2 kubaseKorinthe 13

₁Sekwesitsatfu ngilungiselela kuta lapho kini. “Yonkhe inkhulumo yenu iboba nabofakazi lababili nome labatsatfu,” njengobe kusho umBhalo. ₂Ngabecwayisa labo labona kucala, namanje futsi ngiyabecwayisa naloku ngingekho, njengobe ngabatjela nangilapho ekuvakasheni kwami kwesibili kutsi nangingefika lapho ngiyakubashiya emehlo ekubuka, ₃njengobe nifuna siciniseko kutsi Khristu ukhuluma kimi. Yena angeke aniphatse ngebutsakatsaka, kodvwa unemandla kini. ₄Ngobe wabetselwa ebutsakatsakeni, kodvwa sewuphila ngemandla aNkulunkulu. Sibutsakatsaka kuye, kodvwa sitawuphila kanye naye ngemandla aNkulunkulu, kuze sikwati kunisita.

₅Tihlolisiseni nine ngekwenu nitibone kutsi nibambelele yini ekukholweni kwenu. Tivivinyeni nine. Aniboni yini kutsi Jesu Khristu ukini? Ngaphandle kwaloko nitehluleki! ₆Ngiyetsemba niyawukhandza kutsi asikehluleki. ₇Kodvwa sithandaza kuNkulunkulu kutsi ningoni, hhayi kutsi sibonakale singulabancono, kodvwa kuze nente loko lokufanele, nome kungabonakala shangatsi sehlulekile.

₈Ngobe site emandla ekwenta lutfo, nasimelene neliciniso, kodvwa sinawo kuphela nasimele liciniso. ₉Ngobe tsine siyajabula nangabe nine nicinile nome tsine sibutsakatsaka. Sithandazela kutsi nine nipheleliswe kuKhristu. ₁₀Loku ngikubhala ngisengakefiki kini, kuze kutsi nangifika lapho kungadzingeki kutsi nginiphatse ngesandla lesimatima lenginikwe sona yiNkhosi, kutsi ngakhe, ngingahliphiti.

₁₁Kwekugcina-ke bazalwane, ngitsi: Salani kahle. Lungisani imihambo yenu, netsabele kwemukela imiyalo, nivumelane, nihlalisane ngekuthula, khona Nkulunkulu wekuthula newelutsandvo atewuba nani.

₁₂Bingelelanani ngekwangana lokungcwele. Bayanihambisa bonkhe bazalwane.

₁₃Umusa weNkhosi Jesu, nelutsandvo lwaNkulunkulu, nebudlelwane baMoya Longcwele akube nani nonkhe.