Ema-Israyeli ancoba Ogi, inkhosi yaseBhashani
1“Sesuka lapho senyuka ngemgwaco locondza eBhashani; Ogi, inkhosi yaseBhashani, waphuma kanye nemabutfo akhe onkhe atesihlasela emphini e-Edreyi. 2Kodvwa Simakadze wakhuluma kimi, watsi: ‘Ungamesabi, ngobe yena kanye nemabutfo akhe onkhe, nelive lakhe, sengimnikele etandleni takho. Yenta kuye kona loko lowakwenta kuSihoni, inkhosi yema-Amori, labebusa eHeshboni.’
3“Ngako Simakadze Nkulunkulu wetfu, wanikela Ogi, inkhosi yaseBhashani, kanye nabo bonkhe bantfu bakhe etandleni tetfu. Sabagwaza bonkhe, kwangete kwasala ngisho namunye lowasindza. 4Ngaleso sikhatsi sawatfumba onkhe emadolobha akhe; kute ngisho nalinye kulamadolobha labengema-60 lelasala sangete salitfumba kuso sonkhe leso sifundza sase-Agobhu, embusweni wa-Ogi, inkhosi yaseBhashani. 5Onkhe lamadolobha abetinqaba ngekwawo, anetibondza letiphakeme nemasango laveletelwa ngemishudvo yensimbi, kanye nalamanye emadolobha lamanyenti kakhulu labete tibondza. 6Sawabhubhisa sawacedza onkhe, njengobe senta kuSihoni, inkhosi yaseHeshboni; sabhubhisa onkhe emadolobha, nemadvodza, nebafati nebantfwana. 7Kodvwa tonkhe tifuyo nalokunye lokwakuyimphango sakwetfwala, sahamba nako.
8“Ngako lelive salitsatsa ngaso leso sikhatsi esandleni semakhosi lamabili ema-Amori, ngesheya emphumalanga nemfula iJordane, kusuka eSihosheni sase-Anoni, kuze kuyewufika eNtsabeni iHemoni.”
9INtsaba iHemoni emaSidoni ayibita ngekutsi yiSiriyoni, kantsi ema-Amori wona ayibita ngekutsi yiSeniri.
10“Salidla lonkhe live laka-Ogi, inkhosi yaseBhashani: emadolobha lasentsabeni, netifundza takaGileyadi naseBhashani, kuze kuyewufika emadolobheni aseSalekha nase-Edreyi lekungemadolobha embuso wa-Ogi eBhashani.”
11Kwase kusele Ogi, inkhosi yaseBhashani, kuphela kuleyo nsali yesive semaRefa. Umbhedze wakhe wawentiwe ngensimbi, budze ungemamitha labengaba mane, bubanti ungemamitha labengaba mabili. Ungatfolakala eRabha, edolobheni lema-Amoni.
Tive letacaba emphumalanga neJordane
12“Lelive salidla kanjalo-ke ngaleso sikhatsi. Indzawo lesukela enyakatfo yase-Aroyeri ngaseSihosheni sase-Anoni nencenye yelive letintsaba takaGileyadi kanye nemadolobha alo ngakwabela emaRubeni nemaGadi. 13Lenye incenye yelive lakaGileyadi neBhashani yonkhe, umbuso wa-Ogi, ngisho sonkhe sifundza sase-Agobhu ngayabela incenye yesive sakaManase.
“IBhashani yayatiwa ngekutsi live lakaRefa. 14Jayire, umsa waManase, watsatsa sonkhe sifundza sase-Agobhu, kuze kuyewufika emnyeleni wemaGeshuri nemaMakhathi. Leyo ndzawo wayetsa ngaye; kuze kube ngulamuhla iBhashani yatiwa ngekutsi yiHavothi Jayire.
15“IGileyadi ngayabela Makhire. 16Sive sakaRubeni nesakaGadi ngatabela live lakaGileyadi, kuze kuyewufika eSihosheni sase-Anoni, ekhatsi nesihosha kwaba ngumnyele, kanye nasemfuleni iJabhoki, umnyele wesive sema-Amoni. 17Ngasenshonalanga lelive labo lalihamba lize liyewufika emfuleni iJordane, e-Arabha, lalisuka eKhinerethi lize liyewufika eLwandle lwase-Arabha, Lwandle Lweluswayi, ngaphansi kwemacele asePhisga.
18 “Ngaso leso sikhatsi ngabe sengiyaniyala, ngatsi: ‘Simakadze Nkulunkulu wenu uniphe lelive kutsi nilidle. Nonkhe nine mabutfo emphi lenihlomele kulwa, hambani embikwetive tema-Israyeli, newelele ngesheya kwemfula. 19Kodvwa bafati benu, nebantfwabenu, netifuyo tenu – njengobe ngiyati kutsi ninetifuyo letinyenti – kutawusala kulamadolobha lenginiphe wona, 20aze Simakadze anike banakenu lendzawo lesasele, njengobe enta nakini, nabo futsi sebalitsetse lelo live Simakadze Nkulunkulu wenu labanika lona lelingesheya kwemfula iJordane. Emvakwaloko-ke nonkhe seningabuyela emuva, nguloyo naloyo aye eveni lakhe lengimabele lona.’
21“Ngaso leso sikhatsi ngayala Joshuwa, ngatsi: ‘Nawe utibonele ngewakho emehlo konkhe loko Simakadze Nkulunkulu wakho lakwentile kulamakhosi lamabili; utakwenta njalo-ke kuyo yonkhe lemibuso lenisetakwewelela kuyo. 22Ningayesabi, ngobe Simakadze Nkulunkulu wenu nguye lotanilwela.’ ”
Mosi akavunyelwa kungena eKhenani
23“Ngaphindze ngancusa Simakadze ngaleso sikhatsi, ngatsi: 24‘Hawu! Nkhosi Simakadze, sewucalile kukhombisa inceku yakho bukhulu bakho nesandla sakho lesinemandla. Ngumuphi nje nkulunkulu losezulwini nome losemhlabeni longenta lemisebenti nalemimangaliso yemandla loyentako? 25Ngicela kwewela ngiyewubona lelive lelihle lelingesheya kweJordane, live lelihle letintsaba, kanye neLebanoni.’
26“Kodvwa ngenca yenu Simakadze wangitfukutselela, wangabe asangilalela nekungilalela, watsi kimi: ‘Sekwenele! Ungaphindze ukhulume kimi ngalendzaba. 27Yenyuka uye esicongweni sentsaba iPhisga, ubukisise ngasenshonalanga, nangasenyakatfo, nangaseningizimu kanye nangasemphumalanga; lelive ulibukisise ngemehlo akho, ngobe wena ungeke usawewela umfula iJordane. 28Kodvwa yala Joshuwa, umcinise umkhutsate, ngobe nguye lotakuhola lesive asewetele ngesheya kwemfula; nguye futsi lotabenta badle lelive lolibonako.’
29“Ngako sahlala esihosheni, macondzana nelidolobha laseBhethi Pheyori.”
