ESAYA 5

₁Moratuwa wa ka

ke tla mminela sefela,

ke binele tshimo ya hae sefela,

tshimo ya hae ya morara;

moratuwa o ne a ena le tshimo

rallaneng le mobu o motle.

₂A e kgatha, a hleka majwe ho yona,

ho yona a lema

morara o motlemotle,

a haha kalana bohareng ba yona,

a ba a e tjhekela setlhotlelo,

a lebella hore e behe

morara o monate,

empa ya beha morara wa hlahlaane.

₃“Lona banna ba Jerusalema

le banna ba Juda,

a ke le ahlole pakeng tsa ka,

le tshimo ya ka ya morara.

₄Nkabe ke etseditse tshimo ya ka eng,

ho feta seo ke e etseditseng sona?

Ha ke ne ke lebeletse

hore e behe morara o monate,

ho tlile jwang

hore e behe morara wa hlahlaane?

₅Ke tla le bolella seo ke tla se etsa,

ke se etse

tshimong ya ka ya morara:

Motero wa yona

ke tla o tlosa e fetohe lekgulo,

mabota a yona ke a heletse,

a hatakelwe ka maoto.

₆Ke tla e tlohela e senyehe,

morara o ke ke wa faolwa

kapa wa lemelwa,

hlabahlabane le meutlwa

di tla mela ho yona,

ke thibele maru

a se ka e nesetsa pula.”

₇Tshimo ya morara

ya Morena wa mabotho,

ke ntlo ya Iseraele,

tjhaba sa Juda

ke semela se mo kgahlang;

Morena a batla toka,

empa a e hloka,

bakeng sa ho loka

ya eba dillo le tshollo ya madi.

₈Ho madimabe lona

ba inkelang matlo a batho,

lona ba itjellang masimo a batho,

ho fihlela baka sohle e le sa lona,

le phela le le inotshi naheng eo.

₉Morena wa mabotho

o nnyenyeleditse, a re:

“Matlo a mangata

a tla sala e le dithako,

matlo a maholo, a matle,

a hloke baahi.

₁₀Diakere tse leshome

tsa tshimo ya morara

di tla beha dilethara

tse robedi feela tsa veine;

peo e etsang dilethara

tse lekgolo le mashome a robedi

e behe dilethara

tse leshome le metso e robedi,

tse kaalo feela tsa koro.”

₁₁Ho madimabe

ba tsohellang jwaleng,

ka madungwadungwana,

ba inwellang ho fihlela bosiu,

ba tahwe ke veine.

₁₂Meketeng ya bona

ba letsa harepa le dikatara,

ba tidinye meropa le makodilo,

ba nwe veine;

mosebetsi wa Morena

wona ha ba o natse,

tseo a di entseng tsona

ha ba di bone.

₁₃Ka baka leo,

tjhaba sa ka se tla thopuwa

hoba tjhaba sena

se hloka kutlwisiso;

bahlomphehi ba sona

ba tla bolawa ke tlala,

bongata ba sona

bo tla shwa ke lenyora.

₁₄Kahoo lebitla le ba lapetse,

le se le ahlame, le ba emetse;

kgabane tsa bona le matshwele

di theohela teng,

di theohela le menyaka

le marata a tsona.

₁₅Bohle ba tla nyenyefatswa,

ba kokobetswe,

baikakasi le bona ba kokobetswe.

₁₆Morena wa mabotho

o tla ba phahamela kahlolong,

Modimo ya halalelang

o tla iponahatsa,

ka ho loka a iponahatse a halalela.

₁₇Dinku di tla fula

eka ke makgulong a tsona,

dikonyana tsona di fule

thakong tsa barui.

₁₈Ho madimabe

ba ikgulelang bokgopo,

ka thapo tsa mafeela,

ba ikgulelang sebe

jwalokaha kariki e hulwa;

₁₉ba reng:

“Modimo a akofise mesebetsi ya hae

re e bone,

merero e atamele,

merero ya Ya Halalelang wa Iseraele

e atamele re tle re e tsebe.”

₂₀Ho madimabe ba reng

bobe ke ho loka,

ho loka ke bobe,

ba reng lefifi ke lesedi,

lesedi ke lefifi,

ba reng ho babang ho monate,

ho monate ho a baba.

₂₁Ho madimabe ba reng ba bohlale,

bona ba iponang ba le masene.

₂₂Ho madimabe ba reng

ha ba hlolwe ke jwala,

ba reng ba tseba haholo

ho tswaka dino;

₂₃ba lokollang ya molato

ka baka la tjotjo,

ya se nang molato

yena ba mo hlokele toka.

₂₄Ka baka leo, ba tla tjha

sa ditlhaka di tjheswa ke mollo,

ba tjhe sa matlakala

a tjheswa ke malakabe,

metso ya bona e tla bola,

thunthung tsa bona

di fefohe jwaloka lerole,

hobane ba furaletse molao

wa Morena mabotho,

ba nyedisitse polelo

tsa Ya Halalelang wa Iseraele.

₂₅Ka baka leo, kgalefo ya Morena

e tlokomela tjhaba sa hae,

o phahamisitse tsoho la hae,

o a ba otla, thaba di a reketla,

topo tsa bona eka matlakala

hara seterata.

Leha ho le jwalo,

kgalefo ya hae ha e kgaotse,

tsoho la hae

o ntsa le phahamisitse.

₂₆O phahamiseditse

tjhaba tse hole mokgele,

ba pheletsong tsa lefatshe

o ba bitsa ka molodi,

ke bana ba etla kapele,

ba potlakile!

₂₇Ha ho le ya mong wa bona

ya kgathalang, a kgothometsehe,

ha ho leqhama

le kgwehlileng thekeng,

ha ho lerapo

la moqathatso le kgaohileng.

₂₈Metsu ya bona e ntjhotjho,

diqha tsa bona di dutse di kobilwe,

tlhako tsa pere tsa bona

eka mahakwe,

mabidi a koloi tsa bona tsa ntwa

eka setsokotsane.

₂₉Ho puruma ha bona ho ka ha tau,

ba puruma jwaloka ditawana,

ba a rora

ha ba tshwara phofu ya bona,

ba e hlasinye

ho se ya ka e pholosang ho bona.

₃₀Tsatsing leo, ba tla puruma

ba e hateletse,

ba purume sa lewatle le hwasa.

Etlare ha motho a tadima lefatshe

a bone lefifi le ditlallo,

lesedi le lona

le fifaditswe ke maru.