ESAYA 45

₁“Morena o bua tjena

ho motlotsuwa wa hae,

e leng Siruse eo ke utlileng

tsoho la hae le letona,

hore a kokobetse

tjhaba tse kapele ho yena.

Nna ke tla amoha dikgosi

matla a ho lwana,

ke bule mamati a kapele ho yena,

menyako ya wona

e se hlole e kwalwa.

₂Ke tla o etella pele,

ke batalatse dithaba,

menyako ya lethose ke e thuake,

mekwallo ya tshepe ke e robake.

₃Ke tla o nea matlotlo

a patilweng hara mafifi,

maruo a patilweng

dikgotjheletsaneng,

o tle o tsebe hore ke nna Morena,

Modimo wa Iseraele,

ya o bitsang ka lebitso.

₄Ka baka la Jakobo,

mohlanka wa ka,

ka baka la Iseraele,

mokgethwa wa ka,

ke o bitsitse ka lebitso la hao,

ka o rea bitso le hlomphehang

leha o sa ka ntseba.

₅“Ke nna Morena, ha ho na e mong,

kantle ho nna ha ho na Modimo.

Ke tla o matlafatsa,

le hoja o sa ntsebe,

₆e le hore ho tloha botjhabela

ho ya bophirimela

tjhaba di tsebe

hore ha ho e mong kantle ho nna.

Ke nna Morena, ha ho na e mong.

₇Ke etsa lesedi, ke etsa lefifi,

ke a pholosa ke be ke timetse,

nna Morena,

tsena tsohle ke a di etsa.

₈“Lona mahodimo

theolelang toka lefatsheng,

maru a ke a nesetse lefatshe,

a le nesetse ho loka,

lefatshe le tle le itsibole,

ho tle ho hlahe

tholwana tsa pholoho,

toka e hole hammoho le tsona;

nna Morena, tsena di entswe ke nna.”

₉“Ho madimabe

ya tsekisanang le Mmopi wa hae,

yena e leng lengetana

hara mangetana!

Na letsopa

le ka re ho sebopi sa lona:

‘O etsang?’

Na mosebetsi wa hao o ka re:

‘Ha o na tsebo’?

₁₀Ho madimabe ya reng ho ntatae:

‘O tswetseng?’

Kapa ya reng ho mmae:

‘O belehileng?’

₁₁“Morena, Ya Halalelang wa Iseraele,

Mmopi wa hao o bua tjena:

Na o ka mpotsa tse tla etsahala

ho bana ba ka?

Kapa wa ntaela mabapa

le mosebetsi wa matsoho a ka?

₁₂Ke entse lefatshe

ka ba ka le bopela motho,

esita le mahodimo

ka a ala ka matsoho a ka,

le dinaledi tsohle tsa lehodimo

di laelwa ke nna.

₁₃Ka ho loka ha ka

ke susumeditse Siruse,

tsela tsa hae tsohle

di tla otlollwa ke nna.

O tla tsosa marako a motse wa ka,

a be a lokolle bathopuwa ba ka,

a ba lokolle

ntle ho theko kapa moputso,”

ho rialo Morena wa mabotho.

“Matlotlo a Egepeta

le thepa ya kgwebo ya Kushe,

le banna ba diqhobane

ba naha ya Sheba,

ba tla ineela ho wena

e be ba hao;

ba hulane kamora hao

ba tlanngwe ka mahlaahlela.

Ba tla o obamela,

ba o rapele, ba re:

‘Ruri Modimo o na le wena,

ha ho Modimo e mong

ntle ho yena.’ ”

₁₅Ruri o Modimo ya ipatileng,

wena Mopholosi,

Modimo wa Iseraele.

₁₆Bohle ba etsang medimo ya bohata

ba tla hlajwa ke dihlong,

ba tlontlolohe,

ba ferekane kaofela ha bona.

₁₇Empa Iseraele

o tla pholoswa ke Morena,

a mo pholose

ka pholoho ya mehla yohle,

le ka mohla

a ke ke a hlajwa ke dihlong,

kapa a tlontloloha kamehla yohle.

₁₈Morena, Mmopi wa mahodimo,

yena Modimo ya bopileng lefatshe,

a le etsa,

yena ya ileng a le tsitsisa,

yena ya sa kang

a le bopela lefeela,

ya le bopetseng

hore ho phelwe ho lona,

o bua tjena:

“Ke nna Morena, ha ho na e mong.

₁₉Ha ke a bua sephiring,

kgotjheletsaneng tse lefifi,

ha ke a ka ka re

ho ditloholo tsa Jakobo:

‘Mpatleleng lelea.’

Nna Morena, ke bua ho lokileng,

nna ke bolela tse nepahetseng.”

₂₀“Kgobokanang, le tle,

le atameleng mmoho,

lona ba phonyohileng ho baditjhaba,

dithoto ting! le tsamayang le jere,

le jere medimo ya bohata, ya lehong,

lona ba rapelang medimo

e ke keng ya le pholosa.

₂₁Atamelang

le bolele taba tsa lona,

tlisang medimo ya lona e eletsane.

Ke mang ya boletseng see

e sa le kgale?

Ke mang ya se phatlaladitseng

mehleng e fetileng?

Na e ne e se nna Morena?

Ha ho modimo e mong

kantle ho nna,

Modimo ya lokileng le Mopholosi;

ha ho e mong haese nna feela.

₂₂“Sokolohelang ho nna,

le tle le pholohe,

lona dipheletso tsohle tsa lefatshe;

ke nna Modimo, ha ho na e mong.

₂₃Ke hlapantse ka nna,

molomo wa ka o buile ka ho loka,

lentswe la ka le ke ke la fetohelwa.

Mangwele wohle a tla nkgumamela,

maleme wohle le wona

a ikane ka nna.

₂₄“Batho bohle ba tla bua ka nna,

ba re:

‘Ho loka le matla

di ho Morena a inotshi.’

Bohle ba ileng ba mo halefela,

ba tla tla ho yena,

ba hlabiswe dihlong.

₂₅Empa ho Morena

ditloholo tsohle tsa Iseraele

di tla fumanwa di lokile,

mme di nyakalle.”