2 SAMUELE 22

“Morena ke lehaha la ka,

ke qhobosheane ya ka,

ke monamoledi wa ka.

₃Modimo ke lefika la ka,

leo ke tshabelang ho lona,

ke thebe ya ka,

ke lenaka la ka le mpholosang,

ke seqhobo sa ka,

ke setshabelo sa ka;

ke Mopholosi wa ka,

o mpholosa kgatellong.

₄Ke ipiletsa ho Morena

ya lokelang ho roriswa,

mme ke pholoswa direng tsa ka.

₅“Maqhubu a lefu

a ne a ntikile,

phororo tsa timelo

di ne di nkukile.

₆Maraba a lefu

a ne a mpotapotile,

difi tsa lefu

di ne di ntjhehile.

₇Makaqabetsing a ka

ka ipiletsa ho Morena,

e, ka ipiletsa ho Morena wa ka,

a utlwa lentswe la ka

a le ka Tempeleng ya hae,

sello sa ka sa fihla tsebeng tsa hae.

₈“Lefatshe la reketla, la thothomela,

metheo ya lehodimo ya tsukutleha,

ya reketla hobane a halefile.

₉Mosi wa foqoha ka nkong tsa hae,

mollo o timetsang

wa betseha ka hanong la hae,

mashala a hlenneng

a tswa ho yena.

₁₀A phetla mahodimo,

a theohela fatshe,

leru le letsho le le maotong a hae.

₁₁A fofa a palame kerubime,

a hoballa a le mapheong a moya.

₁₂Lefifi a le etsa lesira la hae,

maru a matsho, a dusang pula,

wona a a etsa tente ya hae.

₁₃Maru a apolwa ke kganya

e mo etellang pele,

ha na sefako sa mashala a tukang.

₁₄Morena a thwathwaretsa,

a thwathwaretsa a le mahodimong,

Ya Hodimodimo

a utlwahatsa lentswe la hae.

₁₅A fula ka metsu ya hae,

dira tsa qhalana,

a betsa mahadima,

mme tsa phasaphasa.

₁₆Madiba a mawatle

a bonahala tlasetlase,

metheo ya lefatshe

ya phetleha

ha ho omana wena Morena,

ha ho foka moya

o tswang ka nkong tsa hao.

₁₇“Morena a nnanabela a le hodimo,

a nnanabela, a ntshwara,

a nkinola metsing a lewatle.

₁₈A nnamolela

sereng sa ka se matla,

ho ba ntlhoileng,

ba neng ba mphekisa.

₁₉Ba mphutuhela mohla tlokotsi ya ka,

empa Morena a nthusetsa.

₂₀A nkisa bakeng se batsi,

a ntokolla hobane a nthata.

₂₁“Morena o mputsitse

ho ya ka ho loka ha ka,

o mpuseleditse

ho ya ka ho hloka molato ha ka.

₂₂Ke tiiseditse tseleng ya Morena,

ha ke a etsa bokgopo,

ka arohana le Modimo wa ka.

₂₃Ke fadimehetse

dikahlolo tsa hae tsohle,

ha ke a qhelela

taelo tsa hae kathoko.

₂₄Mahlong a hae ha ke na kodi,

ke ipolokile ke se na molato.

₂₅Morena o mputsitse

ho ya ka ho loka ha ka,

hobane o a bona

hore ke hlwekile.

₂₆“Ho ya tshepahalang, o a tshepahala;

ho ya se nang kodi, o hloka kodi.

₂₇Ho ya hlwekileng, o hlwekile,

empa ho molotsana o masene.

₂₈Ke wena ya pholosang

setjhaba se hlophehileng,

empa o kokobetsa baikgohomosi.

₂₉Morena, ke wena lebone la ka,

Morena o bonesa lefifi la ka.

₃₀Ka thuso ya hae

ke thula dira tsa ka,

ka thuso ya Modimo wa ka

nka tlola lerako.

₃₁“Tsela tsa Modimo di phethehile,

tshepiso tsa Modimo ke tsa nnete,

yena ke thebe ya bohle

ba tshabelang ho yena.

₃₂Modimo ke mang,

haese Morena?

Lefika ke mang,

haese Modimo wa rona?

₃₃Ke yena Modimo ya mmatlafatsang,

ya ntsamaisang tseleng e ntle.

₃₄O potlakisa maoto a ka

jwaloka a kgama,

o mpea hodima dihlaba.

₃₅O nthuta ho lwana,

o nthuta

le ho hula seqha sa lethose.

₃₆O nneile thebe ya hao e pholosang,

paballo ya hao e a nkgodisa.

₃₇O ntlhekela tsela e batsi,

maoto a ka ha a thelle.

₃₈“Ke lelekisitse dira tsa ka,

ka ba ka di tshwara,

ha ke a ka ka kgutla

ke eso di timetse.

₃₉Ke di hlathile,

hoo di ke keng tsa tsoha,

e, di wetse tlasa maoto a ka.

₄₀O mmatlafaletsa ntwa,

ba ntwantshang o ba bea tlasa ka.

₄₁O etsa hore dira tsa ka

di ntshupe ka direthe,

ba ntlhoileng ke a ba timetsa.

₄₂Ba llela thuso,

ba hloka mopholosi,

ba llela Morena,

ha a ba arabe.

₄₃Ke ba thumisa jwaloka lerole,

jwaloka lerole la lefatshe,

ke ba hatakela jwaloka seretse,

jwaloka seretse se tseleng.

₄₄“O nnamoletse

meferefereng ya setjhaba,

wa nketsa mmusi wa ditjhaba,

ditjhaba di a ntshebeletsa,

ditjhaba tseo ke neng ke sa di tsebe.

₄₅Hang ha di nkutlwa, di a mmamela,

di ipea tlasa puso ya ka

ha di mpona.

₄₆Ditjhaba di kgathala matla,

di tswa di thothomela

qhobosheaneng tsa tsona.

₄₇“Morena o a phela!

Ho bokwe Lefika la ka!

Modimo, Mopholosi wa ka,

a ke a thoholetswe!

₄₈Modimo ya ntshitsang ka

diphetetso,

ya beang ditjhaba tlasa ka,

₄₉ya nnamolelang direng tsa ka,

ya mphahamisetsang kahodimo,

kahodimo ho ba ntwantshang,

o nnamolela

diatleng tsa ba sehloho.

₅₀“Ka baka leo,

ke tla o boka hara ditjhaba,

ke roke lebitso la hao, Morena.

₅₁Wena ya neang kgosi ya hao,

ya e neang tlholo e kgolo,

ya bontshang mohau

ho motlotsuwa wa hao,

ho Davida le ditloholo tsa hae

kamehla le mehla.”