Pesalema 57

₂Nkgauhele, oho, Modimo nkgauhele,

hobane ke tshabela ho wena.

Ke tshabela moriting

wa mapheo a hao,

ho fihlela koduwa e ba e feta.

₃Ke ipiletsa ho Modimo,

Ya Hodimodimo,

yena Modimo ya nketsetsang tsohle.

₄A le mahodimong, a ke a nthusetse;

a ferekanye ya nkgatakelang.

Modimo a ntshitse

ka mohau wa hae,

a mpontshe botshepehi ba hae.

₅Ke dutse hara ditau

tse harolang batho;

meno a tsona

a ka marumo le metsu,

maleme a tsona

a ka sabole tse bohale.

₆Modimo, bontsha hore

o okametse mahodimo,

tlotla ya hao

e phahamele lefatshe lohle.

₇Ba tjhehile maoto a ka ka leraba,

mme moya wa ka o siame;

ba ntjheketse lemena,

empa ke bona

ba wetseng ka ho lona.

₈Pelo ya ka e matlafetse, Modimo,

pelo ya ka e matlafetse;

ke tla bina, ke o roke.

₉Tsoha, moya wa ka;

tsohang, lona thomo le harepa;

ke tla tsoha mafube a eso hlahe.

₁₀Morena, ke tla o boka hara ditjhaba,

ke o roke hara merabe;

₁₁hobane mohau wa hao o moholo,

o fihla mahodimong,

le botshepehi ba hao

bo fihla marung.

₁₂Modimo, bontsha hore

o okametse mahodimo,

tlotla ya hao

e phahamele lefatshe lohle.