PHALLO 37

₁Besalele a etsa areka ka dithupa tsa sefate sa mositsane; bolelele ba yona e ne e le disenthimethara tse lekgolo le leshome, bophara ba yona e le disenthimethara tse mashome a tsheletseng a metso e tsheletseng, mme bophahamo ba yona e le disenthimethara tse mashome a tsheletseng a metso e tsheletseng. ₂Yaba o e maneha kgauta e hlwekileng kantle le kahare, mme a e etsetsa moqhaka wa kgauta o e potolohang. ₃A e etsetsa mehele e mene ya kgauta maotong a yona a mane: mehele e mmedi ka lehlakoreng la pele, le e meng e mmedi ka lehlakoreng la bobedi. ₄Ka dithupa tsa sefate sa mositsane a etsa mefeng e jarang, mme a e maneha kgauta. ₅Yaba o kgwesa mefeng eo meheleng e mahlakoreng a areka, ho tle ho jarwe areka ka yona.

₆Jwale a etsa sekwahelo sa tefelo ya sebe ka kgauta e hlwekileng; bolelele ba sona e ne e le disenthimethara tse lekgolo le leshome, bophara ba sona e le disenthimethara tse mashome a tsheletseng a metso a tsheletseng. ₇A etsa dikerubime tse pedi tsa kgauta; a di etsa ka kgauta e thutsweng, dintlheng tse pedi tsa sekwahelo sa tefelo ya sebe. ₈Kerubime ya pele e ne e le ka ntlheng ena ya sekwahelo, kerubime ya bobedi e le ka ntlheng yane ya sona. Dintlheng tse pedi tsa sekwahelo sa tefelo ya sebe a etsa dikerubime. ₉Dikerubime di ne di otlolletse mapheo e tsona hodimo, di kgurumeditse sekwahelo sa tefelo ya sebe ka mapheo a tsona, difahleho tsa tsona di tadimane; difahleho tsa dikerubime di tadimile malebana le sekwahelo sa tefelo ya sebe.

₁₀A etsa tafole ka dithupa tsa sefate sa mositsane. Bolelele ba yona e ne e le disenthimethara tse mashome a robong, bophara ba yona e le disenthimethara tse mashome a mane a metso e mehlano, bophahamo ba yona e le disenthimethara tse mashome a tsheletseng a metso a supileng. ₁₁Yaba o e maneha kgauta e hlwekileng, mme a e etsetsa moqhaka wa kgauta o e potolohang. ₁₂A e etsetsa modimako o bophara ba seatla ho e potoloha, le moqhaka wa kgauta o potapotang modimako oo wa yona. ₁₃A e etsetsa mehele e mene ya kgauta, a hokela mehele eo dihukung tse nne tsa maoto a yona a mane. ₁₄Haufi le modimako ho ne ho ena le mehele eo ho yona ho kgweswang mefeng e jarang tafole. ₁₅Ka dithupa tsa sefate sa mositsane a etsa mefeng e jarang tafole, a e maneha kgauta. ₁₆Ka kgauta e hlwekileng a etsa dijana tse tla bewa hodima tafole: mafiso, le mafiswana, le dinwelo, le mepotjwana e sebediswang ha ho nyehelwa.

₁₇A etsa sedulwana sa lebone ka kgauta e hlwekileng. Sedulwana seo sa lebone a se etsa ka kgauta e thutsweng. Madulo a sona, le lenono la sona, le dikgakeletso tsa sona, le dipalesa tsa sona, le dithunthung tsa sona, tsa thulellwa ho sona. ₁₈Lenono la sedulwana le ne le ena le makala a tsheletseng: a mararo a le ka lehlakoreng la pele, a mang a mararo a le ka lehlakoreng la bobedi. ₁₉Lekaleng le leng ho ne ho ena le dikgakeletso tse tharo, tse kang tsa sefate sa perekisi se nang le dipalesa le dithunthung. Lekaleng le leng hape ho ne ho ena le dikgakeletso tse tharo, tse kang tsa sefate sa perekisi, se nang le dipalesa le dithunthung. Ha etswa jwalo makaleng a tsheletseng a tlohang lenonong la sedulwana. ₂₀Sedulwaneng ho ne ho ena le dikgakeletso tse nne, tse kang tsa sefate sa perekisi, se nang le dipalesa le dithunthung. ₂₁Ho ne ho ena le palesa tlasa manono a mabedi a sona, le palesa e nngwe hape tlasa manono a mabedi a sona; le palesa e nngwe hapehape tlasa manono a mabedi a sona. Ha etswa jwalo makaleng a tsheletseng a tlohang lenonong la sedulwana. ₂₂Dipalesa tsa sona, le manono a sona, di ne di thulelletswe le sedulwana, e le ntho e le nngwe, e entsweng ka kgauta e hlwekileng, e thutsweng.

₂₃A etsa mabone a sona a supileng, le matlao a sona, le dithotobolo tsa sona, ka kgauta e hlwekileng. ₂₄Sedulwana sena, le tsohle tsa sona, a di etsa ka kgauta e hlwekileng, eo boima ba yona e leng dikilo tse mashome a mararo a metso e mehlano.

₂₅A etsa aletare ya mokubetso ka dithupa tsa sefate sa mositsane. Bolelele ba yona e ne e le disenthimethara tse mashome a mane a metso e mehlano, bophara ba yona e le disenthimethara tse mashome a mane a metso e mehlano, e ne e ena le mahlakore a mane a lekanang; bophahamo ba yona e le disenthimethara tse mashome a robong. Manaka a yona a ne a entswe ka thupa e le nngwe le aletare. ₂₆A e maneha kgauta e hlwekileng kahodimo, le ka mahlakoreng ho e potoloha, le manakeng a yona. A e etsetsa moqhaka wa kgauta o e potolohang. ₂₇A e etsetsa mefitshane e mmedi ya kgauta tlasa moqhaka wa yona, hodima dihuku tsa yona tse pedi, le hodima mahlakore a yona a mabedi. E tla ba moo ho kgweswang mefeng, hore aletare e tle e jarwe ka yona. ₂₈A etsa mefeng eo ka dithupa tsa sefate sa mositsane, mme a e maneha kgauta.

₂₉A etsa ole e tlotsang, e halalelang, le mokubetso o monko o monate, jwalokaha ho etsa setsebi se tswakang ditlolo.