkulu. ₃Empeleni sonkhe sasinjengabo, sasiphila ngetinkhanuko tenyama yetfu, senta intsandvo yenyama neyengcondvo yetfu. Ngekwemvelo yetfu sasifanelwe lulaka lwaNkulunkulu njengabo bonkhe bantfu.

₄Kodvwa Nkulunkulu, locebile ngesihawu sakhe nangebukhulu belutsandvo lwakhe lasitsandza ngalo, ₅nome sase sifile ngetiphambuko tetfu, wasiphilisa kanye naKhristu. Nisindziswe ngemusa waNkulunkulu. ₆Wasivusa kanye naKhristu Jesu, wabuye wasihlalisa kanye naye sikuye, embusweni welizulu, ₇kuze kutsi etikhatsini letitako abonakalise kitsi ingcebo lenkhulu yemusa wakhe ngekusiphatsa ngebubele ngaKhristu Jesu. ₈Empeleni kusindziswa kwenu ngekukholwa kuya ngemusa, futsi loko akuveli kini, sipho nje saNkulunkulu. ₉Loko akuveli ngemisebenti, funa kube khona lotibongako. ₁₀Ngobe tsine singumsebenti waNkulunkulu. Sidalwe ngaJesu Khristu kutsi sente imisebenti lemihle, Nkulunkulu layilungisa kucala.

₁₁Ngako-ke khumbulani, nine betive ngekutalwa, kutsi emaJuda lasoke enyameni ngetandla abenibita ngekutsi ningulabangakasoki. ₁₂Nikhumbule nekutsi ngaleto tikhatsi benehlukanisiwe naKhristu, ningephandle kwembuso waka-Israyeli, nitihambi letite sabelo etivumelwaneni tesetsembiso, nite litsemba, nite naNkulunkulu emhlabeni. ₁₃Kodvwa nyalo nine lebenikadze nikhashane naNkulunkulu senimunye kuKhristu Jesu. Senisondzetwe ngengati yaJesu. ₁₄Ngobe yena ukuthula kwetfu, lowenta lokubili kwaba kunye, ngekufa kwakhe wabhidlita lubondza lwebutsa lolwalwehlukanisa. ₁₅Umtsetfo, nemiyalo, nemisimeto wakucitsa khona atewudala kabusha labo lababili: umJuda newetive, babe ngumuntfu munye kuye, kube kuthula. ₁₆Bobabili wabenta kutsi babuyisane naNkulunkulu emtimbeni munye ngesiphambano, ngaloko wacedza bonkhe butsa. ₁₇Weta washumayela liVangeli lekuthula kini lebenikadze nikhashane, yebo, kuthula nakubo labo lababesedvute. ₁₈Ngobe ngaye sobabili sinekungena ngaMoya munye kuYise.

₁₉Ngako-ke anisesito tihambi nemihambima, kodvwa nyalo seningumndeni munye nalabangcwele, senibendlu yaNkulunkulu. ₂₀Lendlu yakhelwa etikwesisekelo sebaphostoli nebaphrofethi; Jesu Khristu lucobo ulitje lelisimise lendlu. ₂₁Sakhiwo sonkhe sihlanganiselwe kuye, siyakhula, siyawudzimate sibe lithempeli lelingcwele leNkhosi. ₂₂Nani futsi nakhiwa kulo, kuze nibe yindlu yekuhlala Nkulunkulu ngaMoya.