1 kubaseKorinthe 13

₁Nome ngikhuluma ngetilimi tebantfu

netetingilosi,

kepha nangite lutsandvo,

ngiyatikhulumela nje,

ngifanana nelitfusi lelikhencetako

nome insimbi lencencetsako.

₂Nome ngingaphrofetha

ngati timfihlakalo tonkhe,

nelwati lonkhe,

nome nginekukholwa lokukhulu

kangangekutsi ngingasusa tintsaba,

kepha nangite lutsandvo,

angisiyontfo yalutfo.

₃Nome ngingephana ngako konkhe lenginako

ngondle timphuya,

nome futsi nginganikela

ngisho nangemtimba wami kutsi ushiswe,

kodvwa nangite lutsandvo,

akungisiti ngalutfo.

₄Lutsandvo luyabeketela,

lutsandvo lumnene,

lute umona, lutsandvo alutigabatisi,

futsi alutikhukhumeti.

₅Lutsandvo alutiphatsi ngalokungakafaneli,

alutifuneli kwalo,

alucansuki, alunamagcubu,

₆alukujabuleli lokubi,

kodvwa lujabulela liciniso.

₇Lutsandvo lubeketelela tintfo tonkhe,

lukholwa tintfo tonkhe,

lwetsemba tintfo tonkhe,

lukhutsatelela tintfo tonkhe.

₈Lutsandvo alusoze luphele;

kepha nome kukhona kuphrofetha,

kuyawuphela;

nome kukhona tilimi, tiyawuphela;

nome kukhona lwati, luyawuphela.

₉Ngobe sati incenye, futsi siphrofetha incenye;

₁₀kepha nase kufike lokuphelele,

loko lokuyincenye kuyawuphela.

₁₁Ngesikhatsi ngisengumntfwana

ngakhuluma kwebuntfwana,

ngacabanga kwebuntfwana,

ngacondza kwebuntfwana.

Ngesikhatsi sengiyindvodza

ngakuyekela kuntfwanata.

₁₂Ngobe nyalo sibona esibukweni kaluvitsi,

kodvwa ngale siyawubukana buso nebuso.

Nyalo ngati lokuncane,

kepha ngale ngiyawukwati ngalokuphelele,

njengobe ngatiwa ngalokuphelele.

₁₃Kutsatfu lokuyawuhlala kumile:

kukholwa, kwetsemba, nelutsandvo.

Kodvwa lokukhulu kunako konkhe lutsandvo.