ESAYA 1

₂Lona mahodimo mamelang!

Wena lefatshe thea tsebe!

Morena o buile, a re:

“Ke otlile bana,

ke ba hodisitse,

empa jwale ba mphetohetse.

₃Pholo e tseba monga yona,

tonki e tseba sejelo sa yona,

empa Iseraele yena o hloka tsebo,

tjhaba sa ka sona

ha se na kutlwisiso.”

₄Jo! tjhaba sa baetsadibe

se tletseng bokgopo!

Tloholo tsa ba kgopo,

bana ba bodileng!

Ba furaletse Morena,

ba nyedisitse

Ya Halalelang wa Iseraele,

ba fela ba mo furaletse.

₅Le sa tla boela le otlwa hokae,

ha le ntse le pheella ho mo fetohela?

Hlooho yohle e se tletse maoma,

mmele wohle le wona o a kula.

₆Ha ho bophelo

ho tloha bohatong ba leoto,

ho isa hloohong,

ke maqeba le matetetso

le diso tse petlang,

ha di eso hlatsuwe

kapa tsa tlamiswa,

le ho tlotswa ka ole

ha di eso tlotswe.

₇Naha ya lona e hloka baahi,

metse ya lona e tjhesitswe ke mollo,

baditjhaba ba jesa masimo a lona,

le ntse le ba bona,

baditjhaba ba sentse naha ya lona.

₈Moradi wa Sione o silwe

jwaloka lephephe

tshimong ya morara,

jwaloka motlotlwane

tshimong ya mahapu,

le jwaloka motse

o etseditsweng thibella.

₉Hoja Morena wa mabotho

a se ka re siela mahlatsipa,

re ka be re ile

ra ba jwaloka Sodoma,

re ka be re ile

ra tshwana le Gomora!

₁₀Lona baahi ba Sodoma,

mamelang polelo tsa Morena!

Lona tjhaba sa Gomora,

mamelang molao

wa Modimo wa rona!

₁₁Morena o re:

“Molemo wa mahlabelo a lona

ho nna ke ofe,

mahlabelo a lona a mangatangata?

Ke tennwe

ke nyehelo tsa lona tsa setjheso,

ke tennwe ke mafura a dipheleu

le a phoofolo tse nontshitsweng;

ha ke thabele madi a dipohwana,

le a dikonyana le diphooko.

₁₂Ha le tlilo itlhahisa kapele ho nna,

ke mang ya le kopileng

ho tla hatakela mabala a ka?

₁₃Kgaotsang ho ntlisetsa

nyehelo tse se nang thuso;

mekubetso ya lona

ke manyala ho nna,

mekete ya ho thwasa ha kgwedi

le ya Disabatha,

le phutheho tse halalelang

tseo le di memang,

tsena ke bokgopo,

nke ke ka di mamella.

₁₄Mekete ya lona

ya ho thwasa ha kgwedi,

le mekete ya lona e kgethehileng,

moya wa ka o e hloile,

ho nna e fetohile mejaro,

ke kgathetse ke ho e sikara.

₁₅Ha le phahamisa matsoho

ho ipiletsa ho nna,

ke tla ipata sefahleho;

leha le ka etsa dithapelo tse ngata,

nke ke be ka le mamela,

matsoho a lona a kganathetse madi.

₁₆Itlhatsweng, le itlhwekise,

tlosang ketso tsa lona

tse kgopo mahlong a ka,

le kgaotse ho etsa bokgopo.

₁₇Ithuteng ho etsa tse lokileng,

le ipatlele le yona toka,

kgalemelang mohatelli,

le ahlolele kgutsana hantle,

nyewe ya mohlolohadi

le yona le e emele.

₁₈“Tloong re lokise ditaba,”

ho rialo Morena.

“Leha dibe tsa lona

di ka ba kgubedu,

di tla sweufala jwaloka lehlwa;

leha di ka ba kgubedu tlere!

di tla sweufala jwaloka boya.

₁₉Haeba le rata, le bile le mamela,

le tla ja menono ya fatshe lena;

₂₀haeba le ikganela,

le bile le mphetohela,

le tla bolawa ka sabole,”

ho rialo Morena.

₂₁Motse o tshepahalang

o fetohile seotswa se jwang!

Pele o ne o tletse toka,

ho loka ho ahile hara wona,

empa jwale o tletse babolai.

₂₂Silefera ya wona

e fetohile manya,

veine ya wona

e hlapolotswe ka metsi.

₂₃Babusi ba wona ke mahlabaphiyo,

ba fetohile metswalle ya mashodu,

kaofela ha bona

ba rata tjotjo,

kaofela ha bona

ba labalabela dimpho.

Ha ba ahlolele kgutsana hantle,

nyewe ya mohlolohadi

le yona ha ba e emele.

₂₄Ka baka lena, Morena,

Morena mabotho,

Ya Matla wa Iseraele o re:

“Kgalefo ya ka ke tla e hlatsa,

ke e hlatsetse hodima dira tsa ka,

ke iphetetse ho ba ntwantshang.

₂₅Letsoho la ka le tla o lwantsha,

ke o hlatswisise manya a hao,

ke fedise ho se hlweke ha hao.

₂₆Ke tla o kgutlisetsa baahlodi

ba kang ba pele,

le baeletsi

ba kang ba mehleng ya kgale;

kamorao ho tseo

o tla bitswa motse wa toka,

o bitswe motse o tshepahalang.

₂₇“Toka e tla pholosa Sione,

ba bakang ba pholoswe ke ho loka.

₂₈Mahlabaphiyo le baetsadibe

ba tla ripitlwa,

ba furaletseng Morena

ba tla timela.

₂₉“Le tla hlajwa ke dihlong

ke ho kgumamela fate sa eike,

le swabiswe ke rapa

tseo le di kgathileng.

₃₀Le tla tshwana le fate sa eike,

se ponang mahlaku,

le be jwaloka serapa se omeletseng.

₃₁Motho ya matla

o tla tshwana le twala,

mosebetsi wa hae

o tshwane le tlhase,

motho eo a tjhe le mosebetsi wa hae,

ho se be ya ka timang mollo oo.”