JOBO 3

₃“Tsatsi la tswalo ya ka

le ke le timele,

le bosiu boo ka bona

ho neng ho thwe:

‘Ho emotswe ngwana moshanyana!’

₄Tsatsi leo le ke le fetohe lefifi,

Modimo ya hodimo a le lebale,

sedi le se hlole le le tjhabela hape.

₅Le metswe ke fifi la bo-nka-ntjana,

leru le aparele tsatsi leo,

fifi le fifatse sedi la lona.

₆Bosiu boo bona bo fifalle ruri,

bo se balellwe le matsatsi a selemo,

bo se ballelwe le matsatsi a dikgwedi.

₇Ka boo bosiu ho se tswalwe lesea,

le mehoo ya thabo e se utlwahale.

₈Barohaki ba matsatsi

ba ke ba bo rohake,

bona ba tsebang

le ho tshwenya kganyapa.

₉Naledi di se ke tsa phatsima,

bo batle lesedi, bo se le fumane,

bo se ke ba bona ha tsatsi le tjhaba,

₁₀hobane ha bo a ka

ba kwala mme popelo,

ha bo a ka

ba nthibela ho bona maswabi.”

₁₁“Ke hobaneng

ke sa shwelang popelong?

Ke hobaneng

ke sa shwang ha ke tswalwa?

₁₂Ke hobaneng nkileng ka sikwa?

Ke hobaneng ke antseng matswele?

₁₃Jwale nkabe ke rapame, ke kgutsitse,

ke ithobaletse,

ke phomotse ka kgotso,

₁₄ke phomotse le dikgosi

le matona a kwano,

bao mehaho ya bona e leng mabitla,

₁₅le mahosana a kgabang ka kgauta,

ao matlo a wona a tletseng silefera;

₁₆ke epetswe jwaloka sefolotsana,

jwaloka lesea le eso bone lesedi.

₁₇Lebitleng ba kgopo ba a kgaotsa,

ba kgaotsa ho ferekanya,

ba kgathetseng,

teng ba fumana phomolo.

₁₈Ba thopilweng

le bona ba phela ka kgotso,

ha ba sa utlwa

mokataki a kgarumaka.

₁₉Ba hlomphehang le ba eisehang

ba a lekana,

kgoba le holotswe

kgobeng ba monga lona.”

₂₀“Ba ditlokotsing

ba bontshetswang lesedi?

Ba tubehileng moyeng

ba neelwang bophelo?

₂₁Ba labalabela lefu, ha le ba fihlele,

ba le batla

le ho feta letlotlo, patuwe.

₂₂Ba thaba ka thabo e fetisisang,

ba nyakalle ha ba kena ka lebitleng.

₂₃Ya fihlametsweng ke tsela

o tswaletsweng,

athe Modimo

o mo raletse mathibela?

₂₄Bakeng sa ho ja

ke tlelwa ke mefehelo,

medumaelo ya ka

e phutsalle sa diphororo!

₂₅Seo ke se tshabang

se nkwetse hodimo,

seo ke se tshohileng

jwale se mphihletse.

₂₆Ke hloka kgotso,

ke hloka le boikgutso;

ke hloka phomolo,

tsietsi di nkapere!”