ESAYA 32

₁Bonang, kgosi e tla busa

e buse ka ho loka,

mahosana a yona a buse ka toka.

₂Kgosi ka nngwe e tla ka lephephe

ha moya o puka,

e ke setshabelo nakong ya sefefo,

e ke nokana tsa metsi lehwatateng,

e ke moriti wa lefika

naheng e omeletseng.

₃Mahlo a ba bonang a ke ke a fifala,

tsebe tsa ba utlwang di tla mamela.

₄Ba kelello di tatang

ba tla tseba, ba utlwisise,

maleme a mahwelea a rarolohe,

a bue hantle.

₅Sethoto se ke ke sa hlola

se bitswa kgosana,

kapa senokwane

sa hlompheha haholo;

₆hobane sethoto se bua bothoto,

le ho nahana se nahana tse kgopo:

Se etsa tse kgopo,

se bua tsa bohata ka Modimo;

ba lapileng ha se ke se ba fepa,

ba nyorilweng se ba tima metsi.

₇Mekgwa ya senokwane e mebe,

kamehla se rera merero e kgopo,

ho timetsa mafutsana

ka polelo tsa mashano,

leha thapedi ya bahloki

e nepahetse.

₈Empa ya kgabane

o rera merero e kgabane,

bokgabeneng ba hae

a ke ke a sisinngwa.

₉Lona basadi ba iketlileng,

tsohang le mamele lentswe la ka!

Lona barwetsana ba itshepileng,

mamelang seo ke se bolelang!

₁₀Etlare hoba selemo se fetafete,

lona basadi ba iketlileng

le tla thothomela;

morara o kotulwang o tla ba siyo,

le ditholwana

di ke ke tsa eba teng.

₁₁Thothomelang,

lona basadi ba iketlileng!

Tlakaselang,

lona barwetsana ba itshepileng!

Hlobolang aparo tsa lona,

itlameng matheka ka tse mahwashe!

₁₂Llelang masimo a lona

a matlematle,

le llele morara o atlehileng;

₁₃le llele le naha ya tjhaba sa ka,

naha e metseng meutlwa

le hlabahlabane;

llelang matlo wohle a boithabiso,

le llele motse ona wa menyanyako.

₁₄Ntlo ya kgosi

e tla sala e le feela,

mmidimidi o hara motse o fele;

qhobosheane le tora

e tla ba dithako kamehla,

tonki di thalle teng,

le mehlape e fule teng,

₁₅ho fihlela Moya o tswang hodimo

o theolelwa hodima rona,

lehwatata

le fetoha kgwiti ya masimo,

kgwiti eo e tshwana

le moru o teteaneng.

₁₆Toka e tla ba teng lehwatateng,

ho loka ho be teng

hara kgwiti ya masimo.

₁₇Ho loka ho tla beha

tholwana ya kgotso,

ho loka ho tswale

kgutso le letshepa kamehla.

₁₈Tjhaba sa ka se tla phela

naheng e nang le kgotso,

se dule malapeng

a sireletsehileng,

bakeng tsa phomolo

tse hlokang matshwenyeho.

₁₉Leha fako se ka ruthutha

moru wa healla,

motse wa heletswa kahohle,

wa batalla,

₂₀lona le tla ba lehlohonolo haholo,

le jale peo ya lona

mabopong a dinokana tsohle,

pholo le tonki tsa lona

di kgaphelwe sekwai.