ESAYA 10

₁Ho madimabe ba etsang

melao e sa lokang,

le bangodi ba ngolang

melao e hatellang,

₂hore ba amohe mafutsana

tokelo tsa wona,

ba hateletsweng

ba ba hlokise toka,

ba ikgapele ntho tsa bahlolohadi,

ba tlatlape le tsona dikgutsana.

₃Le tla etsang

mohla tsatsi la kahlolo,

le la timelo

e tla tla e etswa hole?

Thuso le tla ya e kopa ho mang?

Maruo a lona le a siye hokae?

₄Ruri le tla borabora

hara batshwaruwa,

kapa le wele hara babolauwa;

leha ho le jwalo

kgalefo ya hae ha e a kokobela,

tsoho la hae o ntsa le phahamisitse.

₅O madimabe wena Asiria,

o leng molamu wa kgalefo ya ka!

Kotjane ya kgalefo ya ka

e tsohong la hao!

₆Ke tla mo romela

tjhabeng sa baetsadibe,

ke mo romele

tjhabeng se nkgalefisang;

ke tla mo laela hore a hape kgapo,

ke mo laele hore a lobele lebobelo,

le ho ba hatakela

sa seretse sa diterata.

₇Empa hona hase hoo a ho rerang,

le ka pelong ya hae

ha a ho nahane,

hoba sepheo sa hae

ke ho timetsa,

ke ho fedisa ditjhaba tse ngata.

₈Yena o re:

“Na balaodi ba ka bohle

hase dikgosi?

₉Na Kalene

ha e tshwane le Karakemishe?

Na Hamate

ha e tshwane le Arepade?

Na Samaria

ha e tshwane le Damaseka?

₁₀Jwalokaha ke hapile mebuso

ya medimo ya bohata,

eo tshwantsho tsa yona di fetang,

tsa Jerusalema le Samaria,

₁₁Jerusalema

le medimo ya yona ya ditshwantsho

ke tla e etsa sa Samaria,

le medimo ya yona ya ditshwantsho.”

“Hona ke ho entse

ka matla a matsoho a ka,

le ka bohlale ba ka,

hobane ke na le kutlwisiso;

ke ile ka suthisa meedi ya ditjhaba,

ka hapa le matlotlo a tsona;

jwaloka ya matla

ka kokobetsa baahi ba tsona.

₁₄Tsoho la ka le fumane

matlotlo a ditjhaba,

la a fumana sa hlaha sa nonyana,

ka bokella naha tsohle mmoho,

sa mahe a setse lepalapaleng,

ha se be le e nngwe e sisinyehang,

kapa e ahlamisang molomo

ho hlaba mokgosi.”

₁₅Na selepe se ka ithorisetsa,

ya rathang ka sona,

kapa yona sakga ya ithorisetsa,

ya sakgang ka yona?

Na molamu o ka nonya

ya o phahamisang,

kapa kotjane

ya tsokotsa motho e se lehong?

₁₆Ka baka leo, Morena,

Morena wa mabotho,

o tla etsa hore

kwankwetla tsa kgosi di tsete,

bakeng sa tlotla ya yona

ho hotetswe mollo

o tukang malakabe.

₁₇Sedi la Iseraele

le tla fetoha mollo,

Ya Halalelang wa hae

a fetohe lelakabe

le tla tjhesa meutlwa

le hlabahlabane,

le di tjhese ka tsatsi le le leng.

₁₈Mokgabo wa meru ya yona

le wa masimo a nonneng,

Morena o tla o timetsa

ho hang ka malakabe,

sa ha mokudi a fella dikobong.

₁₉Fate tsa meru ya yona

di tla sala di le mmalwana,

hoo le ngwana

a ka tsebang ho di bala.

₂₀Mohla tsatsi leo,

masalla a Iseraele,

ba ntlo ya Jakobo

ba ileng ba phonyoha,

ha a sa tla hlola a tshepa

ya ile a a otla,

empa a tla tshepa Morena ka nnete,

yena Ya Halalelang wa Iseraele.

₂₁Masalla a tla boela a kgutla,

masalla a Jakobo

a kgutlele ho Modimo ya matla.

₂₂Leha tjhaba sa hao, wena Iseraele,

se ka hlabathe la lewatle,

ke masalla feela

a tla boela a kgutla.

Morena o se a laotse timetso,

e tla se wela hodimo e le ka toka.

₂₃Morena, Morena wa mabotho,

o tla phethahatsa timetso

e laoletsweng naha yohle.

₂₄Ka baka leo, Morena,

Morena wa mabotho, o re:

“Lona tjhaba sa ka

se phelang Sione,

le se ke la tshaba Baasiria,

bona ba le otlang ka molamu,

ba le phahamisetsang koto

jwalokaha Egepeta e ile ya etsa.

₂₅Haufinyane ho le halefela ha ka

ho tla fela,

kgalefo ya ka

e tobane le ho timetswa ha bona.”

₂₆Morena wa mabotho

o tla ba hweba ka phafa,

jwaloka mohla a otlang Bamediane

fikeng la Orebe.

Molamu wa hae o tla o phahamisa

hodima lewatle,

jwalokaha a na o phahamise

hodima Egepeta.

₂₇Mohla tsatsi leo,

o tla hlohlollwa mojaro wa bona,

joko ya bona

e tloswe molaleng wa hao.

₂₈Sera se hapile Aiata,

sa pholletsa hara Migerone,

sa boloka thoto ya sona Mikemase.

₂₉Ha se etswa lekgalong sa re:

“Bosiung bona

ke tla ya emisa Gobe.”

Rama e tetemisa dirope,

e a thothomela,

Gibea ya Saule yona e a baleha.

₃₀Bokolla, wena moradi wa Galeme!

Thea tsebe le wena Laesha!

Wena Anatote o madimabe!

₃₁Baahi ba Madamene ba a baleha;

baahi ba Gebime

ba batla setshabelo.

₃₂Ka tsatsi lena ba tla emisa Nobe,

ba supe moradi wa Sione

ka setebele,

mane leralleng la Jerusalema.

₃₃Bonang Morena,

Morena wa mabotho,

o tla roba makala ao

ka matla a hae a maholo,

makala a malelele a tla rengwa,

a phahameng wona a tla kgethulwa.

₃₄Meru e teteaneng

o tla e rema ka selepe,

fate tsa Lebanone

di wele kapele ho Ya Matla wohle.