Pesalema 78

Lona tjhaba sa ka,

mamelang thuto ya ka,

sekehelang dipolelo tsa ka tsebe.

₂Molomong wa ka ho tla tswa maele,

ke bolele dilotho tsa boholoholo.

₃Tseo re di utlwileng, ra di tseba,

e leng tseo re di phetetsweng,

ra di phetelwa ke bo-ntata rona.

₄Ha re na ho di patela bana ba bona,

empa re tla phetela moloko o tlang

dithoko tsa Morena, le matla a hae,

le dimakatso tseo a di entseng.

₅O ile a fa leloko la Jakobo ditemoso,

a beela Iseraele Molao;

a laela bo-ntata rona

ho o tsebisa bana ba bona,

₆hore o tle o tsejwe

ke meloko e tlang,

le ke ba tlang ho tswalwa,

bona ba tle ba o phete

ba o phetele bana ba bona,

₇e le hore le bao

ba tle ba tshepe Modimo,

ba se ke ba lebala

mesebetsi ya Modimo,

ba mpe ba boloke melao ya hae.

₈Ba se ke ba tshwana le bo-ntata bona,

bao e bileng moloko o manganga,

moloko wa befetohedi;

moloko oo maikutlo a wona

a neng a sa tsepama,

moloko oo moya wa wona

o sa tshepahaleng ho Modimo.

₉Bana ba Efraime,

leha e ne e le ditsebi

ho fula ka diqha,

ba na ba baleha

mohla letsatsi la ntwa.

₁₀Ha ba a ka ba boloka selekane,

selekane sa Modimo,

ba hana ho tsamaya

ka Molao wa hae.

₁₁Ba lebala diketso tsa hae,

ba lebala le dimakatso tsa hae,

tseo a ba bontshitseng tsona.

₁₂Naheng ya Egepeta,

thoteng tsa Sowane,

a etsa dimakatso pontsheng,

pontsheng ya bo-ntata bona.

₁₃A phatlola lewatle ka lehare,

a ba tshedisa,

a emisa metsi jwaloka qubu.

₁₄Motsheare a ba etella pele ka leru,

bosiu bohle ka kganya ya mollo.

₁₅A petsola mafika lehwatateng,

a ba fa metsi a mangata,

metsi a kang a bodiba;

₁₆a kollisa melatswana lefikeng,

a phallisa metsi

jwaloka hoja ke a noka.

₁₇Empa ba nna ba eketsa

ho mo sitelwa,

ba fetohela Ya Hodimodimo,

ba mo fetohela

ba le naheng e tshehla.

₁₈Pelong tsa bona ba leka Modimo,

ba batla dijo tseo ba di lakatsang.

₁₉Ba hanyetsa Modimo, ba re:

“Ebe Modimo a ka hla a tseba

ho re lokisetsa dijo

lehwatateng moo?

₂₀Ke nnete, o ile a otla lefika,

metsi a phutsalla,

le dinokana tsa phorosela;

ebe a ka tseba ho re fa bohobe,

le ho fepa tjhaba sa hae nama?”

₂₁Yare Morena ha a utlwa a halefa,

malakabe a mollo a laima,

a laimela ba leloko la Jakobo,

kgalefo ya hae ya tlokela Iseraele;

₂₂hobane ba ne ba sa dumele,

ba sa dumele ho Modimo,

ba sa tshepe ho pholoswa ke yena.

₂₃Yaba o laela maru a mahodimo,

o bula menyako ya mahodimo;

₂₄a ba nesetsa manna

e be dijo tsa bona,

a ba nea koro ya lehodimo.

₂₅Motho a ja bohobe ba mangeloi,

a ba fa kgora ya dijo.

₂₆Hodimo sebakeng a fokisa moya,

a fokisa moya wa botjhabela,

ka matla a hae

a tlisa moya wa borwa;

₂₇a ba nesetsa nama

jwalokaha eka ke lerole,

le nonyana tse fofang,

jwalokaha eka ke hlabathe la lewatle,

₂₈a di theolela kahara diahelo tsa bona,

ho potapota ditente tsa bona,

₂₉ba eja, ba kgora haholo;

a ba fa seo ba neng ba se lakatsa.

₃₀Yare ba eso kgotsofatse

takatso ya bona,

ba sa ntse ba entse methamo,

₃₁kgalefo ya Modimo

ya ba wela hodimo,

a bolaya dikwankwetla tsa bona,

bahlankana ba Iseraele

a ba rapalatsa,

a ba rapalatsa fatshe.

₃₂Leha ho le jwalo,

ba nnile ba mo sitelwa,

ba se ke ba dumela

dimakatso tsa hae.

₃₃Yaba o fedisa matsatsi a bona

o a fetola lefeela,

lemo tsa bona

ya eba tsa matshabeho.

₃₄Eitse ha Modimo a ba bolaya,

ba qala ho mmatla,

ba kgutlela ho yena,

ba mmatla hape;

₃₅ba boela ba hopola

hore Modimo ke lefika la bona,

Modimo Ya Hodimodimo

ke molopolli wa bona.

₃₆Ba ne ba ye ba mo qekise

ka melomo ya bona,

ba mo thetse ka maleme a bona;

₃₇athe ba ne ba sa tshepahale,

ba sa tshepahale ho yena,

ba sa tshepahale selekaneng sa hae.

