Amose o bontshwa ditsie
1Sena ke seo Morena Modimo a ileng a mpontsha sona: Ha ho se ho hetswe karolo ya jwang, eo e leng ya kgosi, jwang bo qala ho hloma hape, Morena a hlahisa boiyane ba ditsie. 2Ha ditsie di kokonne naha yohle, ke ile ka howeletsa, ka re: “Morena Modimo, hauhela Jakobo hle! A ka phonyoha jwang? O sa le monyenyane haholo!”
3Yaba Morena o a hauha, o re:
“Sena se ke ke sa etsahala,”
ho rialo Morena.
Amose o bontshwa mollo
4Sena ke seo Morena a ileng a boela a mpontsha sona: Morena Modimo o ne a itokisetsa ho tla ahlola ka mollo, mme mollo o ile wa pshesa madiba a mawatle, wa tjhesa naha. 5Ke ha ke tla howeletsa, ke re: “Oho, Morena Modimo, ako kgaotse hle! Jakobo a ka phonyoha jwang? O sa le monyenyane haholo!”
6Yaba Morena Modimo o a hauha, o re:
“Le sena se ke ke sa etsahala,”
ho rialo Morena Modimo.
Amose o bontshwa kgwele e lekanyang
7Morena a boela a mpontsha sena: Morena o ne a eme pela lerako le hahilweng hantle, le otlolohileng jwaloka kgwele e lekanyang, e neng e le letsohong la hae. 8Morena a mpotsa, a re: “Amose, o bonang?”
Ka araba, ka re: “Ke bona kgwele e lekanyang.”
Morena a re: “Bona! Ke tlilo bea kgwele e lekanyang hara setjhaba sa ka sa Iseraele; ha nka ke ka hlola ke se hauhela.
9“Dibaka tsa borapedi tsa Isaka,
di tla heletswa,
le dihalalelo tsa Iseraele
di fetolwe masupi;
ke tla futuhela ntlo ya Jeroboame,
ke e futuhele ka sabole ya ka.”
Amose le Amasiya
10Yaba Amasiya, moprista wa Bethele, o romela ho Jeroboame, kgosi ya Iseraele, o re: “Amose o ntse a o rerela bora hona mona hara bana ba Iseraele. Naha ha e ka ke ya mamella puo tsena tsa hae. 11Amose o bua tjena:
“ ‘Jeroboame o tla bolawa,
a bolawe ka sabole,
ruri Baiseraele ba tla thopuwa,
ba thopelwe hole,
hole le naha ya habo bona.’ ”
12Yaba Amasiya o bua ho Amose, o re: “Tloha mona, senohe towe! Kgutlela naheng ya Juda kwana! Tsamaya o yo porofetela teng, ba tle ba o ngwathele! 13O se hlole o porofetela mona Bethele, hobane sena ke sehalalelo sa kgosi le tempele ya mmuso.”
14Amose a araba Amasiya, a re: “Ke ne ke se moporofeta kapa mora wa moporofeta, empa ke ne ke le modisana, ke bile ke hlokomela difate tsa feiye. 15Jwale Morena a mpitsa ke ntse ke alositse, a re ho nna: ‘Eya, o yo porofetela setjhaba sa ka sa Iseraele.’ 16Jwale he, utlwa seo Morena a se bolelang. Wena o re:
“ ‘O se ke wa porofetela Iseraele,
thutong ya hao
o se ke wa nyatsa ntlo ya Isaka.’ ”
17“Ka baka leo, Morena o bua tjena:
“ ‘Mohatsa hao
otla fetoha seotswa hara motse,
bara le baradi ba hao
ba bolawe ka sabole.
Naha ya heno e tla arolelwa basele,
wena o yo shwela naheng,
naheng e silafetseng.
Ruri Baiseraele ba tla thopuwa,
ba thopelwe hole,
hole le naha ya habo bona.’ ”
