JEREMIA 30

“Re utlwile seboko

se bakwang ke tshabo,

seboko sa tshabo e seng sa kgotso.

₆Inahaneng ke hona,

le be le botse:

Na monna a ka beleha ngwana?

Ke hobaneng ha banna

ba itshwere matheka,

ba itshwere sa mosadi a kena tlung?

Ke hobaneng

ha fahleho tsohle di pudufetse?

₇Jo, tsatsi leo le leholo haholo!

Ha ho na le ka tshwanang le lona:

Ke tsatsi la tlokotsi ya tjhaba sa ka,

empa tjhaba seo

se tla phonyoha ho yona.

₈“Ka tsatsi leo,

ho rialo Morena mabotho,

ke tla roba joko e molaleng wa sona,

marapo a se tlammeng ke a kgaole,

se se hlole se sebeletsa baditjhaba.

₉Se tla sebeletsa Morena,

Modimo wa sona,

se sebeletse Davida, kgosi ya sona,

yena eo ke tla mmea

ho ba kgosi ya sona.

₁₀“Ka baka leo, se tshabe letho,

wena mohlanka wa ka Jakobo,”

ho rialo Morena.

“Se tsielehe, wena Iseraele,

ke tla o pholosa

o le bakeng se hole,

ke lopolle tloholo tsa hao

naheng ya bothopuwa;

tjhaba sa ka se tla kgutla,

se phele ka kgotso,

se phele ka boiketlo,

ho se ya se tshosang.

₁₁Ke na le wena, ke tla o pholosa,”

ho rialo Morena.

“Le hoja ka tla timetsa

ditjhaba tsohle,

tjhaba tseo le tletsatletseng

hara tsona,

wena ha nka ke ka o timeletsa ruri.

Leha ke o kgalemela

e tla ba ka toka,

nke ke ka o tlohela ke sa o otla.”

₁₂Morena o bua tjena:

“Maqeba a hao ke a sa foleng,

kotsi tsa hao ke tse sa phekoleheng.

₁₃Ha ho ya o buellang nyeweng,

diso tsa hao ha di na pheko,

ha ho na tshepo ya hore o tla fola.

₁₄Bohle ba o ratang ba o lebetse,

ha ba sa re letho ka wena;

ke o otlile sa sera se o otla,

ka o tuba sa ya sehloho a o tuba,

ka baka la bongata

ba makgopo a hao,

hoba dibe tsa hao

di ile tsa eketseha.

₁₅O llisetswang

ke matshwenyeho a hao?

Bohloko ba hao

ke bo sa phekoleheng!

Ka baka la bongata

ba makgopo a hao,

le ka baka la bongata

ba dibe tsa hao,

tsena ke entse hore di o hlahele.

₁₆Bohle ba o timetsang

le bona ba tla timetswa,

dira tsa hao tsohle

di tla thopuwa.

Ba o hanyapetsang

ba tla hanyapetswa,

ba o hapelang

le bona ba tla hapelwa.

₁₇Ke tla o phekola,

ke fodise maqeba a hao,”

ho rialo Morena,

“hoba ba ile ba o bitsa Molahluwa,

ba re: Ena ke Sione

e sa natsweng ke motho.”

₁₈Morena o bua tjena:

“Ke tla kgutlisa tjhaba sa ka,

ke se kgutlisetse naheng ya sona,

lelapa ka leng ke le hauhele.

Masupi a Jerusalema a tla tsoswa,

le yona ntlo ya bokgosi

e be e tsoswe.

₁₉Baahi ba yona

ba tla bina dithoko,

mehoo ya thabo

le yona e utlwahale.

Palo ya bona ke tla e eketsa,

mme ha ba ka ke ba fokotseha.

Ke tla be ke ba tlisetse tlotla,

ba ke ke ba hlola ba nyediseha.

₂₀Bana ba bona ba tla tshwana

le mehleng ya kgale,

tjhaba sa bona se tsitse

ke ntse ke se bona;

bahatelli ba bona bohle

ke tla ba otla.

₂₁Kgosi ya bona

e tla hlaha hara bona,

kgosana ya bona

e be e mong wa bona;

ke tla e atametsa,

e be haufi le nna.

Ya tla ba le sebete

sa ho nkatamela ke mang?”

ho rialo Morena.

₂₂“Lona le tla ba setjhaba sa ka

nna ke be Modimo wa lona.”

₂₃Setsokotsane sa Morena

se ferella se halefile,

ke tsokotsane se puputlang

se sa kgaotse;

se tla theohela

hodima hlooho tsa ba kgopo.

₂₄Kgalefo e tlokomang ya Morena

ha e na ho kgaotsa

ho fihlela Morena

a phethile morero wa hae;

mehleng e tlang

le tla ultwisisa tsena hantle.