Dutheronomi 34

₁Mosi wesuka ematsafeni akaMowabi, wekhwela iNtsaba iNebo, waya esicongweni sasePhisga macondzana neJerikho. Simakadze wamkhombisa lonkhe live: kusukela kulakaGileyadi kuze kufike kulakaDani, ₂lonkhe lakaNaftali, live laka-Efrayimu nelakaManase, lonkhe live lakaJuda kuze kuyewufika elwandle lwasenshonalanga, ₃naseNegevu, eningizimu yakaJuda, kanye naso sonkhe leso sifundza kusuka eSihosheni saseJerikho, lidolobha letihlahla temasundvu, kuze kuyewufika kulaseSowari. ₄Simakadze wase ukhuluma kuye utsi: “Leli-ke ngilo lelive lengaletsembisa ngesifungo kubo-Abrahama, na-Isaka, naJakobe, mhlazana ngitsi: ‘Ngiyawulipha titukulwane takho.’ Ngentela kutsi ulibone ngemehlo akho, kodvwa wena ungeke wewele kuyawungena kulo.”

₅Mosi, inceku yaSimakadze, wafela khona lapho kulakaMowabi, njengobe Simakadze abeshito. ₆Wamngcwabela kulakaMowabi esihosheni lesibhekene neBhethi Pheyori, kodvwa kuze kube ngulamuhla kute lowatiko kutsi lidliza laMosi likuphi. ₇Mosi abesaneminyaka leli-120 budzala ngesikhatsi afa, noko emehlo akhe abengakacundzeki, kantsi futsi nasemtimbeni abesecinile. ₈Sive saka-Israyeli salilela Mosi ematsafeni akaMowabi emalanga langema-30, kwaze kwaphela leso sikhatsi sekukhala nekulila.

₉Joshuwa, umsa waNuni, abesagcwaliswe ngaMoya wekuhlakanipha, ngobe Mosi abeke wabeka tandla takhe etikwakhe. Ngako-ke sive sema-Israyeli samlalela senta loko Simakadze labeyale Mosi kutsi sikwente.

₁₀Kusukela ngaleso sikhatsi kute umphrofethi lowaphindza wavela ka-Israyeli waba njengaMosi lobekatiwa nguSimakadze buso nebuso, ₁₁lowenta tonkhe leto tibonakaliso netimangaliso Simakadze lamtfuma kutsi atente eGibhithe kuFaro nakuto tonkhe tiphatsimandla takhe kanye naseveni lakhe lonkhe. ₁₂Kute namunye umuntfu lowase waba nemandla lamakhulu kangaka nome ente imisebenti leyesabekako leyentiwa nguMosi embikwaso sonkhe sive sema-Israyeli.