₃₈Empa yena,

ka ho ba utlwela bohloko,

a ba tshwarela molato wa bona,

a se ke a ba timetsa;

ka makgetlo

a kokobetsa kgalefo ya hae,

bohale ba hae ba se ke ba tlokoma.

₃₉A hopola hore ke ba nama le madi,

ke moya o ikelang,

moya o ke keng wa hlola o kgutla.

₄₀Ke hakae ba ileng ba mo fetohela,

ba mo fetohela feelleng,

ba mo kgopisa lehwatateng!

₄₁Ba nna ba leka Modimo kgafetsa,

ba utlwisa Ya Halalelang bohloko,

Ya Halalelang wa Iseraele!

₄₂Ba lebala matla a letsoho la hae,

le letsatsi leo ka lona

a neng a ba lopolle

direng tsa bona,

₄₃ha a ne a etsa

dipontsho tsa hae Egepeta,

le dimakatso tsa hae

naheng ya Sowane.

₄₄A fetola metsi a dinoka tsa bona,

a a fetola madi,

le a melatswana ya bona,

hore ba sitwe ho nwa.

₄₅A ba romela diboba tsa ba loma,

le dihohwana tsa ba senyetsa.

₄₆Masimo a bona a a neella seboko,

tholwana tsa mosebetsi wa bona,

tsa jewa ke ditsie.

₄₇Morara wa bona a o senya ka sefako,

le fate tsa bona tsa feiye ka lebabo.

₄₈Dikgomo tsa bona

a di bolaya ka sefako,

le mehlape ya bona ka letolo.

₄₉A ba futuhela ka kgalefo e tukang,

ka bohale, le makwebeta,

le ka matshwenyeho;

a ba romela mangeloi a timetsang.

₅₀A se ke a kokobetsa kgalefo ya hae,

leha e le ho ba phemisa lefu;

a ba bolaya ka lefu la sewa.

₅₁A bolaya matsibolo wohle a Egepeta,

bana ba matswathaka,

ba metlotlwane ya Kama.

₅₂Jwale a kganna tjhaba sa hae,

a se kganna jwaloka dinku,

a se tsamaisa lehwatateng,

a se tsamaisa jwaloka mohlape.

₅₃A ba etella pele ba sireletsehile,

tshabo ba se na yona,

dira tsa bona

tsa kwahelwa ke lewatle.

₅₄A ba fihlisa naheng ya hae,

naheng e halalelang,

le thabeng eo a ikgapetseng yona,

a e hapa ka tsoho la hae le letona.

₅₅A leleka ditjhaba pela bona,

a ba sehela

moo e tla ba lefa la bona,

a ahisa meloko ya Iseraele,

a e ahisa metlotlwaneng ya tsona.

₅₆Empa ba leka Modimo

Ya Hodimodimo,

ba mo leka ka ho mo fetohela,

ba se ke ba mamela

ditemoso tsa hae;

₅₇ba kweneha, ba hloka botshepehi,

ba bo hloka jwaloka bo-ntata bona,

ba kgutlalla

jwaloka seqha se sa tiyang.

₅₈Ba mo phephetsa

ka ho ikahela dibaka tsa borapedi,

ba mmakela lefufa

ka medimo ya bona,

medimo ya bona ya bohata.

₅₉Ha Modimo a bona hoo, a halefa;

a lahla Iseraele ho hang.

₆₀Yaba o furalla Leaho la hae la Shilo,

e leng tente eo a neng a e hlomile,

a e hlomile hara batho.

₆₁Areka ya selekane sa hae a e tlohela,

a e tlohella ho haptjwa,

areka e bonahatsang tlotla ya hae

ya wela matsohong a sera.

₆₂A tlohela tjhaba sa hae,

a se tlohella ho bolawa ka sabole,

a halefela bao e leng lefa la hae.

₆₃Mollo wa timetsa

bahlankana ba bona,

barwetsana ba se ke ba binelwa,

ba binelwa pina tsa lenyalo.

₆₄Baprista ba bona

ba bolawa ka sabole,

bahlolohadi ba se ke ba bina,

ba bina kodi-ya-malla.

₆₅Jwale Morena a phaphama

jwalokaha eka o ne a kgalehile,

jwaloka mohale ya neng a tahilwe.

₆₆A otla dira tsa hae dibonong,

tsa hlajwa ke dihlong

ka ho sa feleng.

₆₇Yaba o lahla motlotlwane wa Josefa,

leloko la Efraime

a se ke a le kgetha;

₆₈empa a kgetha leloko la Juda,

thaba ya Sione eo a e ratang.

₆₉A haha Sehalalelo sa hae

a se haha jwaloka leaho la lehodimo,

jwaloka lefatshe leo a le theileng,

a e theetseng mehla yohle.

₇₀A kgetha Davida, mohlanka wa hae,

a mo tlosa masakeng a dinku,

₇₁a mo tlohedisa nku tsa ditswetse,

a mo disisa leloko la Jakobo,

tjhaba sa hae,

Iseraele eo e leng lefa la hae.

₇₂Davida a ba disa ka pelo

e se nang kodi,

a ba tsamaisa ka letsoho le bohlale.