Pesalema 76

₂Modimo o a tsejwa naheng ya Juda,

lebitso la hae le leholo Iseraeleng.

₃Motlotlwane wa hae o Salema,

leaho la hae le Sione.

₄Ke moo a robileng metsu,

metsu e bebang ya seqha,

le thebe, le sabole, le hlomo tsa ntwa.

₅O kganya hakaakang,

o tlotleha hakaakang,

ha o kgutla dithabeng tsa tlholo!

₆Dinatla di hlakotswe kgapo ya tsona,

tsa robala boroko ba lefu;

bahlabani bohle

ba sitilwe ho itwanela.

₇Yare ha o kgalemela,

wena Modimo wa Jakobo,

dikariki le dipere tsa ntwa tsa fetoha,

tsa fetoha diemahale.

₈Wena, o a tshabeha!

Ke mang

ya ka emang kapele ho wena,

a ema teng ha o halefile?

₉O dihile kahlolo o le lehodimong,

lefatshe la tshoha, la kgutsa,

₁₀ha Modimo a ema ho ahlola bohle,

le ho pholosa bohle,

bohle ba eisehang ba lefatshe.

₁₁Kgalefo ya batho

e tla o fetohela thoriso,

ba phonyohileng kgalefo ya hao

ba tla o etsetsa mekete.

₁₂Etsang dikano,

le di etsetse Morena Modimo wa lona,

le be le di phethe;

ditjhaba tsohle tse kamathoko

di nyehelle Ya Tshajwang,

₁₃yena ya fedisang boikgohomoso,

boikgohomoso ba mahosana,

yena ya tshajwang

ke dikgosi tsa lefatshe.