Tikhonti taKhristu nebaphatsi betimfihlakalo taNkulunkulu
1Kufanele satiwe kutsi sitikhonti taKhristu nebaphatsi betimfihlakalo taNkulunkulu. 2Futsi-ke baphatsi kufuneka kutsi batfolakale betsembekile. 3Kodvwa-ke mine kimi kuyintfo lencane kutsi ngehlulelwe ngini nome ngekwehlulela kwebantfu, ngobe nami angitehluleli. 4Ngobe angitikhobosi ngalutfo ngekwami, noko-ke akusho kutsi loko kungenta ngemukeleke kuNkulunkulu kutsi ngilungile. Kodvwa yiNkhosi lengehlulelako. 5Ngako-ke ningacali kwehlulela lutfo sikhatsi singakefiki, neNkhosi ingakefiki. Ngiyo leyawuveta ekukhanyeni lokufihlakele ebumnyameni, ivete ebaleni imicabango yetinhlitiyo. Lapho-ke ngulowo nalowo muntfu uyawutfola kubongwa lokuvela kuNkulunkulu.
Kukhuluma kwebantfu baseKhorinte nekuhlupheka kwebaphostoli
6Loku-ke, bazalwane, ngikucondzise kimi naku-Apolosi ngenca yenu. Fundzani kitsi kutsi ningengcisi kulokubhaliwe, ningagungubali ngalomunye umuntfu nidzele lomunye. 7Vele kambe ngubani lokwenta ube ncono kunalabanye? Yini lonayo longazange uyiphiwe? Nangabe-ke waphiwa, utigabatiselani wente shangatsi awuzange uphiwe?
8Senenele! Seninjingile! Senitente emakhosi ngaphandle kwetfu! Maye, ngifisa shangatsi ngabe ningemakhosi sibili, sitewuhlephunelana nani lokubusa! 9Ngiyabona kutsi Nkulunkulu usimisile tsine baphostoli kutsi sibe bekugcina, sifanane nalabagwetjwe intsambo. Ngobe sentiwe saba ngumbukiso kuyo yonkhe indalo, etingilosini, nakubantfu.
10Tsine sitilima ngenca yaKhristu,
kodvwa nine nihlakaniphile kuKhristu.
Tsine sibutsakatsaka ngenca yaKhristu,
kepha nine ninemandla.
Nine niyadvunyiswa,
kepha tsine siyanyembenywa.
11Kudzimate kube ngulesikhatsi siyalamba,
some, sidzikite, simuklutwe,
sibe ngimihambima lete emakhaya.
12Siyaphishaneka sisebente ngetandla tetfu.
Sitsi setfukwa sibe sibusisa;
sitsi sitingelelwa kuhlushwa,
sibe sicinisela.
13Sitsi sinyembenywa,
sibe sikhuluma ngemoya lomuhle.
Kuze kube ngulamuhla
sentiwa tibi temhlaba,
nekungcola kwetintfo tonkhe.
14Anginibhaleli loku ngobe ngicondze kunidlisa ngemahloni, kodvwa ngiyaneluleka njengebantfwabami lengibatsandzako. 15Nome nine ningaba nebeluleki labati-10 000 kuKhristu, nite boyihlo labanyenti; ngobe mine nganitala kuKhristu Jesu ngeliVangeli. 16Ngako-ke ngiyanincenga kutsi nilingise mine. 17Ngaloko-ke sengitfumele kini Thimothi, longumntfwanami lengimtsandzako nalowetsembekile eNkhosini. Nguye-ke lotanikhumbuta ngekuhamba kwami lokukuKhristu Jesu, njengobe ngifundzisa etindzaweni tonkhe nasemabandleni onkhe.
18Kepha labanye sebayatikhukhumeta, shangatsi angiseyikuta lapho kini. 19Kodvwa ngitawufika lapho kini masinyane, iNkhosi nayivuma, ngitetibonela, hhayi emavi alabo labatikhukhumetako, kodvwa emandla abo. 20Ngobe umbuso waNkulunkulu awuyi ngemagama ekutjelwa, kodvwa uya ngemandla. 21Manje-ke nifunani? Nifuna ngite kini nendvuku, nome ngite nelutsandvo nemoya lomuhle?
