Pesalema 14

Ka pelong sethoto se re:

“Ha ho na Modimo.”

Diketso tsa batho di bodile,

di a nyonyeha,

ha ho le ya mong ya etsang tse ntle.

₂Morena, a le mahodimong,

o tadima bana ba batho,

ho bona hore na ho teng

ya utlwisisang,

ya batlang Modimo.

₃Bohle ba kgelohile,

ba senyehile kaofela;

ha ho ya etsang tse ntle,

ha ho le ya mong.

₄Na baa bohle ha ba na tsebo,

baa ba etsang tse sa lokang,

baa ba itjellang setjhaba sa ka,

jwalokaha ba eja bohobe,

ba sa ipiletse ho Morena?

₅Jwale ba tla tshoha haholo,

ba tshohe,

hobane Modimo o ka thekong,

ya moloko o lokileng.

₆Lona le ka soma merero

ya ya hlophehileng,

empa Morena ke setshabelo sa hae.

₇E se eka pholoho ya Iseraele

e ka tswa Sione!

Mohla Morena a kgutlisang

setjhaba sa hae,

a se kgutlisa bothopuweng,

Jakobo o tla nyakalla,

Iseraele le yena a thabe.