Emalungiselelo ekwakha lithempeli
1Solomoni wakhipha simemetelo kutsi akwakhiwe lithempeli, kwakhelwe Libito laSimakadze, naye akhelwe sigodlo sakhe. 2Solomoni wabutsa emadvodza lati-70 000 ekwetfwala, kwatsi lati-80 000 aba ngekucota ematje etintsabeni, wabeka tindvuna tawo letatiti-3 600.
3Solomoni watfumela umlayeto kuHiramu, inkhosi yaseThire, watsi:
“Ngitfumelele tingodvo temsedari, njengobe wenta kubabe wami Davide, ngesikhatsi umtfumelela tingodvo tekwakha sigodlo, lapho abetawuhlala khona. 4Manje sengifuna kucala kwakha lithempeli, ngakhele Libito laSimakadze Nkulunkulu wami, bese ngilinikela kuye libe lekushisela imphepho kube liphunga lelimnandzi kuye, libe lekubeka sinkhwa lesingcwele, nelekwentela khona iminikelo yekushiswa njalo ekuseni, nasentsambama, nangemaSabatha, nangekwetfwasa kwetinyanga, nangemikhosi lemisiwe yaSimakadze Nkulunkulu wetfu. Leso-ke simiso sema-Israyeli lesiyakuma kuze kube phakadze.
5“Lelithempeli lengitawulakha litawuba likhulu kakhulu, ngobe Nkulunkulu wetfu mkhulu kunabo bonkhe bonkulunkulu labakhona. 6Kepha ngubani longamakhela lithempeli, ngobe emazulu, ngisho nemazulu laphakeme kunawo onkhe, ngeke enele kuwo? Bengingubani-ke mine kutsi ngingakhela yena lithempeli, ngaphandle kwekutsi ngakhe indzawo nje, lapho kutaboshiselwa khona imphepho embikwakhe?
7“Ngako-ke ngitfumelele umuntfu loyingcweti kutekwakha ngegolide, nangesiliva, nangelitfusi, nangensimbi, nangaletibukhwebeletane, nangaletibubendze, nangaletiluhlata njengesibhakabhaka, umuntfu losacocodzela kutekubata, nekucopha, kutsi atewusebenta kaJuda naseJerusalema kanye naletingcweti tekubata talapha kami, labo lengabakhetselwa ngubabe Davide.
8“Ngitfumelele kanye nemisedari, netipheshula, netingodvo te-almugi taseLebanoni, ngobe ngiyati kutsi lamadvodza akakho aceceshekile ekugawuleni tingodvo lapho. Emadvodza akami atawubambisana nalawo akakho, 9kutsi angilungisele tingodvo letinyenti, ngobe lelithempeli lekufanele ngilakhe kumele libe likhulu futsi libe lihle. 10Ngitawunika tisebenti takakho, lamadvodza latawugawula letingodvo, kolo losiliwe longemathani langaba ti-2 000, nebhali lengemathani langaba ti-2 000, neliwayini lelingemalitha langaba ti-400 000, nemafutsa emncumo langemalitha langaba ti-400 000.”
11Hiramu, inkhosi yaseThire, watfumela imphendvulo lekwakuyincwadzi kuSolomoni, watsi:
“Simakadze uyasitsandza sive sakhe, ngako sewukwente waba yinkhosi yaso. 12Akabongwe Simakadze, Nkulunkulu wema-Israyeli, uMdali welizulu nemhlaba. Uphe inkhosi Davide indvodzana lehlakaniphile, legcwele emasu ekuhlakanipha nekucondza, nyalo seyitilungiselela kwakha lithempeli laSimakadze, itakhele nesigodlo sayo.
13“Ngikutfumelela nango Huramu Abi, ingcweti kutekubata nakutekwakha. 14Unina abengulomunye wesive sakaDani, uyise awaseThire. Wakufundzela kusebenta ngegolide, nangesiliva, nangelitfusi, nangensimbi, nangematje, nangetingodvo, nangaletibukhwebeletane, nangaletibubendze, nangaletiluhlata njengesibhakabhaka, nangelineni lecolisakele. Unelwati lolubanti kuto tonkhe tekubata netekucopha, nome ngabe nguyiphi inhlobo yendlu ledzingekile, nakayinikiwe. Utawusebenta kanye nalababati bakakho, nalaba benkhosi yami Davide, uyihlo.
15“Manje-ke inkhosi yami ayitfumelele tisebenti tayo loko leyayikwetsembisile: kolo, nebhali, nemafutsa emncumo, neliwayini. 16Tsine sitatigawula tonkhe tingodvo lotifunako taseLebanoni, bese sitintantisa ngeminyaba yato lapha elwandle tiye eJopha. Nine-ke nitabe senitenyula lapho nitimikise eJerusalema.”
Solomoni wenta lubalo
17Solomoni wase wenta lubalo lwabo bonkhe lababetive lababeka-Israyeli, emvakwelubalo uyise Davide labelwentile. Batfolakala kutsi babeti-153 600. 18Wase ukhetsa labati-70 000 kubo kutsi babe betfwali, nalabati-80 000 kutsi babe babati bematje etintsabeni, nalabati-3 600 kutsi babe tindvuna tabo.
