SAKARIEA 9

Molaetsa o fihlile

naheng ea Hadarake,

'me o tla hlola

motseng oa Damaseka.

Motse-moholo oa Arame

ke oa Morena,

le merabe eohle ea Iseraele

ke ea hae.

₂Hamate e sehelanang moeli,

e o sehelane le Hadarake

le eona e ntse e le ea Morena,

le Tire le Sidone tse bohlale haholo.

₃Tire e ikhahetse qhobosheane,

ea ipokellela silefera,

silefera e le ngata

sa hlabathe le bokeletsoe,

ea ipokellela le khauta,

khauta e le ngata

sa seretse literateng.

₄Empa Morena

o tla hapa maruo a eona,

likepe tsa eona

a li pshatlele leoatleng,

ebe motse oona o o chesa ka mollo.

₅Ashekelone e tla bona,

e tšohe haholo,

Gasa eona e meneke ke bohlōkō,

Ekerone le eona e felloe ke tšepo.

Khosi ea Gasa e tla timetsoa,

Ashekelone eona e hloke baahi.

₆Ashedode e tla ba leaho,

aho la likhaupane,

boikakaso ba Bafilesita ke bo felise.

₇Nama e mali, eo ba e jang,

ke tla e felisa,

le nama tse ilehang tsa bona

ke li felise.

Ba setseng

e tla ba ba Molimo oa rōna,

le bona ba tšoane

le ba morabe oa Juda,

ba Ekerone bona

ba tšoane le Bajebusi.

₈Ke tla lalla pel'a ntlo ea ka,

ke lalle pel'a eona ke e lebele,

mabōtho a e futuhelang ke a thibele.

Chaba sa ka

ha se sa tla hlōloa ke motlatlapi,

hobane joale se lebetsoe

ke 'na ka sebele.

₉Uena Morali oa Sione

nyakalla haholo!

Uena Morali oa Jerusalema

etsa litlatse!

Bona! Khosi ea hao e tla ho uena;

e lokile, e tlisa topollo,

e ikokobelitse, e palame tonki,

e palame petsana ea tonki.

₁₀Morena o re:

“Ke tla amoha Efraime

kariki tsa ntoa,

ke amohe Jerusalema

lipere tsa ntoa,

seqha sa ntoa ebe sona kea se roba.

Khosi eo

e tla tlisetsa lichaba khotso,

e buse ho akaretsa maoatle 'ohle,

e buse

ho tloha Nōkeng ea Euferatese,

e e'o fihla pheletsong tsa lefatše.”

“Ka baka la selekane

sa rōna le uena,

se tiisitsoeng ka mali a mahlabelo,

bathōpuoa ba hao ke tla ba lokolla,

ke ba ntše lelumeleng

le se nang metsi.

₁₂Lōna bathōpuoa ba nang le tšepo,

khutlelang qhobosheaneng ea lōna;

e sa le joale ke se ke le tsebisa:

Ke tla le buseletsa tsohle habeli.

₁₃Ke tla koba Juda

sa ha ke koba seqha,

Efraime eena e be motsu oa sona.

Ke tla hlohleletsa bara ba Sione,

ke ba etse sabole ea mohlabani,

ba futuhele bara ba Bagerike.”

₁₄Ke moo Morena a tla hlaha,

a ba okamele,

motsu oa hae o tsèkèmè sa lehalima.

Morena Molimo o tla letsa lenaka,

a tsamaee kahar'a lifefo tsa boroa.

₁₅Morena oa mabōtho

o tla ba sireletsa,

lira tsa bona ba tla li timetsa,

ba li hlōle ka majoe a matjeketjane.

Mali a tsona ba tla a noa sa veine,

ba sasamatse limpa

sa lefisoana le tletse,

ba a khanathele sa manaka a aletare.

₁₆Mohl'a tsatsi leo ba tla pholosoa,

Morena Molimo oa bona,

o tla ba pholosa,

hobane chaba sena

ke mohlape oa hae.

Kahar'a naha ea hae ba tla phatsima,

ba phatsime

sa mabenyane o mofapahlooho.

₁₇Ba tla khahleha,

ba be batle hakaakang!

Koro e tla matlafatsa bahlankana,

veine e ncha

e matlafatse baroetsana.